MURUU WA NAMULOKO NEETHANU NEERARU
Awo Khaniirela Mpantta wa Elapo
1. (a) Ohinatthi wiiviwa, Yesu aavekelenle exeeni awiixutti awe? (b) Nthowa xeeni ory’aya wootthuneyexa ohiirela mpantta wa elapo?
OHIYU ohinatthi wiiviwa, Yesu aahaavekelela awiixutti awe. Osuwelaka wira awo yaarowa weehereriwa vaalupale ni Satana, Yesu aahihimya wa Tiithi awe oriki: “Nkinovekelani wira mwakumihe molumwenkuni, nto wira nwakiherye mutakhali. Awo khahiyó a vathí-va [a mukhalelo ola wa elapo], sisale miyo kihikhanlyaka a vathí-va”. (Yohani 17:15, 16) Nthowa xeeni ory’aya wootthuneyexa ovalaana ni elapo? Mwaha woowi Satana tonilamulela elapo ela. MaKristau khantthuneya wiirela mpantta wa olumwenku onilamuleliwa ni Satana.—Luka 4:5-8; Yohani 14:30; 1 Yohani 5:19.
2. Mu inamuna xeeni Yesu ahiirela awe mpantta wa elapo?
2 Ohiirela mpantta wa elapo khiwaataphulela wira Yesu khaaphenta atthu akina. Moovirikana ni vo, owo aahaavoniha aretta, aahaahihimuxa alipa-ookhwa, ni aahiwiixuttiha atthu Omwene wa Muluku. Owo aahivaha-tho okumi awe ntoko mukuttho wa apinaatamu. Masi owo khaaphentale mweettelo ohimmuttittimiha Muluku ni sowiira seiyo sinooniherya munepa wa elapo ya Satana. Nto, owo aahilopola wira atthu yiikasoopeke ni itthu ntoko ophavela orupihana woohiloka, mweettelo woophavela muhakhu, ni ophavela ovuwa. (Matheyo 5:27, 28; 6:19-21; Luka 20:46, 47) Tivonto, ti voohitikiniha wira Yesu aahikhootta wiirela mpantta ipoliitika sa elapo. Nnaamwi aari muYuda, owo khaakhalihenrye owana-wana wa aRoma ni aYuda mmiyaha sa epoliitika.
“Omwene Aka Khahiyó wa Vathí-va”
3. (a) Ahooleli a itiini aaYuda yaamoothenrye exeeni Yesu amuleelaka Pilato, ni nthowa xeeni? (b) Exeeni enoohiherya wira Yesu khaaphavela okhala mwene oopinaatamu?
3 Nkahaya muthokorerye ele yiiranen’ye okathi yoole ahooleli a itiini aaYuda yanvanre aya Yesu ni amuroiha wa Ponsio Pilato, guvernatoro ooRoma. Tthiri, ahooleli awo yaahinanariwa mwaha woowi Yesu aahuupulula wootha waya. Aphavelaka omwiiriha guvernatoro wira omphukele Yesu, awo yaahimootherya Yesu ariki: “Mulopwan’ola nimphwannyé àhapuxaka atthu ahu, àkhottiheryaka oliva mpósito wa mwené mulupale òRoma, nave-tho ìsiraka mòpoli ni mwené”. (Luka 23:2) Mowooneya, nno waari wootha okhala wira mwaakha mmosaa ottuli vaavo atthu yaaphavenle aya omuhela Yesu omwene, owo aahikhootta. (Yohani 6:15) Yesu aahisuwela wira aarowa okhala Mwene a wirimu muhoolo. (Luka 19:11, 12) Nave-tho, owo aarowa oheliwa emwene, ohiya ni apinaatamu, masi ni Yehova.
4. Tuuvi waari muupuwelo wa Yesu voohimya sa oliva mpoosito?
4 Mahiku mararuu paahi ohinatthi Yesu ovariwa, aFarisi yaaheererya omwiiriha Yesu ohimya etthu yamphwanyiha mulattu mmiyaha sa oliva mpoosito. Masi owo aahimmye wira: “Mukòniherye musurukhu [wa oRoma] mmosá. Elatarato ila ni nsina nlempwe vava ti nawani?” Vaavo yaakhunle aya wira: “Ti na mwené!”, Yesu aahimmye so: “Weso, munvaheke mwené ekhanle ya mwené, munvaheke Muluku ekhanle ya Muluku”.—Luka 20:20-25.
5. (a) Okathi wa ovariwa wawe, Yesu aawiixuttinhe exeeni awiixutti awe? (b) Yesu aatthokihenrye sai ele yaapanke awe? (c) Waamalenle vaavi ophukela iwe?
5 Yesu khiixuttinhe ohiwiiwelela anamalamulela a elapo. Vaavo atoropa ni alopwana akina vaarwiiya aya onvara Yesu, Pedru aahikumiha ekatana awe ni khikwasa niyaru na mulopwana mmosaa. Masi Yesu aahimuhimeerya wira: “Mwixathi ekatan’anyu mwaryaya, okhala wira othene ale anrumela ekatana, anokhwa ekatana yeyo”. (Matheyo 26:51, 52) Mmeeloni mwaya Yesu aahitthokiherya wa Pilato ele yaapanke awe, oriki: “Omwene aka khuhiyó wa vathí-va. Wàri wa vathí-vava, arumeyi aka yamukumiha ekhotto, wira kihiveleliwe w’aYuda”. (Yohani 18:36) Pilato aaheemererya wira ‘khamphwanyanne mulattu’ Yesu. Masi eemereryaka okhanyererya wa muttitthi oonanariwa, Pilato aahirumiha okhomeliwa Yesu.—Luka 23:13-15; Yohani 19:12-16.
Awiixutti Anitthara Malakiheryo a Yesu
6. Moota xeeni maKristau oopacerya yoonihenrya aya wira hataa yaasyaka munepa wa mulaponi, awo yaanaphenta atthu?
6 Tthiri awiixutti a Yesu yaahiiwexexa yootaphulela ya ohiirela mpantta wa elapo. Ela yaataphulela osyaka munepa woohimwiiwelela Muluku ni sowiira sa mulaponi, seiyo saahela muhina ohaaxana ni otthekula woohiloka wiiriwa mapuro ootthekula aaRoma. Mwaha woosyaka itthu iyo, awiixutti yaanihimmwa okhala oowaanyokha atthu. Masi moovirikana ni waanyokha apinaatamu akhw’aya, awo yaanimananiha waakhaliherya atthu akina wira attottele mureerelo marehereryo a Muluku wira yoopowe.
7. (a) Mwaha woohiirela mpantta wa elapo, exeeni yaawiiranenle awiixutti oopacerya? (b) Awiixutti ala yawoonela sai anamalamulela a ipoliitika ni oliva mpoosito, ni nthowa xeeni?
7 Ntoko saalupatthiwa awe Yesu, atthareli awe yaahilupatthiwa-tho. Ikwaha sinceene awo yaalupatthiwe ni makhulupale a eguvernu oohitthokiheriwa saana. Hataa vaari siiso, mu 56 E.C., murummwa Paulo aahaalepela maKristau ooRoma, aatumereryaka wira: “Khula mutthu ohana owìwelela alupale [anamalamulela a ipoliitika] anettiha elapo, okhala wira khivo eyulupale ehikhumme wa Muluku”. Eyo khentaphulela wira Yehova tokumihenrye iguvernu sa mulaponi, masi entaphulela wira Yehova onneemererya iguvernu iyo okhala, mpakha Omwene awe paahi opacerya olamulela elapo yotheene. Tivonto, Paulo aahaalopola maKristau wira yaattittimiheke makhulupale a mulaponi ni eliveke mpoosito.—aRoma 13:1-7; Tito 3:1, 2.
8. (a) MaKristau awiiweleleke makhulupale a elapo mpakha vaavi? (b) Moota xeeni maKristau oopacerya yaatthanre aya ntakiheryo na Yesu?
8 Masi, owiiwelela wahu anamalamulela a epoliitika wookhalana mukano, khahiyo mwa itthu sotheene. Vaavo malamulo a Yehova ni malamulo a apinaatamu vahinivarihana aya, ale animurumeela Yehova ahaana wiiwelelaka malamulo Awe. Nkawehani ele enihimya eliivuru yoowi: On the Road to Civilization—A World History (Mu Ephiro ya Wiixutta Makhalelo Masyaa, Miyaha sa Molumwenkuni) ennihimya sa maKristau oopacerya wira: “MaKristau yaanikhootta ovara miteko sikina seiyo saavara atthu ooRoma. MaKristau . . . yoona wira okela muteko wa etoropa khiwaavarihana ni nroromelo naya. Awo yaanikhootta okela ekhulupale mmiyaha sa epoliitika. Awo yaanikhootta omukokhorela mwene”. Vaavo epwaro yuulupale ya milattu ya aYuda ‘yarumme aya mokhanyererya’ awiixutti wira ahilaleeryeke, awo yaakhunle so: “Etthu yotepa otthuneya omwiwelela Muluku ovikana owiwelela atthu”.—Miteko s’Arummwa 5:27-29.
9. (a) Nthowa xeeni maKristau oYerusalemu yaatthyanw’aya mu 66 E.C.? (b) Moota xeeni eyo ery’aya ntakiheryo nootthuneya?
9 Voohimya sa miyaha sa epoliitika ni owana-wana wa anakhotto, moomalela maKristau khayiirela mpantta wa elapo. Mu 66 E.C., aYuda yaakhala oYudeya yaahimurukunuwela Seesari. Niinanoru anakhotto ooRoma yaahimurukurerya Yerusalemu. Exeeni yaapanke aya maKristau yaakhala muttetthe ole? Awo yahuupuwela miruku sa Yesu sa okhuma mmuttettheni. Vaavo aRoma yaakhumme aya mu okathi vakhaani, maKristau yaahitthyawa alapuwaka Muroo Yordani arowaka miyaako saari mapuro a oPela. (Luka 21:20-24) Ohiirela waya mpantta wa elapo onnirumeela ntoko ntakiheryo wa maKristau oororomeleya.
Ohiirela Mpantta wa MaKristau Mahiku Ala Ookiserya
10. (a) Muteko xeeni onivara Anamoona a Yehova, ni nthowa xeeni? (b) Etthu xeeni Anamoona a Yehova ehiniirela aya mpantta?
10 Niireke wira sowiiraneya sa mulaponi sinnooniherya wira yookhala ekrupu mahiku ala ookiserya yeeyo ehiniirela mpantta moomalela miyaha sa elapo, ettharaka ntakiheryo na maKristau oopacerya? Aayo, Anamoona a Yehova annipaka eyo. Okathi ola wotheene wa mahiku ookiserya, awo annivikaniha olaleerya wira paahi Omwene wa Muluku tonrowa oruuha murettele ohinimala, oruwerya, ohakalala wa ale aniphenta exariya. (Matheyo 24:14) Masi voohimya sa owana-wana eriyari ya maloko, awo annivikaniha ohiirela mpantta moomalela.
11. (a) Moota xeeni Anamoona ohiirela waya mpantta wa elapo onivirikana aya ni sowiira sa ahooleli a itiini? (b) Anamoona a Yehova anoonela sai ele akina enipaka aya mmiyaha sa epoliitika?
11 Moovirikana ni Anamoona a Yehova, ahooleli a itiini a elapo ela annivikaniha wiikeliha mmiyaha sa epoliitika. Ilapo sikina, awo annilipiherya opaka ikampaanya wira atthu akina athanliwe aahiiso ahithanliwe okathi wa mwaathanle. Ahooleli akina a itiini aakhalana miritti mmiteko sa ipoliitika. Akina a yaawo ahaakhanyererya anapoliitika wira yaakhulele iprograma seiyo ahooleli awo siniphavela aya. Masi, Anamoona a Yehova khaniirela mpantta miyaha sa epoliitika. Nnakhala khaneemererya waakhoottiherya atthu akina yaawo anitthara epoliitika, ale aniphavela miritti mmiteko sa epoliitika, aahiiso othanla okathi wa mwaathanle. Yesu aahimmye wira awiixutti awe khiyaarowa wiirelaka mpantta wa elapo, siiso Anamoona a Yehova khaniirela mpantta ipoliitika.
12. Exeeni eniiraneya mwaha wa itiini sa elapo ela wiirelaka mpantta miyaha sa epoliitika?
12 Ntoko Yesu saahimmye awe vahinatthi, maloko anniwana okathi ti okathi. Hataa atthu a elapo emosaru anniwana yaaworu. (Matheyo 24:3, 6, 7) Ahooleli a itiini ikwaha sinceene annikhaliherya ekrupu aahiiso nloko nniwana, yaatumereryaka atthareli aya opaka etthu emosaru. Nto yookhumelela aya tiivi? Atthu a etiini emosaru anniivanana mukhottoni mwaha wa okhala a elapo ekina aahiiso nloko nikina. Ela ti yoovirikana ni yootthuna ya Muluku.—1 Yohani 3:10-12; 4:8, 20.
13. Exeeni enoonihereya voohimya sa ohiirela mpantta wa elapo wa Anamoona a Yehova?
13 Tivonto, Anamoona a Yehova khaniirela mpantta moomalela owana-wana wa mulaponi. A Sentinela a 1 a Novembro 1939, enihimya wira: “Otheene yaale ari mpantta wa Pwiya khanrowa wiirela mpantta owana wa maloko”. Anamoona a Yehova a ilapo sotheene ni mikhalelo sotheene annivikaniha wiiwelela yooruma ela. Awo khaneemererya onyokhana wa ipoliitika sa elapo ni ikhotto wira sihonone wiiraana waya ntoko anna a elapo yotheene. Awo ‘akuxa iyuma saya s’ekhotto, ehana ihipá: arukunuxa mavak’aya, ehana ihekó’. Mwaha wa ohiirelaka mpantta miyaha iyo, awo khaniixutta-tho owana ekhotto.—Yesaya 2:3, 4; 2 aKorinto 10:3, 4.
14. Exeeni eniwiiraneela Anamoona a Yehova, mwaha woovikanihaka okhala oovalaana ni elapo?
14 Mwaha wa ohiirela waya mpantta wa elapo enikhumelela exeeni? Yesu aahimmye wira: “Vano nyuwo khamuhiyó-tho atthu a vathí-va [a mukhalelo ola wa elapo], . . . tivó atthu awo vanonyokhayani”. (Yohani 15:19) Anamoona a Yehova anceene aariheliwa mukhatteya mwaha wookhala arumeyi a Muluku. Akina aahaaxiwa, mpakha wiiviwa, ntoko siiranen’ya aya ni maKristau a eseekulu yoopacerya. Ela enniiraneya mwaha woowi Satana, “muluku a vathí-va”, onnaanyokha arumeyi a Yehova, yaawo ahiniirela mpantta wa elapo.—2 aKorinto 4:4; Wisupulula 12:12.
15. (a) Maloko otheene aneetta arowaka woowi, ni exeeni Anamoona a Yehova enisyaka aya? (b) Nthowa xeeni ovalaana ni elapo ory’aya mwaha wootthuneya?
15 Arumeyi a Yehova annihakalala mwaha woohiirela mpantta miyaha sa elapo, okhala wira maloko otheene a valaponi aneetta arowaka wanikisa waya mu Harmagedoni. (Daniyeli 2:44; Wisupulula 16:14, 16; 19:11-21) Hiyo ninrowa osyaka yookhumelela eyo mwaha woohiirela mpantta wa elapo. Ntoko atthu oowiiraana elapo yotheene, hiyo nrii oororomeleya wa Omwene wa wirimu wa Muluku. Tthiri, mwaha woohiirela mpantta wa elapo, hiyo ninniveehiwa ni olupatthiwa. Vano, moohipisa, itthu iyo sinrowa omala, mwaha woowi mukhalelo ola wootakhala wa elapo yoowo onilamuleliwa ni Satana, onrowa opwetexiwa. Mmasuu makina, otheene yaale animurumeela Yehova anrowa okhalaka mu elapo esyaa ya xariya Momweneni mwa Muluku.—2 Pedru 3:10-13; 1 Yohani 2:15-17.
Makoho Oowuuluula
• Yesu oonihenrye sai ele ekhanle ohiirela mpantta wa elapo?
• Tuuvi waari muupuwelo wa maKristau oopacerya voohimya sa (a) munepa wa elapo, (b) makhulupale aneettiha elapo, ni (c) oliva mpoosito?
• Inamuna xeeni Anamoona a Yehova anooniherya aya ohiirela mpantta wa elapo ntoko maKristau olelo va?
[Elatarato eri epaaxina 165]
Yesu aahitthokiherya wira owo ni atthareli awe khaniirela mpantta wa elapo