MMWAATTAMELE MULUKU
Muluku “Onnatthuvela Ale Animphavela”
Niireke Yehova onnivaha efaita itthu sinipaka aya arumeyi awe aphavelaka omuhakalaliha? Akina pooti waakhula wira nnaari, ahimyaka wira Muluku khannicalela. Masi, moolumo awo annikumiherya muupuwelo woohiloka voohimya sa Muluku. Omurumeelaka Biibiliya, Muluku onnihimya itthu mwa enamuna yoowiiweya. Nuulumo nawe ninlipiherya wira Owo onnivaha efaita wiimananiha wa arumeyi awe oororomeleya. Muthokorerye masu a murummwa Paulo yaawo aniphwanyaneya yoolepa ya aHéberi 11:6.
Nipakeke exeeni wira nimuhakalalihe Yehova? Paulo olempe so: “Khavo mutthu onwerya omusiveliha Muluku, ahaminiki”. Moone wira Paulo khohimmye wira ti voovila omuhakalaliha Muluku moohaamini. Masi ohimmye wira mutthu khonwerya omuhakalaliha Muluku ohaaminiki. Tivonto, waamini ti etthu yootthuneya wira mutthu amuhakalalihe Muluku.
Waamini xeeni onimuhakalaliha Yehova? Omwaamini wahu Muluku ohaana ohela muhina itthu piili: Yoopacerya, hiyo ‘nihana wamini wira Muluku okhala’. Moolumo ala, aBiibiliya akina anitaphulela so: “Okupali wira Muluku teekeekhai” ni “okupali wira owo ohaavo”. Vaniweryaneya sai omuhakalaliha Muluku nihoveryaka wira owo ookhala? Tthiri, waamini wekeekhai onihela muhina itthu sinceene, maana hata axetwani annikupali wira Yehova ookhala. (Yakobo 2:19) Waamini wahu wira Muluku ohaavo ohaana oniiriha opaka etthu, eyo piiyo, wooniherya waamini wahu nikhalaka mwa enamuna enimuhakalaliha.—Yakobo 2:20, 26.
Ya nenli: ‘Nihana wamini wira Muluku onnitthuvela’. Mutthu orina waamini wekeekhai, onnikupali wira wiimananiha wawe okhala mwa enamuna enimuhakalaliha Muluku khahiyo wa mahala. (1 aKorinto 15:58) Vaniweryaneya sai omuhakalaliha Yehova nihoveryaka owerya wawe wala ophavela wawe onitthuvela? (Yakobo 1:17; 1 Pedru 5:7) Tthiri, ole onuupuwela wira Muluku khorina othunku, khonixukhuru, ni khonivaha, khonimusuwela Muluku ori mwaneene Biibiliya.
Yehova onaatthuvela atthu xeeni? Paulo onihimya so: Muluku “onnatthuvela ale animphavela”. Eliivuru ekina ya anamataphulela a Biibiliya, enihimya wira nuulumo na eGriki noowi ‘omphavela’, khanintaphulela “weererya omphwanya Muluku”, masi, nintaphulela wiimananiha wira “nimukokhorele Muluku”. Eliivuru ekina enitthokiherya wira nuulumo nna na eGriki nintaphulela wiimananiha ni oluttuweliwa. Tthiri, Yehova onnaatthuvela yaale waamini waya oniwiiriha omukokhorela mooluttuweliwa ni murima wotheene.—Matheyo 22:37.
Yehova onaatthuvela sai arumeyi awe oowaamini? Owo ohaaleiherya waatthuvela itthu soohakalaliha muhoolo. Eyo enooniherya oreera wawe murima ni ophenta vaavo onirowa awe waavaha ekumi yoohimala oParayiisu ya valaponi. (Wisupulula 21:3, 4) Hata vano, atthu animphavela Muluku anniphwanya mareeliho manceene. Ekhaliheriwaka ni munepa awe wootteela ni miruku siri mBiibiliyani, awo annikhalana okumi wooloka ni woohakalaliha.—Esalimo 144:15; Matheyo 5:3.
Veekeekhai, Yehova onnivaha efaita ni oxukhurela muteko anipaka aya arumeyi awe oororomeleya. Niireke osuwela eyo, onniwiirihani ophavela omwaattamela? Akhala wira ti siiso, mwiixutte sikina voohimya sa moota mukhanle anyu owooniherya waamini weiwo Yehova onirowa awe wootthuvelani.
Malakiheryo a Omusoma Biibiliya Novembro
Tito 1-3; Filémon 1-25; aHéberi 1-13–Yakobo 1-5
[Eponto yuulupale ya epaaxina 11]
Vaniweryaneya sai omuhakalaliha Yehova nihoveryaka owerya wawe wala ophavela wawe onitthuvela?