MWAHA WOOPACERYA | OMWENE WA MULUKU ONROWA OPAKA EXEENI MMUREERELO ANYU?

Omwene wa Muluku Onrowa Opaka Exeeni Mmureerelo Anyu?

Ntoko musomme anyu mmyaha sivinre, Anamoona a Yehova annivaha efaita yuulupale Omwene wa Muluku. Woonasa wene nyuwo mootikiniwa mwaha wa mareeliho a muhoolo a Omwene athokoreriwe. Masi-tho, munniikoha akhala wira sooleiherya iyo sinimwiireya tthiri.

Wira mukhale a miruku muhikupaliki khula etthu eniiwa anyu. (Miruku 14:15) Okhala a miruku, onoowiirihani olikana ni atthu a oBereya wa khalai.a Okathi woopacerya yaalaleeriwe aya ihapari sooreera sa Omwene, awo yaaheemya moolumo yaiwale aya nuumala okhalana etthu yaakupaliha. Awo yaahitokosa Soolempwa ‘wira esuwele akhala wira itthu iyo sari s’ekekhai’. (Miteko 17:11) Niire so, atthu a oBereya yaahitokosa ihapari saiwale aya arumeelaka Nuulumo na Muluku. Nto eyo yaahaakupaliha wira itthu saiwale aya saari sekeekhai.

Anamoona a Yehova annoolattulani wira mpake etthu emosaru. Eprograma ahu yoomusoma Biibiliya ehiniliviwa etthu, enimookhaliheryani otokosa ele enikupali ahu sa Omwene wa Muluku ni ele Biibiliya enixuttiha awe.

Ohiya-vo, omusoma Biibiliya ni hiyo onimookhaliheryani ophwanya waakhuliwa wa makoho ootepa otthuneya a mookumini, ntoko ala:

• Hiyo ninkhuma woowi?

• Exeeni emwiirinhe Muluku opattuxa okumi?

• Xeeni Muluku onaahiya awe atthu ehaawaka?

• Exeeni enniiraneela wookhwaani?

• Niireke elapo enrowa opwetexiwa?

• Niireke ehaavo esiiri ya etthoko yoohakalala?

Nave-tho, omusoma Biibiliya onimookhaliheryani ‘omwattamela Muluku’. (Yakobo 4:8) Nto omwaattamela Muluku, onoowiirihani osuwela wira Omwene awe onoowerya wookhaliheryani nenna-va, ni mahiku otheene. Yesu aahinvekela Tiithi awe oriki: “Ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”.​—Yohani 17:3.

Anamoona a Yehova anoowerya orumeela eliivuru ela wira amusome Biibiliya ni nyuwo.

Wira nveke yoosoma ya Biibiliya ehiniliviwa etthu, munvekele Namoona a Yehova, wala mmalelihe olepa eformulaario ela va http://www.jw.org/vmw (Moone epaaxina yoopacerya epantte eni: NVEKELE YOOSOMA YA BIIBILIYA VOOHILIVA ETTHU)

[Enoota]

[Ekaaxa epaaxina 9]

Owo Onniphenta Vanceene Omwene wa Muluku

Mwa okathi vakhaani ovinre, mwaaruusi mmosa a iyaakha 10 oniihaniwa Folake, aahirummwa oxikola olepa mwaha waahimya so: “Ele Enikisivela Vanceene Molumwenkuni”. Folake aahithanla olepa voohimya sa nthowa naya owo onisiveliwa awe waalaleerya akina Omwene wa Muluku.

Folake aahitthokiherya oriki: “Omwene wa Muluku ti eguvernu yekeekhai. Masi Omwene owo khonooneya, hata mwaawaraka ookulu.

Folake aahilepa voohimya sa mareeliho a Omwene ni ele enilipelela awe woona muhoolo. Olavulaka sa mixankiho Omwene ola onrowa aya omaliha, aalempe so: “Miyo kinniriipiwa murima waaweha atthu ahirina ipa arupaka mphironi, ni anamwane anikhwa etala molumwenkuni”. Owo aahincererya oriki: “Masi-tho kinnihakalala vaavo kinimusomaka Yesaya 65:21”. Voohimya sa apinaatamu anrowa okhala vathi-va elamuleliwaka ni Omwene wa Muluku, eveersu ela enihimya so: “Atthu awo anrowa oteka ipa saya, ekhaleke memmo; anrowa ophatteya miri s’evidera, elyeke mihokorokho saya”.

Folake aahihimya-tho wira onnilipelela okathi Muluku onrowa aya omaliha iretta sotheene orumeelaka Omwene awe. Folake aahimuromola Wisupulula 21:4, yoowo onihimya wira Muluku “onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”. Folake aahimaliha mwaha awe oriki: “Etthu enikisivela vanceene molumwenkuni ti Yehova ni Omwene Awe”. Tthiri, mwaaruusi ola onniphenta vanci Omwene wa Muluku.