Okhweliwa ti Voowereya

Okhweliwa khonilimaleleya. Atthu anceene khaniphavela olavula voohimya sa okhwa. Masi, otheene ahu ninnisuwela wira muhoolo nnimookhwa. Okhweliwa ti voowereya ni pooti oniphwanya mootutuxerya.

Khuuvo mutthu oniilokiherya vaavo onikhwa awe tiithi, maama, ole mutthu aathelanne awe, aahiiso mwanawe. Ehasara enoowerya okhumelela mootutuxerya wala muhoolo. Nto, owereya onikhumelela mwaha wookhweliwa khonisyakeya ni ti wootakhala.

Antonio, yoowo paapa awe okhwiiye mwaha woophitiwa ni ekaaro onihimya so: “Okhwa onilikana ni otumihiwa enupa anyu nto khiyakuxiwa ixaavi. Nyuwo khamunwerya okela mpaani, pooti mwa okathi vakhaani. Munihala paahi muupuwelelaka enupa anyu. Nto okhwa khonisyakeya. Hata mmananihaka wira muhikhwe, khiivo etthu ekhanle anyu oopaka wira musyake okhwa. Tthiri okhwa etthu yootepexa otakhala”.

Dorothy, muthiyana aakhweliwe ni iyawe nto khukhala naamukhweli orineene iyaakha 47, aahiphavela ophwanya waakhuliwa wa makoho awe. Nnaamwi aari mulipa aawiixuttiha anamwane Ettiminku okerexa, khaatonko wuupuwela wira okhwa omala wa itthu sotheene. Masi owo khaawerya osuwela ele eniiraneya wookhwaani. Muthiyana owo aahimukoha pastore a ekerexa Anglicana wira: “Exeeni enniiraneela wookhwaani?” Nto owo aahaakhula wira: “Khuuvo onisuwela saana. Nihaana olipelela okhwa, wira nisuwele ekeekhai”.

Niireke nihaana “olipelela okhwa wira nisuwele” ekeekhai? Wala yookhala etthu ekina enirowa onikhaliherya osuwela akhala wira okhwa omala wa itthu sotheene?