MWAHA WOOPACERYA | ITTHU SOWOOTHIWA SINIWIIRIHA ATTHU OHIMPHENTA MULUKU

Ekeekhai Enimootaphulani

Nihiku nimosa, oryeene oYerusalemu, Yesu aanilavula sa Tiithi awe, Yehova, aavaanyihaka ahooleli a itiini soowoka a mahiku ale. (Yohani 8:12-30) Ele aahimyale awe, enniniixuttiha wa moota nikhanle ahu ootokosa sookupali sa atthu voohimya sa Muluku mahiku ala. Yesu aahimmye so: “Nyuwo, mwakhalela nthiti molumo aka, vekekhai munokhala awixutti aka; munosuwela ekekhai, vano ekekhai yeyo enimokhalihani òtaphuwa”.​—Yohani 8:31, 32.

Vaavo Yesu aalavula awe wira: “Mwakhalela nthiti molumo aka”, aavaha malakiheryo a moota wootokosa sowiixuttiha sa itiini saari sa “ekekhai”. Vaavo muniiwa anyu moolumo voohimya sa Muluku, mwiikoheke so: ‘Kiireke yowiixuttiha ela ennivarihana ni moolumo a Yesu ni Biibiliya otheene?’ Mwaatakiheke ale yanwiriyana murummwa Paulo yaawo ‘nihiku ti nihiku yasoma solempwa sa Muluku, wira esuwele itthu iya sari s’ekekhai’.​—Miteko 17:11.

Marco, Rosa, ni Raymonde, alavuliwe mmyaha sivinre, yaahitokosa sookupali saya orweela wa omusoma Biibiliya ni Anamoona a Yehova. Exeeni yiixuntte aya?

Marco onihimya so: “Mulipa aanisomiha Biibiliya, aanimurumeela Biibiliya wira aakhule makoho otheene naapaka ahu miyo ni amwaaraka. Omphenta wahu Yehova waaninnuwa, ni naaniphentana vanci ntoko atthu oothelana!”

Rosa onihimya so: “Wanipacerya, miyo kuupuwela wira Biibiliya eliivuru ya efilosofia, yeeyo enitthokiherya voohimya sa Muluku erumeelaka miyuupuwelo sa apinaatamu. Masi, vakhaani-vakhaani kaahiphwanya mBiibiliyani waakhuliwa wa makoho aka. Vano, Yehova tekeekhai wa miyo. Owo Muluku onireerela aka omuroromela”.

Raymonde onihimya so: “Miyo kaahinvekela Muluku wira okikhaliherye omusuwela. Nto, moohipisa aiyaka ni miyo naahipacerya omusoma Biibiliya. Wanikisa waya, naahiixutta ekeekhai voohimya sa Yehova! Vano noohakalala vanceene mwaha woosuwela wira Muluku toophenta”.

Biibiliya onnihimya itthu sikina, ohiya paahi wooniherya sowiixuttiha sowootha voohimya sa Muluku. Biibiliya onniixuttiha ekeekhai voohimya sa mikhalelo sawe sooloka. Nuulumo nawe nowuupuxeriwa, ninniwerya ‘onisuweliha sorera Muluku sinivahalyawe mahala’. (1 aKorinto 2:12) Xeeni muhinitokosa anyu mmensinyu moota Biibiliya onaakhula awe makoho maalupale voohimya sa Muluku, yoolakela awe, ni itthu sa muhoolo? Musome waakhuliwa wa makoho makina munternetini va www.jw.org opuro oni: “Sowiixuttiha sa Biibiliya > Waakhuliwa wa Makoho a mBiibiliyani”, ekunya. Nave-tho, nyuwo pooti ovekela yoosoma ya Biibiliya murumeelaka esite ahu wala onvekela Namoona a Yehova. Akhala wira munoopaka eyo, ninniroromela wira munimoona okhweya omphenta Muluku ovikana khalai.

[Elatarato epaaxina 7]