Niireke Nihaana Ovekela wa Masanto?

TI pani ohitonko okumana ni muxankiho mweekumini mwawe ni onamphavela mutthu wira omukhaliherye? Moohicikha etthu sa muxankiho orina ahu, nto waaniheryasa hiyo naarowa omuthanla mpatthani ori oomaaleleya ni onisuwela saana muxankiho oniphwanye. Mutthu oniwoonela othunku akina ni onisuwela moota woweettiherya saana mixankiho onnireerela okhala mpatthani ootthuneya tthiri.

Waaniheryasa atthu akina anuupuwela siiso mwa okathi anivekela aya. Ohiya onvekela Muluku yoowo woonasa wene aninweha aya okhala a vasuluxa ni owoopiha, awo annoona okhala vookhweya olavula ni masanto. Awo anuupuwela wira masanto, aatoko okumanana soweeha ni mixankiho sinikumana apinaatamu, ni wira awo yaarowa okhala oomoriwa ikharari. Mwa ntakiheryo, atthu arimeeliwe etthu aya yootepa otthuneya waaniheryasa pooti ophavela omwaattamela “Santo” Antônio de Pádua—namakhaliherya a yoolema ya atthu ale anirimeliwa wala aniiyeriwa etthu. Akhala wira aninvekelela mwaamunama oniwereiwa, atthu awo pooti omuthanla “Santo” Francisco de Assis wala “Santo” Jude Thaddeus akhala wira ohaavo mwaha onaaxankiha.

Nto, moota xeeni, ninrowa ahu okupali tthiri akhala wira ti vookhalela ovekela wa masanto, moovarihana ni Soolempwa? Okhala wira ovekela onitaphulela olavula ni Muluku, veekeekhai hiyo ninniphavela osuwela ela: Niireke mavekelo ahu anniwiiwa ni Muluku? Nave-tho nihaana wiikohaka so: Muluku onoonela sai naapakaka mavekelo ahu wa masanto?

MOONELO WA BIIBILIYA VOOHIMYA SA OVEKELA WA MASANTO

Yoowiira ela ya waavekelela masanto enikhuma mwa yowiixuttiha ya okhaliheriwa ni masanto ya Ekerexa Katoolika. Moovarihana ni New Catholic Encyclopedia, yoolukama ya muupuwelo owo ori “ovekela orweela wa ole Muluku onimoonela awe okhala naxariya wira omoreliwe ikharari wa ole otthenke”. Mwekeekhai, mutthu onivekela wa masanto onipaka eyo ni nlipelelo noowi onoophwanya okhaliheriwa wa vameekhaaya orweela wa masanto mwaha wa mukhalelo wooreelihiwa awo arina aya ohoolo wa Muluku.

Niireke Biibiliya onniixuttiha etthu eyo? Akina anihimya wira murummwa Paulo topacerinhe mwa soolepa sawe voohimya sa ovekela wa masanto. Mwa ntakiheryo, wa maKristau a oRoma owo aalempe so: ‘Vano, axinn’aka, kinnovekelani mwaha wa nsina na Kristu, ni mwaha w’ophenta w’Eroho Yowarya, [munepa wootteela] wira mukikhaliherye mukilompelaka wa Muluku’. (aRoma 15:30) Niireke Paulo aavekela axinna awe maKristau wira amukhaliherye ohoolo wa Muluku? Nnaari. Khula etthu, awosa yanimukoha Paulo, yoowo aari murummwa a Kristu, wira aakhaliherye. Paulo ooniherya wira ti vootthuneya waavekela axinna ahu maKristau wira anvekeleke Muluku mmureerelo ahu. Masi etthu yoovirikana tiila: Ovekela wa mutthu yoowo onikupaliwa wira ori wiirimu wira iirihe mavekelo ahu ophiya wa Muluku. Nthowa xeeni?

Mwa ehapari ya murummwa Yohani, Yesu oohimya iiraka: “Miyo k’ephiró. Miyo k’ekekhayí. Miyo k’ekumí. Khavo onwerya orowa wAtithi, ahivinre wa miyo”. (Yohani 14:6) Owo-tho aahihimya iiraka: “Etthu p’itthu enavekelanyu Atithi ni nsina naka awo animovahani”. (Yohani 15:16) Yesu khaahimmye wira naahaana ovekelaka wa yena, wira nto owo olavule ni Muluku mmureerelo ahu. Vahinatthi, wira mavekelo ahu awiriyaniwe, hiyo nihaana onvekelaka Muluku orweela wa Yesu ni woohikhala-tho mutthu mukina.

Okathi awiixutti awe Yesu yanvekenle aya wira owiixuttihe moota woovekela, Yesu aahaakhula iiraka: “Mwalompaka, muhimyeke wira: ‘Tithi, nsina nanyu nivuwihiwe’.” (Luka 11:2) Tthiri, khula okathi ‘ninlompa’ ahu, nihaana onvekelaka Yehova paahi, ohiya Yesu wala mutthu mukina. Mwaha wa sowiixuttiha iya sa Yesu sowiiweya saana, nyuwo khamunoona wira nihaana opakaka mavekelo wa Muluku paahi orweela mwa Yesu Kristu, ohiya mutthu mukina wala “masanto”?

Ovekela oniirela mpantta okokhorela wahu, nto okokhorela etthu ekina ohiya Muluku, khonivarihana ni sowiixuttiha sa Biibiliya. (Yohani 4:23, 24; Wisupulula 19:9, 10) Ti maana aya nintthuneya ahu ovekelaka wa Muluku paahi.

NIIREKE MUHAANA WOOVA OMWAATTAMELA MULUKU?

Mwa Olaleya wawe Vamwaako, Yesu aahivaha ntakiheryo na mwaana oninvekela tiithi awe etthu yoolya. Tiithi xeeni oninvaha mwanawe nluku ohiya ephau? Wala enowa ohiya ehopa? (Matheyo 7:9, 10) Tthiri, tiithi oophenta khonirowa opaka etthu ntoko eyo!

Nkahaya muupuwele nlikanyiho nno na tiithi mmosa. Mulikanyihe wira mwaninyu yookhala etthu eniphavela awe woovekelani. Nyuwo munniiwanana saana nuuwo, ni okathi wotheene munniphavela wira owaattamelekeni. Masi, mwaha wa woova woohikhalela, owo onnimurumiha mutthu mukina wira olavule ni nyuwo. Nyuwo mwaarowa woona sai? Ankhi akhala wira onipaka yoolema awe olavula ni nyuwo omurumeelaka mutthu yoowo, ni vannooneya wira onirowa ovikaniha opaka eyo? Niireke nyuwo mwaamuhakalala? Nnaari! Anamuyari oophenta aniphavela wira anaaya alavulaneke mmensaya, ni wira aweryeke oveka ele aniphavela aya.

Olikanyihaka sa mwaana oniveka eyoolya, Yesu aahihimeerya muttitthi wira: “Munamwi muri nyuwo, muri òtakhala murima, munasuwela wavaha sorera an’inyu, Atith’inyu ari wirimu anotepa wavaha sorera ale anavekela”. (Matheyo 7:11) Moohaaniherya, tiithi onniphavela tthiri onvaha mwanawe itthu sooloka. Moolikanasa, Tiithi ahu a wiirimu onniphavela tthiri owiriyana ni waakhula mavekelo ahu.

Muluku oniphavela wira nimwaattameleke mmensawe ninvekelaka hata nixankale ene mwaha wa soovonya sahu. Owo khomuthanlale mutthu mukina wira owiriyaneke mavekelo ahu. Biibiliya onnitumererya so: ‘Mwareye Apwiya [Yehova] muritti anyu: awo t’aniwemexani: awo khanamuhiye naxariya akwattuliwaka’. (Esalimo 55:23) Nto ohiya waaroromela masanto wala mutthu mukina, nnimwiira saana okhalana moonelo wooloka voohimya sa Yehova.

Tiithi ahu a wiirimu, onnimuthokorerya khula mutthu. Owo oniphavela onikhaliherya mixankiho sahu, ni onninlattula wira nimwaattameleke. (Yakobo 4:8) Tthiri, ninnihakalala vanceene okhala wira nookhalana eparakha ya omwaattamela Muluku ahu ni Tiithi ahu, yoowo ‘oniwa mavekelo’.​—Esalimo 65:3

[Elatarato epaaxina 12]

[Elatarato epaaxina 13]

Ntoko tiithi oophenta ori ni mwanawe, Muluku oniphavela wira nilavulanke nuuwo