Awosa Yaahiivahererya ni Murima aya Wotheene Orowa oTaiwan

MWA iyaakha thanu sivinre, Choong Keon ni Julie, anamathelana yaawo nenna-va arina iyaakha 30, yaanivara muteko wa epioneero wookilaatheya oSydney wAustralia. Choong Keon, onihimya so: “Hiyo naanivara muteko wa mulaponi waanemererya okhala mapioneero, ni ekumi ahu yaari yoohakalala. Mapuro yaakhala ahu yaanoopa epheyo yooreera ni vaaninikhweyerya okhala. Vaaninisivela okhala vamosa naamusi waahela muhina apatthani”. Hata vaari siiso ehaavo etthu yaamuxankiha Choong Keon ni Julie. Yaari exeeni eyo? Awo yaanisuwela wira makhalelo aya yaaniweemererya wunnuuherya muteko yanvarela aya Yehova, masi khiyoona ovila opaka marukunuxo yaatthuneya wira akelele ohoolo.

Nto nuumala orowa owiriyana muthukumano muulupale a 2009, yaahiiwasa mwaha waavanre murima vanceene. Mulipa oolavula mwaha, aahilavula aaluluwanyaka atthu ale yaarina makhalelo yaaweemererya wunnuuherya muteko oninvarela aya Yehova. Owo aahimmye so: “Muupuwele ela: Mulipa oweettiha ekaaro onniwerya orukunuxa ekaaro awe oroihaka khula mpantta yakhala wira eyo eniira yeettaka. Vamosaru, Yesu onrowa onikhaliherya wunnuuherya muteko oninvarela ahu vakhala wira nnoopacerya weetta, eyo piiyo, vakhala wira hiyo nnimwiimananiha wira naakhwaniherye yoolakela ahu”.a Anamathelana ale yoona wira munna ole aahimya yaawo. Vamuthukumanoni muulupale vaavo aahikohiwa namathelana mmosa misionaario aarumeela oTaiwan. Awo yaahilavula voohimya sa ohakalala waaphwannya aya mwaha wa muteko yaavara aya ni yaahittittimiherya wira nlelo yaanitthuneya atthu akina wira yakhaliherye. Nto Choong Keon ni Julie, yoona wira yaahimmwa yaawosa.

Julie, onihimya wira: “Nuuvira muthukumano muulupale, hiyo naahinvekela Yehova wira onivahe olipa murima waatthuneya wira niwerye orowa oTaiwan”. Owo onnihimya-tho oriki: “Hata vaari siiso hiyo naanoovelela. Miyo koona wira eyo yaamulikana ni otuphela varattani voowiixerya ohinatoko okata”. Yoolepa yaakhaliherye “otuphela varattani” yaari Musuweli 11:4, yoowo oni: “Ole onlipelela okathi worerexa n’ipheyo yorerexa wira àle iphyó sawe, onnimalela ohàla etthu, nnákhala ohepha”. Choong Keon, onihimya so: “Hiyo naahilokiherya muupuwelo ahu wira ohiye ‘omakela weemela khiyawehexexa paahi’ nto khurowa opacerya ‘waala ni ohepha’”. Awo yaahipaka mavekelo manceene, yaahisoma sowiiraneya sa mamisionaario manceene, yaahaalepela ipaphelo anna anceene yaathaamenle oTaiwan, yaahitumiha ekaaro aya, ni iferemento sikina saari mpaani mwaya, nto khurowa oTaiwan muhina mwa myeeri miraru.

OPHWANYA OHAKALALA MWAHA WA MUTEKO WOOLALEERYA

Aakhala anna ni arokora anivikana 100 anikhuma ilapo soovirikana nenna-va anirumeela oTaiwan, vanceenexa mapuro yaale oothowa anamalaleerya. Anna awo akhumme elapo ya Austrália, Grã-Bretanha, oCanadá, oFrança, oJapão, oCoreia, wEspanha, wEstados Unidos, ni munnuwelo aya onikhuma 21 mpakha 73. Eriyari aya aakhala arokora oohitheliwa anivikana 50. Exeeni yaakhalihenrye anna ni arokora ala a nthiti orowa olaleeryaka elapo ekina? Nrowe niwehe.

Laura, ti murokora mmosa oohitheliwa okhumme oCanadá, yoowo onivara muteko wa opioneero mpantta onikhuma nsuwa wa oTaiwan. Masi owo mwa iyaakha 10 soovira, khiwaamusivela muteko wa olaleerya. Laura onnitthokiherya oriki: “Ekeekhai wira kaanirowa olaleerya, masi khiwaakisivela”. Nuuvira okathi, apatthani awe oCanadá yaahimulattula wira arowe yalaleeryeke oMéxico mweeri ntero. “Ole ti waari okathi woopacerya kaavanre aka tthiri muteko woolaleerya, nto okhuma vaavale muteko ole waahipacerya okisivela”!

Yowiiraneya eyo yoohakalaliha, yaahinvara murima Laura, onapacerya wuupuwela othaamela muloko waalavuliwa nttaava na elapo ekina, oCanadá. Owo aahipacerya wiixutta eChina, ni aanirumeela egrupu yaalavuliwa eChina, nto khupacerya okhalana yoolakela ya othaamela oTaiwan, nuumala khuthaamelaka mweeri wa Setembro 2008. Laura onihimya so: “Yaahivira eyaakha ntero kihilimalenle nipuro naakhala aka, masi vano hata otthikela oCanadá, nkinuupuwela”. Ankhi muteko woolaleerya onoonela sai? Owo onihimya so: “Owo ti wootteeliha murima. Khiivo-tho etthu ekina yoohakalaliha enivikana waaweha ale anaasomiha aka Biibiliya arukunuxaka ekumi aya wira amurumeeleke Yehova. Orumeela oTaiwan wookiphwanyiha eparakha yuulupale ya otteeliwa murima vanceene, mwaha wa muteko woolaleerya”.

OWANANA MUXANKIHO WA NTTAAVA

Nuumala namathelana mmosa oniireliwa Brian ni Michelle, yaawo arina iyaakha sinivikana 30, a wEstados Unidos othaamela oTaiwan iyaakha 8 sivinre, awo yaanoona wira khiyaakhaliherya vanceene muteko woolaleerya. Masi misionaario mmosa opacenrye khalai olaleerya aahimenrye so: “Hata nyuwo nweryaka onvaha mutthu etratato emosa paahi, muhaana wuupuwela wira eyo pooti okhala etratato yoopacerya mutthu aakhenle awe, enilavula sa Yehova. Mwa enamuna eyo, nyuwo munnikhaliherya vanceene muteko woolaleerya”! Masu ale oolipiha yaalavuliwe ni munna ole, yaahimukhaliherya vanceene Brian ni Michelle ohooceela muteko aya. Munna mukina aahimeeryale so: “Muheemererye opisa wanyu wiixutta nttaava na eChina wookhulumulakani, mmananiheke ovaha efaita ele eniwerya anyu opaka”. Tthiri awo yaahiixutta nttaava nne, ni olelo-va annivara muteko wa opioneero saana.

Etthu xeeni ekhanle owookhaliheryani wiixutta nttaava nikina? Mmananiheke oxukurya elapo eniphavela anyu orumeela. Murowele mithukumano, nvaaneleke ni anna ni arokora a mapuro awo, ni muroweke muteko woolaleerya. Brian onihimya so: “Okathi onrowa anyu owehaka wira atthu anceene sinnaasivela ihapari sa Omwene, ni woona moota anna ni arokora anrowa aya woophentani, eyo enoorowa owiirihani othaamela elapo ele, ni ophavela wiixutta nttaava na weiwo”.

MUTEKO WA MULAPONI WOOWIKHALIHERYANA

Anamunceene athaamenle mapuro oothowa anamalaleerya oTaiwan, anniwerya ophwanya musurukhu wowiikhaliheryana avaraka muteko wa osomiha Enkelexi. Kristin ni Michelle anitumiha ihopa. Kristin onitthokiherya so: “Miyo nkinavare muteko moota ola, masi owo onnikikhaliherya ovikaniha okhala elapo ela”. Nuuvira okathi, Kristin aahaaphwanya atthu yaamakela othuma ihopa sawe. Nto muteko ole onivara awe mwa okathi vakhaani khula nihiku, onnimukhaliherya ophwanya musurukhu woolya owo ni amwaarawe ni okhalana okathi munceene wa orowa olaleerya.

“MUTTEELIWEKE MURIMA NI MUTEKO ANYU”

William ni Jennifer, anamathelana anikhuma wEstados Unidos, olelo aniiriha iyaakha 7 aryeene oTaiwan. William onihimya so: “Wiixutta nttaava, ovara muteko wa opioneero, okhapelela muloko, ni waavya musurukhu okathi mukina itthu sookhulumula”. Masi exeeni yaakhalihenrye awo okhumela saana? Awo annimananiha okhalana soolukama sooreerela. Mwa ntakiheryo, mwaha woohikhalana soolukama suulupale sihiniwerya aya waakhwaniherya, voohimya sa wiixutta eChina, awo khakhulumunwe hata ahiwenrye wiixutta nttaava naananoru.

William onnimuupuwelela mutokweene mmosa a esirkwitu yoowo aamulenle so: “Mphwanyeke ohakalala mwaha wa muteko woolaleerya”. Emphavela otaphulela wira nakhalana yoolukama, nihaana otteeliwaka murima okathi nimpaka ahu khula nivalo wira niwerye waakhwaniherya. William onihimya wira, ottharihela miruku iya, waahimukhaliherya owo ni amwaarawe okhala oowaakuvela wiiwelela miruku sinivahiwa awe ni anna a mapuro ale, ni olokiherya enamuna aya ya opaka itthu wira akhumele saana muteko woolaleerya elapo ele. Owo onnihimya-tho so: “Eyo yaahinikhaliherya-tho hiyo, wuupuwela wira naahaana-tho waavya okathi wa orowa woona itthu soopattuxiwa sooreera, saakhanle esisiro ele yaathanleliwe ahu ovara muteko”.

Ntoko William ni Jennifer, Megan, pioneera mmosa oohitheliwa onikhuma wEstados Unidos, ‘onnihakalala wiivahererya wawe orowa olaleerya’, vaavo vaniira awe wiimananiha waakhwaniherya yoolakela awe ya olavula oratteene nttaava na eChina. Khula wuumalani wa esumana, owo onnirowa olaleerya muttetthe mmosa wooreera, eyo piiyo, eporto ya Kaohisiung, yeeyo eri yuulupale elapo ele ya oTaiwan. Megan onnitteeliwa murima mwaha woolaleeryaka khula pakiti ni olavulana alipa oototha ihopa a oBangladesh, wIndia, wIndonésia, oFilipina, oTailândia, ni oVanuatu. “Okhala wira alipa oototha ihopa anikhala okathi vakhaani oporto, hiyo naahaana opaceriha soosoma sa Biibiliya okathi ene yoole. Wira kiwerye waasomiha atthu otheene, kaahaana waathukumanya atthu axexe wala athanu, okathi omosa”. Ankhi eChina awe eri sai? Owo onihimya so: “Kaaniphavela wiixutta moowaakuveya, masi kinnivarihela muteko miruku kaavahiwe aka ni munna mmosa: ‘Mpakeke ele eniwerya anyu, nto mmuhiyeryeke Yehova wira omaliherye ele enoothowani’”.

NIPURO NOOVARELELEYA, NOOKHWEYA OKHALA NI NOOHAKALALIHA

Cathy, a oGrã-Bretanha, ohinatthi othaamela elapo ekina aapacenrye otokosa wira osuwele elapo xeeni yaarowa okhala yooreerela othaamela murokora oohitheliwa. Owo aahimuhimeerya Yehova muxankiho awe ni aahilepa ipaphelo oroihaka ifiliyaali sinceene, okohaka itthu saakhanle oomukumiherya ehasara murokora oohitheliwa. Nuumala-vo, owo aahisoma ipaphelo sotheene aakhenle awe ni aahoona wira oTaiwan naarowa okhala nipuro nooreerela orowa.

Mwaakha wa 2004, orineene iyaakha 31, Cathy aahithaamela oTaiwan, weiwo onikhala awe mwa enamuna yookhweiheriwa. Owo onihimya so: “Kahaakoha anna ni arokora wira akileele opuro wooreerela othuma itthu sa mmatta sookhuwala epereso. Malakiheryo yaakivanhe aya aakikhaliherya wuurela musurukhu aka”. Exeeni emukhalihenrye owerya makhalelo ale oohaattiheriwa itthu? Cathy onihimya so: “Ikwaha sinceene kinninvekela Yehova wira okikhaliherye okhala ootteeliwa murima ni yoolya yoohaattiheriwa itthu enilya aka, ni ikuwo soohiwalamela siniwara aka. Kinoona wira Yehova onnaakhula mavekelo aka okiixuttihaka osuwelexa ele enitthuna aka ni ohiphavela itthu sinceene”. Owo onnincererya-tho oriki: “Ennikisivela ekumi yoohattiheriwa itthu okhala wira ennikikhaliherya okhalela nthiti itthu sa Muluku”.

Ekumi ya Cathy ohiya okhala yookhweiheriwa paahi ti yoovara murima-tho. Owo onihimya so: “Vano kinnilaleerya muttetthe ori atthu anceene aneemererya ihapari sooreera. Tthiri eyo ennikiphwanyiha ohakalala wuulupale”! Okathi aaphiyale awe oTaiwan, saari miloko miili paahi saalavula eChina epooma yeele aalaleerya awe, masi olelo-va sookhala miloko siniphiyerya 7. Cathy onihimya so: “Woona ni maitho aka munnuwelo owo onikhumelela ni okhaliherya ovara muteko owo wa ohepha onniiriha ekumi aka okhala yoohakalaliha khula nihiku”!

“TTHIRI ANNA ALE YAANIPHAVELA NIKHALIHERYO NAHU!”

Mahiku ala sinimweettela sai itthu Choong Keon ni mwaarawe Julie, yaale aromoliwe wanipacerya iwe? Choong Keon wuupaceryani oona wira ohisuwela wawe eChina waanimwiiriha ohikhalana efaita yuulupale mmulokoni. Masi anna a elapo ele khiyaamoonela siiso. Choong Keon onihimya so: “Okathi muloko ahu waakawanyiwe awe, miyo kaahivahiwa miritti sinceene okhala wira kaari murummwa oorumeela. Okathi ole kaapacenrye aka woona wira tthiri mapuro ale yaahithowa anamalaleerya. Eyo yaari etthu yooreera”. Olavulaka moohakalala onihimya so: “Nto kaahoona wira anna ale yaaniphavela tthiri nikhaliheryo naka”! Olelo-va owo mutokweene a mmulokoni. Julie onihimya so: “Okhuma vaavale naahipacerya wiixoonela vatthu, ni naahikhala oohakalala ovikana khalai. Hiyo naarwenle okhaliherya, masi nikhaliheriwe ti hiyo okhala wira soonikhumelela itthu soohakalaliha. Hiyo ninnimuxukhuru vanceene Yehova yoowo oneemerenrye orwa orumeela elapo ela”!

Mapuro manceene a valaponi, nlelo annitthuneya anamuteko anceene wira yakhaliherye muteko wa ohepha mihokorokho sa omunepani. Niireke nyuwo mmalinhe niinaano osoma oxikola, nto muhinasuwela yoowiira mweekumini mwanyu? Niireke nyuwo mwa mutthu oohithela wala oohitheliwa oniphavela okhaliherya miteko sinivariwa ni nikhuuru na Yehova? Mwaaniphavela waahiyerya amusi anyu mihakhu sinceene sa omunepani? Niireke nyuwo mooreformari omutekoni nto mukhalana itthu sinceene sootthuneya sinireerela waaxuttiha atthu akina? Nto muhaana osuwela wira aakhala mareeliho manceene asukeriwe anyu, vakhala wira munimweemya wunnuuherya muteko oninvarela anyu Muluku muthaamelaka mapuro yaale ari oothowa anamalaleerya a Omwene wa Muluku.

[Enoota]