Xeeni Anamoona a Yehova Ahiniirela Aya Mpantta Epoliitika?
Anamoona a Yehova khaniirela mpantta epoliitika mwaha wa sookupali saya, seiyo sinivarihana ni ele Biibiliya oniixuttiha awe. Nto hiyo khaninvotari, khanniilepiha wira nithanliwe, aahiiso khanimpaka igreve wira nirukunuxe itthu sinipakiwa ni kuvernu. Ninnikupali wira itthu iyo sinnivarihana ni ele Biibiliya oniixuttiha awe.
Hiyo nimmutakiha Yesu. Okathi atthu yaaphavela aya omukhaliha mwene, Yesu aahikhootta. (Yohani 6:15) Yesu aahiwiixuttiha atthareli awe wira ‘ahiireleke mpanta olumwenku’ ni ahiireleke mpantta epoliitika.—Yohani 17:14, 16; 18:36; Marko 12:13-17.
Ninniroromeleya wa Omwene wa Muluku. Yesu aahimmye so: “Ihapari iya sooreera sa Omwene sinoolaleiwa elapo yotheene.” (Matheyo 24:14) Hiyo nniirela mpantta Omwene wa Muluku. Tivonto nnaahimeerya ahu atthu akina ihapari sa Omwene owo. Nave ti nthowa naya nihiniirela ahu mpantta epoliitika ya elapo ahu aahiiso ya elapo ekina.—2 aKorinto 5:20; aEefeso 6:20.
Mwaha wa ohiirela mpantta epoliitika, ninnaalalerya mootaphuwa Omwene wa Muluku atthu ootheene. Nave ninnikupali wira Omwene wa Muluku paahi tonrowa owerya omaliha mixankiho mulaponi; nto hiyo ninnikupali eyo ni moolumo ahu hata ni miteko sahu.—Esalimo 56:12.
Ootheene ahu na atthu oowiiraana maana khanniirela mpantta epoliitika nto na anna a olumwenku wotheene. (aKolosi 3:14; 1 Pedru 2:17) Hiyo noovirikana ni atthu a itiini sikina yaawo aniirela mpantta epoliitika ni ahiniiwanana.—1 aKorinto 1:10.
Ninnimuttittimiha kuvernu. Nnaamwi nihiirelaka mpantta epoliitika, ninnimuttittimiha kuvernu ni makhulupale a elapo ninkhala ahu. Maana Biibiliya onihimya wira: “Niwiiweleleke makhulupale a mulaponi”. (aRoma 13:1) Tthiri ninniiwelela malamu a kuvernu a elapo ahu, ninniliva mpoosito nave ninniiwelela malamulo kuvernu onvaha awe a moota woowiiwanana ni atthu akina. Nave ohiya opaka manyaku-nyaku, ninnaavekelela “mamwene ni anamalamulela otheene”, otepexa wene okathi anipaka aya soothanla sinivarihana ni omulompa wahu Muluku.—1 Timootheyo 2:1, 2.
Nave ninnittittimiha soothanla sa atthu akina. Mwa ntakiheryo okathi wa mwaathanle hiyo khannaakhoottiherya nnakhala waahiiha atthu aniphavela orowa ovotari.
Niireke mukhalelo ahu wa ohiirela mpantta epoliitika okhumelenle niinaano? Nnaari. Maana arummwa ni makristau a eseekulu yoopacerya yaapaka etthu emosa-ru, nave yaanaattittimiha makhulupale. Eliivuru emosa eniihaniwa Além das Boas Intenções enihimya so: “Ekeekhai wira makristau a eseekulu yoopacerya yaanaattittimiha makhulupale a kuvernu, masi awo khiyiirela mpantta myaha sa epoliitika.” Nave-tho eliivuru ekina Na Estrada Para a Civilização ennihimya wira “makristau a eseekulu yoopacerya khiyeemererya ovahiwa miritti aahiiso ikarku sa mulaponi”.
Nto niireke ohiirela mpantta myaha sa epoliitika onooniherya wira khanimphavela okhala oowiiraana? Nnaari. Maana hiyo onisivela murettele nto ti nthowa naya hata kuvernu ohinrerela awe woona wira ohiirela wahu mpantta epoliitika khanimmwiiwelela. Nkahaya moone ele enihimya aya erelatoorio ya 2001 yaakumiheriwe ni Academia Nacional de Ciências da Ucrânia. Elavulaka sa ohiirela wahu mpantta myaha sa epoliitika erelatoorio eyo yaahimmye so: “Olelo-va, atthu akina pooti ohaasivela mwaha wa Anamoona a Yehova ohiirela mpantta epoliitika. Nto, ti yeeyo yaawiiriha atthu a ekuvernu ya manazista ni makomunista owootherya Anamoona a Yehova”. Masi hata okathi Anamoona a Yehova yaalupatthiwa aya ni uniao soviética “khiyaahiyale omuttitimiha kuvernu. Awo yaanilima mmatta vamosa ni atthu akina ni yaahivara nfaapirika ni khiyaatonko opaka etthu yooniherya ohimuttittimiha kuvernu komunista”. Nto erelatooriyo ele yaamanle ehimyaka so: “Olelo-va nave, itthu anikupali aya Anamoona a Yehova, khasinikumiherya mixankiho hata wa kuvernu”.