Nla Nipuro Nahu na Okokhorela

“Ophenta waka emp’anyu onokilaliha”.​—YOH. 2:17.

ISIPO: 127, 118

MWAAROWA WAAKHULA SAI?

Ninrowa wooniherya sai nttittimiho nooreerela mithukumano sahu sa eKristau?

Vaniweryaneya sai otekiwa Ipa sa Omwene isya sinitthuneya?

Xeeni varyaaya vootthuneya orattela ni olokiherya Empa ya Omwene?

1, 2. (a) Mapuro xeeni a okokhorela arumeyi a Yehova yaarumeela aya khalai? (b) Yesu oonela sai etemplo ya Muluku yaari oYerusalemu? (c) Yoolakela ya muru ola tiivi?

OKHUMA khalai, atthu a Muluku yaanikhalana mapuro aya oothanliwa a okokhorela wekeekhai. Woonasa wene Abeli aahimurumeela altari okathi anvanhe awe Muluku mukuttho woopahiwa. (Maph. 4:3, 4) Nowe, Abrahamu, Yakobo ni Moise otheene aya yahaateka altari. (Maph. 8:20; 12:7; 26:25; 35:1; Okhum. 17:15) Alakiheriwaka ni Yehova, aIsarayeli yaahimuteka tabernaakulu. (Okhum. 25:8) Muhoolo mwaya, awo yaahiteka etemplo yaakokhoreliwa Yehova. (1 Mam. 8:27, 29) Nuumala otthika weepotthani oBabilonia, aYuda yaanithukumana mmasinagogani. (Mar. 6:2; Yoh. 18:20; Mit. 15:21) MaKristau a eseekulu yoopacerya yaanithukumana mmaitthokoni mwa atthu a mmulokoni mwaya. (Mit. 12:12; 1 aKor. 16:19) Olelo-va, atthu a Yehova annithukumana wira yiixuttihiwe ni omukokhorela Ipa sa Omwene siniphiyerya ikonto miloko sinceene olumwenku wotheene.

² Yesu aanitepa ophenta etemplo ya Yehova yaari oYerusalemu, nto alipa oolepa Ivangelyo mpakha ohimya wira eprofesia ela eni: “Ophenta waka emp’anyu onnivarela mmurimani mwaka ntoko moro”, yaamuhimya yoowo. (Esal. 69:9; Yoh. 2:17) Khiivo Empa ya Omwene enireerela wiireliwa ‘empa ya Muluku’ mwa enamuna emosaru masu ala yaarumeeliwa aya ehimmwaka etemplo yaari oYerusalemu. (2 Wah. 5:13; 33:4) Ohiya-vo Biibiliya onninivaha malakiheryo annooniherya inamuna sa orumeela ni ottittimiha mapuro ahu a okokhorela olelo-va. Yoolakela ya muru ola ti wuuluula malakiheryo awo ni othokorerya moota Ipa sa Omwene sinrowa aya wooneliwaka, okhaliheriwa ni olokiheriwa.a

NITTITTIMIHEKE OKOKHORELA WEKEEKHAI

3-5. Miteko xeeni sinivariwa Empa ya Omwene, nto eyo enivarihana sai ni moonelo ahu voohimya sa mithukumano sinipakiwa nipuro nlo?

³ Empa ya Omwene ti nipuro ninkokhoreliwa Muluku mwa ekeekhai mmuttettheni. Eriyari ya soovaha sa Yehova sinniphwanyiha mireerelo sa omunepani ti mithukumano sa khula esumana sinipakiwa Empa ya Omwene. Nla ti nipuro nnaakhela ahu yoolya ya omunepani ni malakiheryo anivahiwa ahu ni otthokeya wa Yehova. Atthu otheene anirowa owiriyana mithukumano, annipaka eyo okhala wira aroolattuliwa ni Yehova ni Mwanawe. Nnaamwi nilattuliwe ene orowa olya “vamesa v’Apwiya [Yehova]”, hiyo nihooneke wira owo opanke eyo mwaha wa onoona oreerela.​—1 aKor. 10:21.

⁴ Yehova onnoona okathi owo wa okokhorela ni olipihana mukina ni mukhwaawe okhala sootthuneya, nto khimuupuxerya murummwa Paulo onitumererya wira nihicompeleke mithukumano sahu. (Mmusome aHéberi 10:24, 25.) Niireke naamooniherya omuttittimiha Yehova vaakhala wira ninnicompela mithukumano sa eKristau vahikhanle nthowa nooreerela? Nto hiyo naamooniherya wira ninnivaha efaita marehereryo a Yehova niilokiheryaka ni ovaha ikomentaario sahu ni murima wotheene okathi wa mithukumano iyo.​—Esal. 22:23.

⁵ Moonelo ahu voohimya sa Empa ya Omwene eneene ene ni miteko sa omunepani sinivariwa mmo sihaana wooniherya wira ninnittittimiha nipuro nle. Khamunoona wira moonelo ahu mwaha ola onnivarihana ni moota nnoonela ahu nsina na Muluku, nenno okhala wene ninlempwa vanipaweni na Empa ya Omwene?​—Munwehe-tho 1 Mam. 8:17.

6. Masu xeeni atthu akina ahimmye aya mwaha wa Ipa sa Omwene ni atthu anithukumana memmo? (Nwehe elatarato yoopacerya.)

⁶ Enamuna ninttittimiha ahu nipuro nahu na okokhorela ikwaha sinceene sinnooniwa ni atthu ahikhanle Anamoona. Mwa ntakiheryo, mulopwana mmosa oTurquia aahimyale so: “Oratteliwa ni ootthokiheya wa Empa ya Omwene waahikivara murima. Atthu yaaphwannye aka nipuro nle yaahiwara saana, yaari ootheya-theya ni yaanikilavuliha mooreera murima. Eyo yaahikisivela vanceenexa”. Mulopwana ole aahipacerya orowa mithukumano sotheene, nto moohipisa aahibatiziwa. Epooma emosa wIndonésia, anna a muloko ole yaahaalattula makhulupale a eguvernu ni atthu yaattamenle vaavale okathi yaarowa aya opaceriha orumeela Empa ya Omwene yaatekiwe naanano. Mukhulupale a epooma ele aahirwa. Nto itekeliwo, makhalelo ni oreera wa miri saaliwe mmukhipini waahinvara murima. Owo aahimmye so: “Oratteleya waya empa ela ennivarihana ni waamini wanyu wekeekhai”.

7, 8. Myaha xeeni sinireerela aya wuupuwelela ale anirowa owiriyana mithukumano sa eKristau?

⁷ Ottittimiha wahu nlattulo na Muluku wira niroweke omuthukumanoni nihaana wooneyaka mwa enamuna enithanla ahu ikuwo, iwarelo ni wiiphwaneliha wahu. Ottittimiha onihela muhina osyaka opaka itthu soohikhalela. Vannooniwa wira aakhala atthu akina anittharihela oratteene malakiheryo voohimya sa inamuna sookhalela mutthu aarowaka mithukumano sa mmulokoni, masi aakhala atthu akina ahiniitthokiha saana yaarowaka Empa ya Omwene. Ekeekhai wira Yehova oniphavela wira arumeyi awe ni ale anirweela oxukurya akhaleke otaphuwa nipuro nle. Masi okathi omosaru, ale anirowa mapuro awo ahipakeke etthu yaarowa onyoholiha mithukumano iyo mwaha wa iwarelo soohireerela wala olepa mensagem, olavulasa ni owurya wala opaka itthu sikina okathi owo. Anamuyari ahaana owiixuttiha anaaya osuwela wira Empa ya Omwene khahiyo nipuro na otthimaka wala othweela.​—Mus. 3:1.

⁸ Mwaha wa onyoonyiwa, Yesu aahiwoomola atthu yaamwiira nakoso mpaani mwa Muluku. (Yoh. 2:13-17) Ipa sahu sa Omwene, ti mapuro a okokhorela wekeekhai ni wiixutta itthu sa Muluku. Nto khula enamuna ya nakoso ehinivarihana ni Empa ya Omwene sihaana orowa opakiwaka nipuro nikina.​—Munwehe-tho Nehemiya 13:7, 8.

OTHOKORERYA NI OKHALIHERYA OTEKIWA IPA SA OMWENE

9, 10. (a) Onikhuma vaavi musurukhu onitekaniwa Ipa sa Omwene, ni exeeni ekhumelenle? (b) Marehereryo xeeni onooniherya ophenta akhalihenrye miloko seiye sihirina musurukhu wootekana Empa aya ya Omwene?

⁹ Otthokeya wa Yehova onniimananiha mpakha vaniwerya awe wira okhaliherye otekiwa Ipa sa Omwene sooreerela. Muteko wa othanla ikhalelo, oteka ni olokiherya onivariwa ni atthu owiivahererya ahiniliviwa etthu. Nto exeeni ekhumelenle? Okhuma 1 a Novembro 1999, mapuro ookokhorela wa ekeekhai anivikana 28.000 aatekiwa khivahereriwa miloko sinceene olumwenku wotheene. Eyo enitaphulela wira iyaakha iyo 15 sivinre, khula nihiku saanitekiwa ipa thanu sa Omwene isya.

¹⁰ Annipakiwa marehereryo wira sikhaliheriwe otekiwa Ipa sa Omwene mapuro anitthuneya aya. Marehereryo awo anooniherya ophenta anittharihela ele eri mBiibiliyani yeeyo eni ale ooruwerya yaakhaliheryeke ale athoiwale, wira ‘othene alikaneke’. (Mmusome 2 aKorinto 8:13-15.) Tthiri eyo yookumiherya otekiwa Ipa sa Omwene sooreera nto khivahereriwa miloko seiye sihirina musurukhu wootekana Empa aya ya Omwene mekhaya.

11. Exeeni anna akina ahimmye aya mwaha wa Empa aya ya Omwene esya, nto nyuwo munoonela sai?

¹¹ Muloko mmosa wa oCosta Rica, yoowo ottottenle mureerelo marehereryo ala waalempe so: “Okathi oneemela ahu ohoolo wa Empa ya Omwene, nnoona wira nnooloha! Hiyo khannamini! Empa ahu ya Omwene yooreera emalihiwe otekiwa mahiku 8 paahi! Eyo eweryanen’ye ni mareeliho a Yehova ni marehereryo anipakiwa ni otthokeya wawe vamosa ni nikhaliheryo na anna oophenta. Nipuro nla nookokhorela, yoovaha yuulupalexa enikhuma wa Yehova. Hiyo ninnitteeliwa murima vanceene mwaha wa empa ela”. Niireke wiiwa masu awo ooxukhurela Empa ya Omwene esya khanoovarani murima mwaha wa osuwela wira oxukhurela moota owo onnipakiwa ni anna akina a mapuro ikonto sinceene olumwenku wotheene? Ola muteko wa Yehova, okhala wene Empa ya Omwene yaamalakaru otekiwa ennisareiwa ni atthu ooreera murima yaawo aniphavela omusuwela oratteene Mpattuxa ahu oophenta.​—Esal. 127:1.

12. Munrowa okhaliherya sai muteko wa oteka Ipa sa Omwene?

¹² Anna ni arokora oowaatta aatoko ophwanya otteeliwa murima vanceene mwaha wa okhaliherya oteka Empa ya Omwene. Hata hiyo nihiweryaka orowa okhaliherya mooluluwanya nipuro nintekiwa aya, otheene ahu nnoowerya okhalana eparakha ya okhaliherya miteko iyo nivahaka misonkheryo sahu. Okhalela nthiti miteko sa Muluku waahiwiiriha atthu akina khalai ovaha musurukhu aya wira ovareliwe miteko sa Muluku, olelo-va hiyo nnowerya onvuwiha Yehova mwa enamuna eyo.​—Okhum. 25:2; 2 aKor. 9:7.

ORATTELA EMPA YA OMWENE

13, 14. Miruku xeeni sa mBiibiliyani sinirumeela ahu wira khula okathi Empa ahu ya Omwene ekhaleke yooratteleya ni yootthokiheya?

¹³ Nuumala otekiwa Empa ya Omwene, eyo enitthuneya oratteliwa ni otthokihiwa wira yooniheryeke emutthu ni makhalelo a Muluku onimukokhorela ahu yoowo ori Muluku ootthokiheya. (Mmusome 1 aKorinto 14:33, 40.) Biibiliya onnilikaniha waarya ni okhala ooratteleya omunepani ni orattela mireerelo sahu. (Wis. 19:8) Tivonto, mutthu wira eemereriwe ni Yehova ohaana okhala oowiirattela saana.

¹⁴ Moovarihana ni miruku iyo sa oratta, hiyo ninnikhala ootaphuwa okathi onaalattula ahu atthu wira arwe awehe mithukumano nisuwelaka wira makhalelo anrowa aya ophwanya empa ya Omwene anrowa olipiherya ihapari sinilaleya ahu. Awo anoowerya woona wira hiyo nimmurumeela Muluku oowaarya yoowo voohipisa onrowa okhaliha elapo ela eParayiisu yooratteleya saana.​—Yes. 6:1-3; Wis. 11:18.

15, 16. (a) Xeeni varyaaya vooxankiha orattela Empa ya Omwene khula okathi, masi xeeni varyaaya vootthuneya? (b) Marehereryo xeeni anitthuneya opakiwa khula muloko, nto eparakha xeeni khula mmosa orina awe?

¹⁵ Aakhala atthu owaasivela mapuro ooratteliwa waavikana akina. Awo annoona wira nipuro nooratteliwa ninnihela muhina ihuweliwo, ni makhalelo a mapuro awo, ntthupi, makhalelo a iphiro ni okhalana ikaruma ni maasi ooreerela orumeela okathi woorattela. Moohicikha etthu sa muupuwelelo ni makhalelo ahu, Empa ya Omwene ehaana ovahaka ntakiheryo nooloka na oratteliwa, okhala wira eniitthaneliwa nsina na Yehova ni ti nipuro na okokhorela wekeekhai mmuttettheni mmo.​—Otum. 23:14.

¹⁶ Muteko wa orattela Empa ya Omwene ohooloweliweke. Khula nikhuuru na axitokweene nihaana olokiherya eprograma yoovareleya muteko ni okumiherya ikaruma sotheene siniweryaneya wira muloko oratteleke nipuro na okokhorela wekeekhai. Okhala wira sookhala miteko sikina sa orattela sinitthuneya ovariwa khula wanikisa wa mithukumano, sikina sinniweryaneya ovariwa okathi mukina, nto vannitthuneya othanliwa mutthu wira ohooleleke ni ottittimiherya wira khuuvo muteko onihiiwa opakiwa okathi aya. Anna otheene a mmulokoni aakhalana eparakha yuulupale ya wiimananiha wira akhaliherye orattela ipa iyo.

OLOKIHERYA NIPURO NAHU NA OKOKHORELA

17, 18. (a) Matakiheryo xeeni ari mBiibiliyani anooniherya wira mapuro a okokhorela yaanilokiheriwa okhuma khalai? (b) Xeeni Ipa sa Omwene sinitthuneya aya olokiheriwaka oratteene?

¹⁷ Arumeyi a Yehova khula okathi anniimananiha wira mapuro aya a okokhorela akhaleke oolokiheriwa saana. Mwene Yowasi a oYuda aahaaruma anamukuttho orumeela musurukhu wa soovaha sa atthu wira avare muteko “w’olokiha empa ya Muluku mapuro othene ahononeiye”. (2 Mam. 12:4, 5) Nuuvira iyaakha 200, Mwene Yosiya aahirumeela nave musurukhu wa mpaani mwa Muluku wira olokiherye etemplo.​—Mmusome 2 Wah. 34:9-11.

¹⁸ Ifiliyaali sa ilapo sikina, sinnihimya wira atthu khanikhaliherya ni murima wotheene muteko wooteka wala olokiherya ipa sikhanle. Woonasa wene atthu a elapo eyo annisuwela ovara miteko iyo wala anoowerya ovaha itthu sinitthuneya wira muteko owo ovariwe. Masi, vannooneya wira waaloweliwa muteko woolokiherya Empa ya Omwene, eyo yaamwiiriha empa eyo waakuva omora ni khiyaarowa ovaha onamoona wooloka mmuttettheni. Masi vakhala wira anna a khula muloko annikhaliherya siniwerya aya olokiherya Empa ya Omwene, eyo enninvuwiha Yehova ni ennuurela musurukhu onivahiwa ni annihu.

19. Tiivi ekhanle yoolakela anyu voohimya sa ipa sipakeliwe okokhorela wekeekhai?

¹⁹ Empa ya Omwene, empa evahereriwe Yehova. Tivonto, vahinireerela aya ohimmwa wira ti ya mutthu wala muloko, hata okhalanaka idukumento sinihimya wira ti yawawe. Malakiheryo a eKristau annitumererya wira nipakeke khula etthu eniwerya ahu wira mapuro awo avikanihe ovara muteko apakeliwe aya. Khula mutthu mmulokoni onoowerya okhaliherya muteko owo vakhala wira onnooniherya nttittimiho nookhalela nipuro nahu na okokhorela, ovaha musurukhu wira sitekiwe ipa isya, ni okhaliherya mowiivahererya olokiherya Ipa sa Omwene sikhanle ni orattela saana. Nakhaliherya ni murima ahu wotheene muteko owo, ninnooniherya oluttuweliwa mwaha wa nipuro ninkokhoreliwa Yehova ntoko Yesu siirale awe.​—Yoh. 2:17.

[Enoota]