MWAHA WOOPACERYA | ITTHU SOWOOTHIWA SINIWIIRIHA ATTHU OHIMPHENTA MULUKU
Itthu Sinaakhoottiherya Atthu Omphenta Muluku
“‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene’. Ela ti yoruma yulupalexa ni yopacerya”.—Yesu Kristu, 33 E.C.a
Atthu akina onnaavila omphenta Muluku. Awo anuupuwela wira Muluku khonisuwanyeya, khanithokorerya, ni tootakhala. Moone matakiheryo anittharelana:
“Miyo kaaninvekela Muluku wira okikhaliherye, masi kuupuwela wira khivaaweryaneya omwaattamela. Kuupuwela wira Muluku khorina othunku”.—Marco, wItalia.
“Nnaamwi kaaphavela omurumeela Muluku, miyo koona wira owo ori ottaiwene. Kuupuwela wira Muluku aari ootakhala ni aaphavela onihukhumu paahi. Nkaakupali wira owo onnoona othunku”.—Rosa, oGuatemala.
“Kiryeene mwaana, miyo kaakupali wira Muluku aaphavelasa soovonya sahu paahi, wira onihukhumu. Muhoolo mwaya, kaahipacerya wuupuwela wira khivaaweryaneya opatthana ni yena. Muluku aakhala ntoko Primeiro-Ministro yoowo onaalamulela atthu masi ohiphavelaka mureerelo aya”.—Raymonde, oCanada.
Munoonela sai? Niireke ti vooxankiha omphenta Muluku? Okhuma khalai maKristau annipaka nikoho nlo. Tthiri, okhuma eriyari ya iyaakha 500 mpakha iyaakha 1500 ohinatthi orwa Kristu, anamunceene a eKristau yoowootha khiyanvekela Muluku Oowerya Sotheene. Mwaha wa xeeni? Mwaha woowi atthu yaanimoova Muluku moohikhalela. Mulipa oolepa sowiiraneya Will Durant onihimya so: “Tthiri khivaaweryaneya namattheka onvekela Muluku oowoopiha ni oohipatthaneya”.
Nto atthu yaapacenrye sai wuupuwelaka wira Muluku aari “oowoopiha ni oohipatthaneya”? Biibiliya oniixuttiha exeeni voohimya sa Muluku? Niireke wiixutta ekeekhai voohimya sa Muluku onimookhaliheryani omphenta?
[Enoota]
[Ilatarato siri epaaxina 3]
[Masu a elatarato]
Osulu: elatarato enooniherya amuluku araru; Museu Bardini, Florence; eriyari, omooroni: © Photononstop/Superstock