Muroromeleke Omwene wa Muluku

“Awo khahiyó a vathí-va”.​—YOH. 17:16.

ISIPO: 63, 129

MUNOOWERYA WAAKHULA?

Xeeni Yesu ahiirenle awe mpantta manyaku-nyaku a olumwenku ola?

Myaha xeeni maKristau anitthuneya aya wiiwanyeiha oratteene yoothanla aya?

Munrowa wiixutta sai oororomela Omwene wa Yehova?

1, 2. (a) Nthowa xeeni varyaaya vootthuneya maKristau okhala oororomeleya wa Muluku, nto eyo enivarihana sai ni ohiirela mpantta myaha sa mulaponi? (Nwehe elatarato yoopacerya.) (b) Itthu xeeni anamunceene anikhaliherya aya, nto iyo sinikumiherya exeeni?

OROROMELEYA ni ohiirela mpantta myaha sa mulaponi etthu enaaxankiha maKristau khula okathi, hata ohikhalaka okathi wa ekhotto. Nthowa xeeni? Nthowa noowi atthu otheene yaale yiivaherenrye wa Yehova aamuleiherya wira anrowa omphentaka, ororomeleya wa yena ni omwiiwelela. (1 Yoh. 5:3) Hiyo nimphavela ovarexexa malamulo a exariya a Muluku moohicikha etthu sa mapuro anikhala ahu, mahuweliwo, elapo ahu, wala soolema sahu. Omuroromela wahu Yehova ni Omwene awe onnivikana khula etthu ennisivela erina ahu. (Math. 6:33) Ororomeleya moota owo onivekela wira maKristau ahiireleke mpantta ikhotto ni manyaku-nyaku a olumwenku ola.​—Yes. 2:4; mmusome Yohani 17:11, 15, 16.

² Atthu ale ahirina ahu muupuwelelo mmosaru, woonasa wene annikhaliherya vanceenexa elapo aya, nloko naya, wala soolema saya hata axooku aniiriwa ni ikiipa sa elapo aya. Ovaanyihana wa atthu mmyaha iyo wookumiherya oxinttana, owana-wana, ni akina aatepiherya mpakha wiivanana ni onyokhaniwa mwaha wa ovirikana wa nikhuli. Enamuna atthu awo aniphuka aya myaha iyo, hata vakhalaka vamurettele wala vakhotto, pooti oniphwanya hiyo wala amusi ahu okhala wira hiyo nave na atthu anikhala mulaponi muumu. Okhala wira Muluku aapattunxe apinaatamu ni osuwela ele eri ya exariya, nto soothanla sinipakiwa ni apinaatamu anilamulela pooti onoonihaka owereya mwaha wa osuwela wira ele anipaka aya khahiyo ya xariya. (Maph. 1:27; Otum. 32:4) Nto ninrowa opakaka exeeni sakhumelela itthu moota owo? Ti vookhweya mutthu oheliwa mpuuryani nto khiyiirela mpantta manyaku-nyaku a olumwenku ola.

3, 4. (a) Xeeni maKristau ahiniirela aya mpantta manyaku-nyaku a olumwenku ola? (b) Ninrowa othokorerya exeeni muru ola?

³ Mitthenkeso sinaalamulela apinaatamu sinnaakhanyererya atthu a elapo aya wiirela mpantta manyaku-nyaku anikhumelela. MaKristau khaneemererya opaka eyo. Hiyo khannirela mpantta owana-wana wa anapoliitika a olumwenku ola; wala khinnikela etoropa. (Math. 26:52) Hiyo khanniwokiwa ni wiimananiha wa atthu awo wira nikhaliheryeke mpantta mmosa wa olumwenku wa Satana. (2 aKor. 2:11) Vaavo vahiniirela ahu mpantta olumwenku ola, ninnaavirikanya ale aniwana-wana.​—Mmusome Yohani 15:18, 19.

⁴ Mwaha wa ohimalela wahu, woonasa wene akina a hiyo anniwanana makhalelo ni muupuwelelo aya woohiloka wa khalai. (Yer. 17:9; aÉf. 4:22-24) Muru ola onrowa othokorerya malakiheryo anrowa onikhaliherya oxintta makhalelo awo. Ninrowa othokorerya-tho moota woolokiherya muupuwelo ni yowuupuxerya ya murima ahu wira niroromeleke Omwene wa Muluku.

XEENI VAHINIIRELA AHU MPANTTA MYAHA SA MULAPONI?

5, 6. Yesu oonela sai ohiiwanana wa atthu yaakhalana awe, nto nthowa xeeni?

⁵ Vakhala wira ennikhumelela etthu eniwiirihani ohisuwela yoopaka, vaamureerela wiikoha so, ‘Yesu aarowa opaka exeeni?’ Nloko naakhala awe Yesu yaahikhala atthu yaakhuma mittetthe sinceene, ntoko oYudeya, oGalileya, oSamariya ni sikina. Biibiliya onnihimya wira atthu awo yaaniwana-wana mwaha wa okhala a mittetthe soovirikana. (Yoh. 4:9) Afarisi ni aSaduki khiyaiwanana. (Mit. 23:6-9), atthu pure khiyaiwanana ni alipa-ooliviha mpoosito (Math. 9:11); ni waahikhala ohiiwanana eriyari ya atthu yaasomihiwe ni maRabino ni ale yaahaasomihiwe. (Yoh. 7:49) Eseekulu yoopacerya, aIsarayeli yaalamuleliwa ni aRoma, yaawo yaanyoonyiha atthu yaakhala muttetthe ole. Nnaamwi Yesu aakiherya ekeekhai ni eemererya wira woopowa waakhuma ni aYuda, owo khaatonko waatumererya awiixutti awe wiikeliha mpuuryani mwa ikhotto sa mahiku ale. (Yoh. 4:22) Ohiya-vo, owo ahaatumererya awiixutti awe wira yaaphenteke atthu otheene ntoko anamwaattamanani aya.​—Luka 10:27.

⁶ Xeeni Yesu ahaakhaliherya awe nthalu nuulupale naarina aya aYuda? Mwaha woowi owo ni Tiithi awe khaniirela mpantta manyaku-nyaku a olumwenku ola. Okathi yoole Yehova ni Mwanawe yampattunxe aya mulopwana ni muthiyana, yoolakela aya yaari waasarya atthu elapo ela. (Maph. 1:27, 28) Muluku aahaapattuxa apinaatamu ni owerya wa waayara atthu a makhuli oovirikana. Khanivo nikhuli, elapo, wala elavulelo Yehova ni Yesu enoona aya wira ti yuulupale ovikana ekhwaaya. (Mit. 10:34, 35; Wis. 7:9, 13, 14) Hiyo nihaana ottharihela ntakiheryo naya noolokexa.​—Math. 5:43-48.

7, 8. (a) Mwaha xeeni maKristau anitumereriwa aya wiirela mpantta? (b) Exeeni Anamoona anisuwela aya voohimya sa omananiha ophuka mixankiho sa epoliitika ni sa makhalelo a atthu mmawaani?

⁷ Wookhala mwaha onitthuneya ahu wiirela mpantta, eyo piiyo, okhaliherya okhulupale ni olamulela wa Yehova. Muxankiho ola waapacenrye wEdeni vaavale Satana aakhoottale awe olamulelo wa Yehova. Vano, khula mutthu ohaana othanla vakhala wira enamuna Muluku onipaka awe itthu teri yooloka ovikana enamuna ya Satana wala vakhala wira otheene anoolikana. Niireke nyuwo munnikhaliherya mpantta wa Yehova ni murima anyu wotheene mooniheryaka wiiwelela malamulo ni malakiheryo awe ohiya opakaka itthu muttharihelaka muupuwelo anyu paahi? Niireke nyuwo munnoona Omwene wa Muluku okhala tonrowa omaliha mixankiho sotheene sa apinaatamu? Wala nyuwo munoona wira apinaatamu anoowerya wiilamulela mmansaya?​—Maph. 3:4, 5.

⁸ Waakhula wanyu makoho ala tonrowa wooniherya moota sinaakhula anyu okathi onikohiwa anyu moonelo anyu voohimya sa manyaku-nyaku a mulaponi. Anapoliitika, atthu oowiivahererya ni ale aniphavelasa makhalelo ooloka a atthu mmawaani, okhuma khalai anniimananiha ophuka mixankiho sinikumiherya ohiiwanana. Woonasa wene wiimananiha waya ti wa ekeekhai ni wooloka. Masi, Anamoona annisuwela wira Omwene wa Muluku paahi tonrowa omaliha mixankiho sa apinaatamu ni okumiherya exariya ya ekeekhai. Hiyo nihaana omuhiyerya Yehova mwaha owo. Tthiri vaakhanle wira khula Kristau onnimananiha ophuka muxankiho ola orumeelaka enamuna enoona awe okhala yoolokexa, nto khamunoona wira waamukhumelela ohiiwanana mmulokoni?

9. Muxankiho xeeni waakhumelenle mmulokoni eseekulu yoopacerya oKorinto, masi malakiheryo xeeni yaavahiwe ni murummwa Paulo yaakhaliherye ophuka?

⁹ Nrowe niwehe moota maKristau makina a eseekulu yoopacerya yaaphunke aya mwaha waakumiherya okawanyeya atthu mmulokoni. Aakhala atthu oKorinto yaahimya so: “‘Miyo kinimutthara Paulo’. Mukina onihimya wira: ‘Miyo kinimutthara Apolo’. Mukina onihimya wira: ‘Miyo kinimutthara Pedru’. Mukina-tho onihimya wira: ‘Miyo kinimutthara Kristu’”. Tthiri mwaha ole waahimuxankiha murummwa Paulo okhala wira khaasuwela ele yaarowa okhumelela mmulokoni. Owo aakonhe so: “Munona wira Kristu t’òkawanyeya?”. Nto waarowa omalihiwa sai muupuwelo ole woohiloka? Paulo aahaalopola maKristau ale oriki: “Axinn’aka! Kinnotumereryani ni nsina na Yesu Kristu, Pwiy’ahu, wira mwìwananeke. Ohikhalé okawanyeya eriyari anyu. Mwìwananeke vomalela ni murima mmosá ni mupuwelo mmosaru”. Tivonto vahinireerela aya okhumelela okawanyeya wa khula enamuna mmulokoni wa eKristau olelo-va.​—1 aKor. 1:10-13; mmusome aRoma 16:17, 18.

10. Nlikanyiho xeeni murummwa Paulo aarumenle awe wira wooniherye otthuneya waya maKristau wiivalaanya ni manyaku-nyaku a mulaponi?

¹⁰ Paulo ahaatumererya maKristau ale oowoottihiwa wira awehexexeke nlipelelo naya na orowa okhala wiirimu ohiya itthu sa valaponi. (aFil. 3:17-20)a Awo yaahaana opaka itthu ntoko anamuhupi animuranttela Kristu. Anamuhupi khanikhaliherya ophuka myaha sa elapo erummwale aya. Awo anikhaliherya elapo yeele yaarumme. (2 aKor. 5:20) MaKristau arina nlipelelo na okhala valaponi, naawo nave atthu a Moomweneni wa Muluku, nto khivanireerela wiirela mpantta manyaku-nyaku anikhumelela elapo ela.

MWIIMANANIHE OMUROROMELA YEHOVA

11, 12. (a) Makhalelo xeeni aniwerya omoceeliha Kristau ororomela Omwene wa Muluku? (b) Muxankiho xeeni aarina awe murokora mmosa, nto oxinttale sai?

¹¹ Mapuro manceene mulaponi, maloko anniiraana mwaha wa sowiiraneya sa elapo aya, soolema saya ni nttaava, nto itthu iyo sinniwiiriha atthu awo wiikukumiha. Mmakhalelo awo, maKristau anitthuneya olokiherya muupuwelo aya ni yowuupuxerya aya ya murima wira asuweleke waakhula sakhumelela myaha sihinivarihana ni eKristau ya ekeekhai. Awo anrowa opaka sai eyo?

¹² Mwa ntakiheryo, nwehe yowiiraneya ya Mirjetab a muttetthe wa ex-Iugoslávia. Owo ainuwa wiixuttihiwaka waanyokha atthu a oSérvia. Nuumala osuwela wira Yehova khonaathanya atthu ni wira Satana tonikumiherya mixankiho sa onyokhaniwa mwaha wa ovirikana nloko, owo aahipacerya okumiha mmuupuweloni mwawe waathanya atthu mwaha wa ovirikana nloko. Masi wookhala okathi onyokhana iwe mwaha wa nloko waapacenrye aya otthikela vamurimani vawe, Mirjeta aanoona okhala voovila waalaleerya atthu a oSérvia. Owo aahisuwela wira ahaana opaka etthu wira okumihe muupuwelo ole woohiloka mmuruni mwawe ni wira owo khaarowa omala-mala mekhawe. Owo aahimuxonttela Yehova ohiya paahi wira ovikane muxankiho ole masi wira wuncererye muteko awe okhalaka pioneera. Owo onihimya so: “Kihoona wira okhalela nthiti muteko woolaleerya tokikhalihenrye vanceene. Okathi waalaleerya aka kaaniimananiha otakiha ophenta wa Yehova, nto kaahoona muupuwelo ole woohiloka okhumaka mmuruni mwaka”.

13. (a) Mukhalelo xeeni waamunyoonya Namoona mmosa, masi aaphunke sai? (b) Enniixuttiha exeeni yowiiraneya ya Zoila?

¹³ Muthokorerye-tho ntakiheryo na Zoila. Owo oyariwe oMexico, vano onirumeela muloko mmosa wa wEuropa. Owo ahoona wira mmulokoni yaahikhala anna a mpantta wAmerica Latina yaawo yaalavula moomuramusa owo ni makhalelo makina a elapo awe, ohela muhina soolema ni isipo. Nyuwo mwaarowa opaka exeeni? Ekeekhai wira ilavulelo iye saahimuriipiha murima Zoila. Masi mwa enamuna yoottottopeleya, owo aahimuxonttela Yehova wira omukhaliherye ohipaka etthu yoohireerela. Ninnaamini wira eriyari ahu aakhala nlelo atthu anivikaniha ohaawa ni mwaha woolikana ni owo. Hiyo nihikhala-khale nipakaka wala olavula etthu yaarowa okumiherya ohiiwanana mmulokoni aahiiso owiiriha anna opaceryaka okhaliherya etthu, mutthu wala mwaha woohireerela.​—aRom. 14:19; 2 aKor. 6:3.

14. MaKristau anrowa wiiniha sai nikuruta muupuwelo aya ni yowuupuxerya ya murima wira akhale ororomeleya?

¹⁴ Niireke nyuwo munnunwe wala mootoko wiixuttihiwa wira elapo anyu wala muttetthe oyariwe anyu ti woofayi ovikana sikina? Niireke yookhala etthu eri vamurimani vanyu nlelo eniwuupuxeryani itthu iyo? MaKristau aheemereryeke wira ovirikana elapo owiiriheke ohiwoona saana atthu akina. Masi munrowa opaka exeeni vakhala wira muhoona wira mookhalana muupuwelo woohiloka voohimya sa nloko, soolema, elavulelo wala nikhuli na mutthu? Tthiri vaamureerela wuupuwelela moota Yehova onoonela awe ovirikana wa ilapo ni othanyiwa wa atthu mwaha wa nikhuli naya. Otokosa saana mwaha ola ni iye sinivarihana awe okathi wa omulompa Muluku vatthokoni onimookhaliheryani. Nuumala-vo mmuxontteleke Yehova wira wookhaliheryeni oxintta muxankiho owo.​—Mmusome aRoma 12:2.

15, 16. (a) Moonelo xeeni onisuwela ahu wira atthu anookhalana mwaha wa omuroromela wahu Muluku? (b) Moota xeeni anamuyari anrowa aya waakhaliherya anaaya ovikana muxankiho wa maKristau ohiirelaka mpantta myaha sa elapo?

¹⁵ Naanano-va wala muhoolo, khula mmosa a arumeyi a Yehova anoomukhumelela makhalelo anrowa otumererya yowuupuxerya ya murima awe okhala oovirikana ni atthu amwaattamenle ntoko apatthani a omutekoni, oxikola, anamwaattamanani, amusi ni atthu akina. (1 Ped. 2:19) Tthiri okathi siisa onivekela wiilipiha! Khannitthuneya otukutheya vakhala wira ninninyokhiwa mwaha wa yoothanla epanke ahu; okhala wira Yesu aahihimya vahinatthi wira eyo yamukhumelela. Anamavaanyiha anceene khanoona efaita erina aya omuroromela Muluku. Masi hiyo ninnitepa ovaha efaita ororomeleya wahu wa Yehova.

¹⁶ Omuroromela Yehova onivekela ohittikinyeya okathi wa mixankiho. (Dan. 3:16-18) Owoova apinaatamu onnaakhumelela atthu a khula enamuna, masi amiravo vannitepa waavila oxintta muxankiho owo. Vakhala wira aniinyu anniwanana muxankiho ntoko wuntela epantera, wala niira nikina na mulaponi, muhoolowele waakhaliherya. Murumeele okathi wa omulompa Muluku vatthokoni wira mwaakhaliherye aniinyu wiiwexexa myaha iyo ni mwaalakiherye moota woowanana ni olipa murima. Mwaakhaliherye awo osuwela otthokiherya ele enikupali aya mowiiwanyeya ni moottittimiha. (aRom. 1:16) Wira mwaakhweiherye aniinyu, mpaceryeke olavula ni maprisoori aya myaha iyo vaaweryaneyaka.

NVAHEKE EFAITA SOOPATTUXIWA SOTHEENE SA YEHOVA!

17. Muupuwelelo xeeni onitthuneya ahu osyaka ni nthowa xeeni?

¹⁷ Ekeekhai wira khahiyo vootthekeya osiveliwa elapo ahu, elavulelo, ni eyoolya enilyiwa elapo eyariwe ahu. Masi nihaana osyaka wuupuwelaka wira “ele eri yawaka ti yoolokexa”. Yehova oopattuxa itthu soovirikana wira nipuheke. (Esal. 104:24; Wis. 4:11) Nto xeeni okhanyereryaka ohimya wira enamuna emosa ya opaka itthu ti yoolokexa ovikana ekina?

18. Moota xeeni okhalana moonelo wa Yehova onrowa aya okumiherya mareeliho?

¹⁸ Muluku oniphavela wira atthu a khula makhalelo yiixutte ekeekhai ni aphwanye ekumi yoohimala. (Yoh. 3:16; 1 Tim. 2:3, 4) Okhalana moonelo wooloka ni weemererya miyuupuwelelo soovirikana sooloka onooniiriha okhalana ankhili ni onnikumiherya wiiraana mmulokoni wa eKristau. Vakhala wira hiyo nimphavela omuroromela Yehova, nto nisyakeke wiikeliha mmayanyaku-nyakuni a elapo ela. Miyuupuwelelo sa epoliitika khasirina opuro mmulokoni. Tthiri ninnimuxukhuru vanceenexa Yehova mwaha wa onoopola olumwenku ola wa Satana wookawanyeya, wowiixinnuuha, ni oxinttaniwa! Nto yoolakela ahu ekhale ele ya okhalana muupuwelo wa murettele woolikana ni ole onihimmwa ni nasaalimo yoowo oni: “Mòne: ti yorera ni ti yosivela tthiri wira amusi ekhaleke vamosá!”​—Esal. 133:1.

[Inoota]