Niireke Nyuwo “Munnisuwela” Ele Enitaphulela Aya?

‘Vano, ahitthukula mupuwelo aya, wira esuwelexe Solempwa’.​—LUKA 24:45.

EXEENI ENNIIXUTTIHA AYA NLIKANYIHO NA  . . .

mulipa oowaala onrupa?

ntthavi ninriheliwa mphareya?

mwaana omuhin’ye tiithi awe?

1, 2. Moota xeeni Yesu aalipinhe awe awiixutti awe nihiku aahihimuxiwe awe?

NAARI nihiku nenne Yesu aahihimuxiwe awe. Awiixutti awe anli yaahivenya aneetta mukwaha wa ikiloomu 11,2 okhuma oYerusalemu. Mwaha woohisuwela wira Yesu aahihihimuxiwa nlelo yaari ooriipiwa murima mwaha wa itthu saakhumelenle mmuttettheni mwaya. Naananoru, aahikhumelela Yesu aneetta hoothe naawo. Nto owo aahaalipiha awiixutti awe ale. Moota xeeni? Biibiliya onihimya so: “Ahataphulela itthu samuhimya yowo mwa Solempwa sothene, okhuma ilívuru sa Moise ni sa maprofeta othene”. (Luka 24:13-15, 27) Okathi ole mirima saya saahipacerya waaviha okhala wira owo ‘anataphulela solempwa’.​—Luka 24:32.

² Emakaaripi yeele, awiixutti ale anli yaahitthikela oYerusalemu. Vaaphwanyale aya arummwa yaahaaleela ele yaakhumelenle. Nlelo awo alavulaka, Yesu aahikhumelela eriyari aya. Masi arummwa ale yaahituthuwa. Awo yaahipacerya ohoverya itthu sinceene vamurimani vaya. Nto Yesu aalipinhe sai awo? Hiyo ninnihimeeriwa wira: ‘Vano, ahitthukula mupuwelo aya, wira esuwelexe Solempwa’.​— Luka 24:45.

3. Mixankiho xeeni sikhanle ooniphwanya, ni exeeni enrowa onikhaliherya okhalana moonelo wooloka voohimya sa olaleerya?

³ Moolikana ni awiixutti ale, hiyo okathi mukina pooti oriipiwaka murima. Owehasa wene hiyo nihaatteliwa miteko sa Pwiya, masi khiyaripiwa murima okhala wira khasinikhumelela mireerelo sinceene ntoko naaphavela ahu. (1 aKor. 15:58) Wala pooti wiraka ale anaasomiha ahu Biibiliya khanirowa ohoolo moowaakuveya. Atthu akina anaasomiha ahu pooti omuhiyaka omutthara Yehova. Ninrowa opaka exeeni wira nikhalane moonelo wooloka voohimya sa muteko ahu woolaleerya? Etthu emosa ekhanle oonikhaliherya okhalana moonelo wooloka voohimya sa muteko ahu, wiiwexexa oratteene ele enitaphulela aya malikanyiho a Yesu ari mBiibiliyani. Vano nrowe nithokorerye malikanyiho mararu wira noone ele enniixuttiha aya.

MULIPA OWAALA ONRUPA

4. Nintaphulela exeeni nlikanyiho na Yesu voohimya sa mulipa oowaala onrupa?

⁴ Mmusome Marko 4:26-29. Nintaphulela exeeni nlikanyiho na mulipa owaala onrupa? Mulopwana onihimmwa nlikanyiho nla, onithoonyerya khula namalaleerya a Omwene. Epyo ti mitthaka sa Omwene yoowo onilaleeriwa atthu ale a murima saana. Ntoko siniiriwa aya okhala wene, mulipa oowaala ‘onirupa ohiyu, khiyavenya othana’. Wira ipyo sinnuwe vannivira okathi okhuma nihiku sinaaliwa aya, mpakha okathi woohepha. Okathi owo wotheene “epyó eyo ennimela, enninnuwa”. Wunnuwa iwo onniiraneya vakhaani-vakhaani “mwanene ole ahisuwelaka munnuwelo aya”. Vamosaru, munnuwelo wa omunepani onniiraneya mwa enamuna emosaru. Vaavo mutthu onirowa awe ohoolo omunepani mpakha othanla omurumeela Muluku, owo oniimiha mihokorokho okhala wira onnivahererya ekumi awe wa Yehova mpakha obatiziwa.

5. Exeeni yaamwiirinhe Yesu opaka nlikanyiho na mulipa oowaala onrupa?

⁵ Exeeni yaamwiirinhe Yesu ohimya nlikanyiho nla? Yesu aaphavela onikhaliherya osuwela wira Yehova toniiriha ekeekhai wunnuwa vamurimani va ale ‘aniphavela’ ekumi yoohimala. (Mit. 13:48; 1 aKor. 3:7) Hiyo nnoowerya waala ni okhuwari, masi khanniwerya wunnuwiha. Hiyo khanikhanle oomukhanyererya mutthu wunnuwa wala omwaakuviha. Moolikana ni mulopwana ole oromoliwe ni nlikanyiho nle, hiyo khannisuwela moota sininnuwa awe mutthu omunepani. Eyo enniiraneya okathi mukina hiyo nihiweryaka woona khula nihiku. Waphiya okathi aya ipyo sa Omwene sinniima mihokorokho. Nto ole onimwiixuttiha ahu onnikela muteko wa ohepha yoowo onivara ahu ni ninnittottela mureerelo nikhaliheryo nawe.​—Yoh. 4:36-38.

6. Etthu xeeni enireerela ahu osuwela voohimya sa munnuwelo wa omunepani wa atthu anaasomiha ahu Biibiliya?

⁶ Exeeni enniixuttiha aya nlikanyiho nla? Etthu yoopacerya enireerela ahu osuwela weemererya wira hiyo khanirina ikuru wala owerya wa omwiiriha ole onimusomiha ahu Biibiliya wunnuwa omunepani. Osuwela eyo onoonikhaliherya osyaka yoweeha ya waakhanyererya atthu anaasomiha ahu wira abatiziweke moowaakuveya. Hiyo nihaana opaka itthu sotheene siniwerya ahu wira nimukhaliherye mutthu owo, masi nisuwelaka wira yoothanla enilipa ni mwaneene yoowo. Wiivahererya wa Yehova ohaana okhuma vamurimani va mutthu otumereriwaka ni omphenta wawe Muluku. Etthu ekina yoovirikana ni eyo khenimusivela Muluku.​—Esal. 51:12; 54:8; 110:3.

7, 8. (a) Etthu xeeni ekina enniixuttiha aya nlikanyiho na Yesu voohimya sa mulipa oowaala onrupa? Nvahe ntakiheryo. (b) Exeeni nlikanyiho nla enniixuttiha aya voohimya sa Yehova ni Yesu?

⁷ Etthu yanenli, nihaana wiiwexexa wira etthu enniixuttiha aya nlikanyiho nla enrowa onikhaliherya ohikhala oovololiheya hata nihoonaka mireerelo sa muteko onivara ahu. Nihaana wiixutta opixa murima. (Yak. 5:7, 8) Hata epyo eyo ehiimaka, vakhala wira noopaka sothene siniwerya ahu wira nimukhaliherye mutthu owo, nisuweleke wira khula etthu enikhumelela khahiyo hiyo ninkumiherya. Yehova onneemererya ipyo iyo wunnuwa vamurimani va atthu yaale aniwoona awe wira animweemererya opaka mirukunuxo sinitthuneya. (Math. 13:23) Vano hiyo nihiphimeke okhumela saana wa muteko ahu niwehaka mireerelo sinikhumelela paahi. Mmoonelo wa Yehova okhumela saana wa muteko ahu koniphimmwa moovarihana ni atthu aniwerya ahu waakhaliherya wiixutta ekeekhai. Ohiya-vo, owo onnisiveliwa wiimananiha wahu moororomeleya hata sihikhumaka mireerelo sinceene.​—Mmusome Luka 10:17-20; 1 aKorinto 3:8.

⁸ Yaneeraru, khahiyo wira khula okathi ninniwerya woona mirukunuxo sinikhumelela vamurimani va mutthu. Mwa ntakiheryo, namathelana mmosa yoowo aasomihiwa Biibiliya ni misionaario, aahimwiitthana munna ole khwiira, hiyo nimphavela okhala anamalaleerya oohibatiziwa. Munna ole khwaakhula wira mwaaphavelaka okhala namalaleerya muhaana omuhiya ompaha soona. Anamathelana ale yaahaakhula wira awo yaahimuhiya ompaha soona myeeri sinceene nnaamwi munna ole ahaasuwela. Exeeni yaawiirinhe atthu ale opaka eyo? Okhala wira awo yaahisuwela wira Yehova aaniwoona awo ampahaka soona ni wira owo khonaaphavela anawiipake. Nto mirima saya saahiwiiriha opaka yoothanla ya ohiya omulya soona khuluwi. Omphenta waya Yehova waahiwiiriha opaka yoothanla yoolokexa. Awo yaahinnuwa hata misionaario ole ohisuwelaka wira saaniiraneya mirukunuxo mweekumini mwaya.

NTTHAVI NINRIHELIWA MPHAREYA

9. Nintaphulela exeeni nlikanyiho na ntthavi ninriheliwa mphareya?

⁹ Mmusome Matheyo 13:47-50. Nintaphulela exeeni nlikanyiho na Yesu voohimya sa ntthavi ninriheliwa mphareya? Yesu aahilikanyiha muteko woolaleerya mitthaka sa Omwene ni ntthavi nuulupale ninriheliwa mphareya. Ntoko siisaale ntthavi nle ninvara aya ihopa “sa khula muxovo” moohithanlela, muteko ahu woolaleerya onnaasivela atthu imilyau sinceene oovirikana. (Yes. 60:5) Mwaattelo wa atthu khula mwaakha anirwa owiriyana mithukumano sahu suulupale ni Niira na Wuupuwelela Okhwa wa Yesu yowooniherya yoowi eyo enniraneya. Anamunceene a ihopa iyo sa nlikanyiho ti “sorera” ni annithukumanyiwa mmulokoni wa eKristau. Akina annooniwa okhala “onanara” okhala wira khahiyo atthu otheene aneemereriwa ni Yehova.

10. Exeeni yaamwiirinhe Yesu ohimya nlikanyiho nla?

¹⁰ Exeeni yaamwiirinhe Yesu ohimya nlikanyiho nla? Ovalanyiwa wa nthoonyeryo wa ihopa iyo khonitaphulela ophukeliwa wookiserya okathi wa maxakha maalupale. Masi eyo enithoonyerya ele enirowa okhumelela wanikisa wa makhalelo ala ootakhala. Yesu aahooniherya wira khahiyo wira atthu otheene anisiveliwa ekeekhai anrowa omuroromela Yehova. Anamunceene aatoko orwa mithukumano sahu. Akina aatoko weemererya omusoma Biibiliya ni hiyo, masi khaniphavela omutthara Yehova. (1 Mam. 18:21) Aakhala akina akhumme mmulokoni mwa eKristau. Amiravo akina ahuuwale ni anamuyari aya ari maKristau ni hata vari siiso khanimphenta Yehova ni malamulo awe. Moohicikha etthu sa makhalelo a khula mutthu, Yesu aaphavela ottitimiherya wira khula mutthu ohaana opaka yoothanla awe. Eyo enoowiiriha awo wooniwaka okhala “mihakhu” wala itthu “sotthuneya” sa maloko otheene.​—Hag. 2:7.

11, 12. (a) Ninrowa ottottela sai mureerelo nlikanyiho voohimya sa ntthavi naariheliwe mphareya? (b) Exeeni enniixuttiha aya voohimya sa Yehova ni Yesu?

¹¹ Mureerelo xeeni onniphwanyiha aya nlikanyiho na ntthavi ninriheliwa mphareya? Wiiwexexa ele enniixuttiha aya nlikanyiho nla onoonikhaliherya osyaka ovololiheya vakhala wira mutthu onimusomiha ahu Biibiliya wala mwanihu khoniphavela weettela ekeekhai. Eyo pooti okhumelela hata nipakaka khula etthu eniwerya ahu wira nimukhaliherye. Waakhulela omusoma Biibiliya wala ohuuwa ni atthu aneettela ekeekhai khonitaphulela wira mutthu owo onrowa omphenta Muluku ni omurumeela Yehova. Tthiri ale ahiniphavela omwiwelela Yehova ni olamulelo awe khaniwerya okhala vamosa ni atthu a Muluku.

¹² Niireke eyo enihimya wira ale akhumme mmulokoni khanikhala-khala yeemereriwaka otthikela mmulokoni? Wala niireke ale ahinatthi wiivahererya wa Yehova okhala wene anirowa ohimmwaka okhala atthu “oohiloka”? Nnaari. Atthu awo aakhalana eparakha ya opacerya omurumeela Yehova ohinatthi ophiya okathi wa maxakha maalupale. Eyo enoolikana ni wiiwa nsu na Yehova niwiitthanaka atthu awo wira: “Muhokoloweleke wa miyo, ni miyo kinohokolowela wa nyuwo”. (Mal. 3:7) Eyo ennittittimiheriwa ni nlikanyiho nikina naalavuliwe ni Yesu, nle na mwaana aamuhin’ye tiithi awe.​—Mmusome Luka 15:11-32.

MWAANA OMUHIN’YE TIITHI AWE

13. Nintaphulela exeeni nlikanyiho na Yesu voohimya sa mwaana omuhin’ye tiithi awe?

¹³ Nintaphulela exeeni nlikanyiho na Yesu voohimya sa mwaana omuhin’ye tiithi awe? Tiithi ooreera murima onihimmwa nlikanyiho nla, onithoonyerya Tiithi ahu oophenta a wiirimu, Yehova. Mwaana ole oniveka muhakhu awe onarowa opwetexa, onithoonyerya atthu ale anikhuma mmulokoni. Mwaha wookhuma mmulokoni, anikhala ntoko aronwe “elapo y’ottaiwene”, eyo piiyo, olumwenku wa Satana, yoowo ori woorakamelana ni Yehova. (aÉf. 4:18; aKol. 1:21) Anamunceene wavira okathi annuupuwela anaweha wira vannireerela ohokolowa, nnaamwi vaxankihaka weetta atthikelaka munikhuuruni mwa Yehova. Atthu awo oowiiyeviha ni attharunwe mweettelo woohiloka annaakheliwa ni Tiithi ahu oophenta ni oolevelela, Yehova.​—Yes. 44:22; 1 Ped. 2:25.

14. Exeeni yaamwiirinhe Yesu opaka nlikanyiho nla?

¹⁴ Exeeni yaamwiirinhe Yesu opaka nlikanyiho nla? Mwa enamuna yoovara murima, Yesu aahooniherya moota Yehova oniphavela awe wira ale akhumme atthikele mmulokoni. Tiithi ole oniromoliwa ni nlikanyiho nla khaatonko omunyanyala mwanawe ni aaniwehererya wira aamutthika. Okathi waamoonale awe mwanawe ole otthikaka, nlelo oryeene “ottaiwene”, tiithi ole aahimutthimakela wira amwaakhelele. Eyo ennaatumererya tthiri ale ahiiye ekeekhai otthikela wa Yehova moohipisa! Woonasa wene awo tookhulumuwa omunepani waya ni ephiro anirowa aya oviraka ti yooxankiha vanceene. Masi wiimananiha waya onimwaakumiherya mireerelo ni onimwaatteeliha murima malaikha a wiirimu yatthikela mmulokoni.​—Luka 15:7.

15, 16. (a) Exeeni enniixuttiha aya nlikanyiho na Yesu voohimya sa mwaana aamuhin’ye tiithi awe? Nvahe matakiheryo vakhaani. (b) Eyo enniixuttiha exeeni voohimya sa Yehova ni Yesu?

¹⁵ Mureerelo xeeni onniphwanyiha aya nlikanyiho nla? Hiyo nihaana ottharihela ntakiheryo na Yehova. Hiyo nihikhala-khale niixoonaka okhala oofai waavikana ale anitthikela mmulokoni nikhoottaka owaakhela. Eyo yaarowa owiiriha awo ‘opweteya’. (Mus. 7:16) Yookhala-tho etthu ekina ekhanle ahu oowiixutta. Mutthu onihiya muloko ohaana wooniwaka ntoko ‘epwittipwitthi yoorimeela’ owo onlelo khopweten’ye. (Esal. 119:176) Niireke namphwanya mutthu ohiiye weetta ni muloko masi ohikumihiwe, ninnimukhaliherya ninvahaka malakiheryo ooloka wira aakuve otthika? Niireke ninnaaleela axitokweene wira amukhaliherye sinitthuneya aya? Hiyo nnoowerya opaka eyo vakhala wira nnoottharihela ele enniixuttiha aya nlikanyiho na Yesu voohimya sa mwaana aamuhin’ye tiithi awe.

¹⁶ Vano nrowe niwehe masu alavuliwe ni atthu yaale yaakhumme mmulokoni anixukhurela oreera murima wa Yehova ni nikhaliheryo avahiwe aya mmulokoni nuumala otthika. Munna mmosa yoowo aavirinhe iyaakha 25 okumihiwe ene onihimya so: “Otteeliwa waka murima onnincerereya khula nihiku okhuma vaavale vattikiheriwe aka mmulokoni okhala wira ‘Yehova ookilevelela itampi saka’. (Mit. 3:19) Khula mutthu mmulokoni onnikikhaliherya ni okiphenta! Miyo, vano koophwanya emusi yoohakalaliha ya omunepani”. Murokora mmosa mwali yoowo aamuhin’ye Yehova mwa okathi wa iyaakha 5 onnilavula sa otthikela wawe mmulokoni oriki: “Nkiniwerya otthokiherya moota soonenle aka okathi wooniheriwe aka niphento nenne naalavuliwe ni Yesu. Okhala munikhuuruni na Yehova ti wooreera ni nkinoona etthu ekina enilikana aya!”

17, 18. (a) Itthu xeeni soovareleya muteko siixuntte ahu mmalikanyiho ala athokorenrye ahu? (b) Vano yoolakela ahu piivi?

¹⁷ Tthiri malikanyiho ala mararu aaniixuttiha itthu sinceene! Yoopacerya, hiyo nihaana weemererya wira khanniwerya omwiiriha mutthu wunnuwa omunepani. Owo muteko wa mwaneene Yehova. Yanenli, mweekeekhai hiyo nihiwehereryeke wira khula mutthu onimusomiha ahu wala onirwa mithukumano sahu onoovarexexa ekeekhai. Yookiserya, hata atthu akina ahiyaka ekeekhai ni amureryaka ettuli Yehova, hiyo nihihiye waawehererya wira anootthika. Nto vakhala wira awo annitthika nrowe niwaakhele saana moovarihana ni moonelo wooloka wa Yehova.

¹⁸ Khula mmosa a hiyo ohaana ovikaniha ophavela okhala oosuwela, amiruku ni a ankhili. Okathi onisoma ahu malikanyiho a Yesu hiyo nihaana wiikohaka so: anitaphulela exeeni?, xeeni nihalaka olempwa mBiibiliyani?, ninrowa ovarihela sai muteko ele enniixuttiha aya?, ni exeeni enniixuttiha aya voohimya sa Yehova ni Yesu. Niira siiso nnimooniherya wira ninniiwexexa yootaphulela ya masu yaalavuliwe ni Yesu.