Munnuupuwela?
Niireke moosoma saana irevista sa naanano sa Owehaweha? Nanso moone vakhala wira munoowerya waakhula makoho ala anittharelana:
Ti vookhalela opaha murutthu wa muKristau?
Okhala wene opaha wala ohipaha murutthu yoothanla ya mutthu mwaneene. Nnaamwi Biibiliya ohihimyaka mooluluwanya mwaha ola, ti vooloka osuwela wira murutthu wa Mwene Sawuli ni wa mwanawe Yonathani saahipahiwa nuumala-vo khuvithiwaka makhuva ene. (1 Sam. 31:2, 8-13)—15/6, epaaxina 7.
Exeeni ennikupaliha wira khahiyo Muluku onikumiherya itthu sootakhala sinikhumelela?
Muluku iphiro sawe sotheene ti sa exariya. Toororomeleya ni khanoototha. Tthiri Yehova tookhupanyerya ni toosareya othunku (Otu. 32:4; Esal. 145:17; Yak. 5:11)—1/7, epaaxina 4.
Mixankiho xeeni sinimakela waakhumelela ale anithaama arowaka orumeela elapo ekina yoothowa anamalaleerya?
Tiiya miraru sinittharelana (1) moota atthu sinikhala aya (2) wunkheliwa owaani ni (3) moota woolimalelana ni anna a mapuro awo. Anamunceene aawerya oxintta mixankiho iyo ni areelihiwa vanceene.—15/7, ipaaxina 4- 5.
Exeeni yaawiirinhe annawe Yosefe omunyokha?
Mwaha wa etthu emosa, tiithi awe Yosefe Yakobe aanimpenta vanceene khumuttotthela nlaya nooreera. Nto eyo yaahiwiiriha annawe Yosefe omukhalela nrima khumutumiha wira akhale epottha.— 1/8, ipaaxina 11-13.
Exeeni eniiriha ifolyeeto isya okhala soowiiwanyeya ni sookhweya orumeela?
Mapakeliwo aya ifolyeeto iyo sotheene anoolikana. Khula efolyeeto ennikhaliherya osoma yoolepa emosa yoothanliwa saana ni enniruuha nikoho nikhanle ahu oomukoha mwaneene etthoko. Wa khula enamuna enaakhula awe hiyo nnoowerya ohula efolyeeto eyo ni omooniherya ele enihimya awe Biibiliya. Hiyo-tho nnoowerya omooniherya nikoho nikina ninrowa waakhuliwa mukwaha wootthikela oxekurya.—15/8, ipaaxina 13-14.
Exeeni ekhanle ePesito ya oSiria?
Esiria ti elavulelo emosa ya nttaava Aramaiko, nttaava naalavuliwa ilapo saalamuleliwa ni aPersa, yaanirumeeliwa vanci eseekulu 2 wala 3 EC. Vanikhala ntoko nlo ti nttaava noopacerya saalempwale aya Soolempwa sa eKristau sa eKriki. Biibiliya a oSiriya onisuweliwa okhala Biibiliya Pesito.— 1/9, ipaaxina 13-14.
Exeeni anamuyari maKristau anitthuneya aya opaka wira yaakukhule saana anaaya?
Anitthuneya waawiriyana anaaya wira yaasuwele. Wiimananiha wira yaalyihe yoolya ya omunepani. Waalakiherya moophenta, mwa ntakiheryo vaavo awo anooniherya aya wira khaniiwexexa ekeekhai.— 15/9, ipaaxina 18-21.
Itthu xeeni sihinirowa okhala Moomweneni wa Muluku?
Iretta, naakhwa, othowa wa muteko, ikhotto, othowa wa yoolya ni osikhini, itthu iyo sotheene sinrowa omala.—1/10, ipaaxina 6-7.
Nivarihano xeeni nri mBiibiliyani nniweemererya atthu akina orowa olamulela ni Kristu?
Nuumala okumiherya Niira na Yoolya ya Ohiyu y’Apwiya, Yesu aahipaka nivarihano ni arumeyi awe oororomeleya, nenlo ikwaha sinceene nnihimmwa okhala wataana wa Omwene. (Mmusome Luka 22:28-30.) Wataana nno waari yoororomeliha yoowi awo yaarowa olamulelaka ni Yesu wiirimu.—15/10, ipaaxina 16-17.
Muhimye matakiheryo manli ari mBiibiliyani anooniherya wira Satana ookhala tthiri.
Soolepa sinnihimya tthiri wira Satana aahilavula ni Yesu okathi aamananiha awe omweehererya wira omuhiye Muluku. Nave okathi wa Yobi Satana aahilavula ni Muluku. Soolepa iyo sinnooniherya tthiri wira Satana ookhala.—1/11, ipaaxina 4-5.
Ti pani akhanle “nloko naìhaneliwa nsina nawe” naahimya awe Yakobo, nilempwale eliivuru ya Miteko 15:14?
Atthu ale yaitthaneliwa nsina na Yehova yaaheliwa muhina aYuda ni amalapo oowaamini, yaawo Muluku aathanlale awe wira alaleye “orera wawe murima”, Muluku yoowo owiitthanne. (1 Ped. 2:9, 10)— 15/11, ipaaxina 24-25.
Waaphwanyaneya woowi muttetthe wa Timgad, atthu akina a muttetthe ole yaarina moonelo xeeni?
Timgad waari muttetthe mmosa muulupale wa epooma ya oRoma mpantta onikela epheyo wa Afrika (yoowo olelo-va oniireliwa Algéria). Alipa anithipa milepe sa khalai yaahiphwanya masu yaalempwale etthu yaasivela atthu a muttetthe ole, yaawo ani: “ Oxaya, Orapa, Othweela ni Otheya, Tekhanle Ekumi Yooloka!”. Moonelo owo onoolikana ni ole onihimmwa va 1 aKorinto 15:32.— 1/12, ipaaxina 8-10