MWAHA WOOPACERYA | ITTHU SOWOOTHIWA SINIWIIRIHA ATTHU OHIMPHENTA MULUKU
Yoowootha 1: Muluku Khorina Nsina
ELE ANAMUNCEENE ANIKUPALI AYA: “Hiyo khaninsuwela vaareerelaka oromola nsina na Muluku; ni akhala wira ti siiso, nto nsina xeeni”?—Prusoore onisomiha universidade David Cunningham, Theological Studies.
ELE BIIBILIYA ONIIXUTTIHA AWE: Muluku onihimya so: “Miyo kà Yahvéh, nla ti nsina naka”. (Yesaya 42:8, Biblya Exirima) Nsina na eHeeberi Yahvéh wala Yehova, nintaphulela wira “Owo Onniiriha Okhala”.—Maphattuwelo 2:4.
Yehova oniphavela wira nirumeeleke nsina nawe. Biibiliya oniira so: ‘Mutthapeleke nsina nawe: mulaleye wira nsina nawe ti novuwa. Mwalalèrye atthu othene miteko sovuwa sa Muluku’.—Yesaya 12:4.
Yesu aahirumeela nsina na Muluku. Okathi anvekela awe Yehova, owo aahimyale so: “Miyo kihasuweliha [awiixutti a Yesu] nsina nanyu, nave kinotepa wasuweliha”. Xeeni Yesu aasuwelinhe awe nsina na Muluku awiixutti awe? Owo aahivikaniha oriki: “Wira ophenta onkiphentananyu okhale mwa yawo, nave miyo-tho kikhale mwa yawo”.—Yohani 17:26.
XEENI ORYAAYA VOOTTHUNEYA? Musomi mmosa a myaha sa etiini, Walter Lowrie, olempe so: “Mutthu ohinisuwela nsina na Muluku, vekeekhai khonimusuwela Muluku, ni khoniwerya omphenta maana Muluku owo khokhanle”.
Mwa ntakiheryo, Victor khaacompela orowa okerexa. Masi khaakupali wira aanimusuwela Muluku veekeekhai. Owo onihimya so: “Nto, nuumala wiixuttihiwa ni Anamoona wira nsina na Muluku ti Yehova, eyo yaahikiiriha omusuwela saana. Nto kaahoona wira kaahimphwanya Ole kaamakela aka wiiwa olavuliwaka okerexa. Vano kaahipacerya omoona ntoko Muluku eekeekhai ni khukhala mpatthani aka”.
Yehova onniwaattamela atthu anirumeela nsina nawe. Voohimya sa ale anuupuwelela nsina nawe, Muluku onaaleiherya wira: “Miyo kinimwakhurunuwela murima, ntoko tithi sinimurerelawe murima mwan’awe onimurumela”. (Malakhiya 3:16, 17) Muluku onnaatthuvela ale anilaleya nsina nawe. Biibiliya onihimya so: “Atthu othene anvekela nsina n’Apwiya, [Yehova] animòpowa”.—aRoma 10:13.
[Elatarato epaaxina 4]
Ovitha wala orantteliha nsina na Muluku onilikana ni okumiha mBiibiliyani ipantte silempwale aya nsina nno