Niireke Vannireerela Ophavelasa Ottottopeliwa ni Apinaatamu?
BESALELI ni Oholiyabi yaahilimalela muteko wooteka. Okathi waryaaya ipottha wEjiitu, awo yaahipaka ixixolo sinceene yahaawerya aya okontari. Masi okathi owo waahivira. Vano awo yaarowa okhala alipa-ooratta a vasuluxa okhala wira yaarummwale ohoolela muteko wa omuteka tabernaakulu. (Okhum. 31:1-11) Hata vaari siiso, atthu vakhaani paahi tiyaarowa owerya woona miteko yaarowa aya opaka arumeelaka maluku oowaarya. Niireke mwaha wa ohiwehiwa ni atthu anceene itthu iyo waarowa waakhulumula? Niireke vannireerela ophavela wira muteko ahu wooniweke ni atthu anceene? Niireke vannireerela ophavelasa ottottopeliwa ni apinaatamu?
MITEKO SOOTEPEXA OREERA SOONIWE NI ATTHU VAKHAANI PAAHI
Mireerelo sikina saari mutabernaakulu saari sooreera vanceene. Mwa ntakiheryo, nkahaya nwuupuwele makerubi ale a eweero yaari vasulu va nivuku na wataana. Murummwa Paulo aahaahimya awo okhala “òvuwa”. (aHéb. 9:5) Nkahaya mmananihe wuupuwelela oreera waya malaikha ale yaahaniwe ni enyuttu [maritela]!—Okhum. 37:7-9.
Vaakhanle wira itthu saapanke awe Besaleli ni Oholiyabi soophwanyiwa olelo-va, saamureerela oheliwa mmuseu muulupalexa wa valaponi wira sooniweke ni atthu anceenexa. Masi okathi saahaniwa aya, atthu akavi yaawenrye woona itthu iye sooreerexa? Makerubi ale yaakhala nipuro Nowaaryexa na empa ya Muluku, nto aawerya woona aari namukuttho muulupale yoowo aakela nipuro nle ekwaha emosa vamwaakhani, Nihiku na Ovekela Oleveleliwa Itampi. (aHéb. 9:6, 7) Tthiri yaari atthu vakhaani yaawenrye woona itthu iye.
OTTEELIWA MURIMA HATA NIHITTOTTOPELIWAKA NI ATTHU
Vaakhanle wira nyuwo mwa Besaleli wala Oholiyabi nto mpaka itthu iya sooreerexa, masi khisuwela wira saarowa wooniwaka ni atthu vakhaani paahi, mwaarowa woonela sai? Olelo-va atthu annitteliwa murima vaavo vanittottopeliwa aya ni ovuwihiwa ni akina mwaha wa etthu enivara aya. Awo annirumeela eyo wira aphime efaita erina aya muteko onivara aya. Masi arumeyi a Yehova toovirikana. Moolikana ni Besaleli ni Oholiyabi, hiyo ninnitteeliwa murima vaavo vanivara ahu muteko wa Yehova nisuwelaka wira owo onniniphenta.
Mahiku a Yesu, amahoolela a etiini anceene yaanipaka mavekelo aphavelaka ottottopeliwa ni akina. Masi, Yesu aahiixuttiha enamuna emosa ya ovekela ni murima wotheene ni ohiphavelaka wira wooniwe ni akina. Eyo enikumiherya exeeni? “Atith’inyu, anòna sinìranyu ni mwitiho, animotthuvelani”. (Math. 6:5, 6) Mowiiwanyeya saana, etthu yuulupale khahiyo ele atthu enuupuwela aya voohimya sa mavekelo ahu, masi muupuwelo wa Yehova ti muulupale. Muupuwelo awe toniiriha mavekelo ahu okhalana efaita. Eyo ennivareleya-tho muteko okathi onivara ahu muteko wa Muluku. Owo khonlipa ni ottottopeliwa wahu ni atthu; masi ohaana omutteeliha murima Yehova yoowo ‘onòna sinìranyu ni mwitiho’.
Nuumala otekiwa tabernaakulu, “neku nahikhunela ehema y’okumana n’Apwiya; ovuwa w’Apwiya wahisareya muhemani memmo”. (Okhum. 40:34) Tthiri Yehova aahooniherya osiveliwa wawe ni empa ele! Munoona wira Besaleli ni Oholiyabi yoonenle sai okathi owo? Nnaamwi nsina naya nahaalempwale vasulu va itthu iye yaapanke aya, woonasa wene awo yaahitteeliwa murima mwaha wa osuwela wira Muluku aahireeliha wiimananiha waya. (Mir. 10:22) Iyaakha sinceene muhoolo mwaya nlelo murima wanaatteela vaavo yoona aya wira itthu iye yaapanke aya saanirumeeliwa mmutekoni wa Yehova. Okathi awo anrowa aya ohihimuxiwa elapo esya, Besaleli ni Oholiyabi moohaaniherya anrowa otteeliwa murima mwaha wa osuwela wira tabernaakulu ole aahirumeeliwa mmureerelo wa okokhorela wekeekhai mwa iyaakha 500!
Mootthokeyani mwa Yehova olelo-va, aakhala ale anipaka iviidiyu sa anamwane, aratti oovirikana, alipa anoopa isipo, anilatha ifootu, anamataphulela ni ale oolepa anivara muteko ahiwehiwaka ni atthu anceene. Mwa enamuna eyo vanikhala ntoko khuuvo “onoona” ele enivara aya. Etthu emosaru ennikhumelela ni muteko munceene onivariwa mmilokoni sinivikana 110.000 olumwenku wotheene. Ti pani onisuwela ele eniheliwa muhina mwa opaka ikontha sa mmulokoni ni ipaphelo sikina sinilempwa khula mweeri? Ti pani onimoona mulipa-oolepa a mmulokoni okathi onipaka awe erelatoorio ya muteko woolaleerya? Ti pani oniwoona anna ni arokora anilokiherya Ipa sa Omwene?
Wuukiseryani wa ekumi aya, Besaleli ni Oholiyabi khiyaakhenle itthuvo, ikhara sa nttittimiho wala olempwa nsina naya vanipaweni mwaha wa itthu iye sooreerexa yaapanke aya. Masi awo yaahiphwanya etthu yootepexa okhalana efaita, eyo piiyo, ophentiwa ni Yehova. Hiyo nihaana okupaleela wira Yehova aanoona muteko yaavanre aya. Nihaana otthara ntakiheryo naya na wiiyeviha ni ovara muteko ni wiivahererya.