MWAHA WOOPACERYA | ITTHU SOWOOTHIWA SINIWIIRIHA ATTHU OHIMPHENTA MULUKU

Yoowootha 2: Muluku Khonisuwanyeya

ELE ANAMUNCEENE ANIKUPALI AYA: Etiini ya eKristau, “mwa ipantte saya tthaaru suulupale: Ekatoolika, Ortodoxa, ni eProtestante, sinikupali wira Muluku ori mmosa, masi orweela wa atthu araru: Muluku Tiithi, Muluku Mwaana, ni Muluku Erooho Yowaarya [Munepa Wootteela]. Moovarihana ni yowiixuttiha ya itiini iyo, khakhanle amuluku araru, masi ori Muluku mmosa mwa atthu araru”.​—The New Encyclopædia Britannica.

ELE BIIBILIYA ONIIXUTTIHA AWE: Yesu, Mwaana a Muluku, khonahimye wira owo ni Tiithi awe ari mutthu mmosaru. Masi owo aahimyale so: ‘Miyo kinrowa w’Atithi: mana Atithi t’alupale okivikana miyo’. (Yohani 14:28) Nave-tho owo aahimuhimeerya mwiixutti awe mmosa wira: “Miyo kinrowa w’Atithi, yawo-tho akhanle Atith’inyu: kinrowa wa Muluku aka, yowo-tho okhanle Muluku anyu”.​—Yohani 20:17.

Munepa wootteela khahiyo mutthu. Biibiliya onihimya wira maKristau oopacerya “yahisareya eroho yowarya” wala munepa wootteela. Nave Yehova aahihimya wira: “Miyo kinimwamwarexela eroho aka [munepa wootteela] atthu othene”. (Miteko 2:1-4, 17) Munepa wootteela khoniirela mpantta amuluku araru. Masi, ikuru soowerya sa Muluku.

XEENI ORYAAYA VOOTTHUNEYA? Asomi a ekerexa Katoolika aniihaniwa Karl Rahner ni Herbert Vorgrimler anihimya so: “Yowiixuttiha ya amuluku araru khuuvo oniwerya osuwela saana ohuupuxeriwe ni Muluku; ni hata uupuxeriwaka, khoniwerya osuwela moomalela”. Niireke munoowerya omphenta wala omwiiwexexa mutthu ohinimusuwela anyu? Yowiixuttiha ya amuluku araru, ennaakhoottiherya atthu omusuwela ni omphenta Muluku.

Marco, oromoliwe wanipacerya, aahoona wira eyo ekeekhai. Owo onihimya so: “Miyo kuupuwela wira Muluku khaaphavela wira kimusuwele. Eyo yaahikiiriha wuupuwela wira Muluku ori otteiwene, khonisuwanyeya, ni khivaniweryaneya omwaattamela”. Masi “Muluku . . . khahiyó ònyakuliha”. (1 aKorinto 14:33, Biblia Solempwa sa Muluku) Owo khonivitha omutthu awe, masi oniphavela wira nimusuwele. Yesu aahimyale so: “Ninnimusuwela onimukokhorelahu”.​—Yohani 4:22.

Marco onivikaniha so: “Okathi kaaxuttale aka wira Muluku khahiyo atthu araru, nto kaahipacerya woona wira vanniweryaneya omwaattamela”. Tthiri, osuwela wira Yehova khoniirela mpantta amuluku araru, onoonikhweiherya omphenta. Biibiliya oniira so: “Ole ohinimphenta mukhw’awe, khanimusuwela Muluku, okhala wira Muluku ophentá”.—1 Yohani 4:8.

[Elatarato epaaxina 5]

[Masu a elatarato]

Museu Bardini, Florence