YOOSOMA 45
Onitaphulela Exeeni Ohiirela Mpantta Elapo?
Yesu aahaaleela atthareli awe wira “nyuwo khamunlikana ni atthu a olumwenku ola”. (Yohani 15:19) Eyo enihela muhina ohiirela mpantta elapo, niire so, ohiirela mpantta epoliitika ni ikhotto siniiraneya moolumwenkuni. Ohimya ekeekhai, khivanikhweya okathi wootheene ohiirela mpantta olumwenku. Woonasa wene, mwaha wa ohiirela mpantta olumwenku, atthu akina pooti oniveeha. Etthu exeeni enrowa onikhaliherya ohiirela mpantta olumwenku ni ohihiya ororomeleya wa Yehova Muluku?
1. Makristau eekeekhai anoonela sai ikuvernu sa apinaatamu?
Makristau eekeekhai, annittittimiha ikuvernu sa apinaatamu. Mwaha woopaka eyo, ninniiwelela ele Yesu onirumme awe oriki: “Munvaheke Seesari ekhanle ya Seesari”. Eyo enitaphulela wira ninniiwelela malamulo a elapo ninkhala ahu ni ninniliva mpoosito. (Marko 12:17) Biibiliya onihimya wira ikuvernu sa apinaatamu sookhala mwaha woowi Yehova teemerenrye. (aRoma 13:1) Nto ninnisuwela wira makhulupale a kuvernu aakhalana owerya. Nave ninnisuwela wira okhulupale aya khonivikana okhulupale wa Muluku, maana Muluku ni Omwene awe paahi tonrowa omaliha mixankiho sa apinaatamu.
2. Ninrowa wooniherya sai wira khanniirela mpantta elapo?
Nimutakihaka Yesu, hiyo khanniirela mpantta epoliitika. Nuumala oweha miiriirya aapanke awe, atthu a okathi awe yaaphavela omukhaliha mwene, masi Yesu aahikhootta. (Yohani 6:15) Mwaha wa xeeni? Etthu aahimmye awe muhoolo mwaya, enninikhaliherya osuwela etthu yaamwiirinhe okhootta. Yesu aahimmye so: “Omwene aka khonikhuma olumwenku yoola”. (Yohani 18:36) Nto okhala wira hiyo na awiixutti a Yesu, khanniirela mpantta elapo mwa inamuna soovirikana. Mwa ntakiheryo, hiyo khaninrowa okhottoni. (Mmusome Mikeya 4:3.) Ohiya-vo, hiyo khaninkhaliherya ni khaninvaanyiha epoliitika wala ahooleli a epoliitika. Nave ninnittittimiha elapo ninkhala ahu. Masi hata vari siiso, hiyo khaninkokhorela epantera, omwiipa hino nnakhala opaka itthu sikina saarowa wooniherya wira ninnikokhorela ilatarato. (1 Yohani 5:21) Iyo inamuna vakhaani paahi sinooniherya wira ninniroromela moomalela Omwene wa Muluku.
MWIIXUTTE ITTHU SIKINA
Nwehe itthu sikhanle ooweehererya ororomeleya wanyu ni itthu sinrowa wookhaliheryani opaka soothanla sinimusivela Yehova.
3. Makristau eekeekhai khaniirela mpantta elapo
Yesu ni awiixutti awe khayiirela mpantta elapo. Nto hiyo nihaana otthara ntakiheryo naya. Mmusome aRoma 13:1, 5-7 ni 1 Pedru 2:13, 14. Nuumala-vo, nwehe EVIIDIYU ni mwaakhule makoho.
Xeeni vanireerela aya waattittimiha makhulupale a mulaponi?
Ninrowa wooniherya sai wira ninnaattittimiha makhulupale a mulaponi?
Okathi wa ekhotto, atthu anceene anihimya wira khaniirela mpantta elapo. Masi annikhaliherya elapo emosa. Onitaphulela exeeni ohiirela mpantta elapo? Mmusome Yohani 17:16. Nuumala-vo, nwehe EVIIDIYU ni mwaakhule nikoho.
Ontaphulela exeeni ohiirela mpantta olumwenku?
Ankhi akhala wira makhulupale a kuvernu anninivekela opaka etthu ehinivarihana ni malamulo a Muluku? Musome Miteko 5:28, 29. Nuumala-vo, nwehe EVIIDIYU ni mwaakhule makoho.
Akhala wira malamulo a apinaatamu khanivarihana ni malamulo a Muluku, malamulo xeeni ninreerela ahu wiiwelela?
Niireke wookhala okathi makristau eekeekhai anireerela aya ohiwiiwelela makhulupale a kuvernu?
4. Muhiireleke mpantta elapo mmuupuweloni ni itthu munipaka anyu
Mmusome 1 Yohani 5:21. Nuumala-vo, nwehe EVIIDIYU ni mwaakhule makoho.
Eviidiyu niwenhe ahu, etthu xeeni yaamwiirinhe Ayenge ohiirela mpantta elapo ni okhootta okokhorela epantera?
Munoona wira aahipaka yoothanla yooloka?
Itthu xeeni sikina sikhanle ooweehererya yoolakela ahu ya ohiirela mpantta elapo? Nwehe EVIIDIYU, nuumala-vo, mwaakhule makoho.
Akhala wira elapo ahu enimweetta xooku ni elapo ekina, ninrowa owerya sai ohiirela mpantta elapo?
Ninrowa owerya sai ohiirela mpantta elapo akhala wira mukhulupale a epoliitika onnihimya itthu sinrowa oniphwanyiha mireerelo aahiiso onikumiherya mixankiho?
Itthu ninwiiwa ahu atthu akina ahimyaka ni ihapari sinilaleiwa, sinrowa ohonona sai ororomeleya wahu?
Okathi xeeni mukristau onireerela awe ohiirela mpantta elapo mmuupu- weloni ni itthu onipaka awe?
ATTHU AKINA POOTI WOOKOHANI WIRA: “Xeeni muhinkokhorela anyu epantera ni omwiipa hino?”
Munrowa owaakhula sai?
IPONTO SUULUPALE
Makristau eekeekhai anniimananiha ohiirela mpantta elapo mmuupuweloni, moolumo ni miteko anivara aya.
Wuuluula
Ninrowa wooniherya sai wira ninniiwelela ikuvernu sa apinaatamu?
Xeeni vanireerela aya ohiirela mpantta elapo?
Itthu xeeni sikhanle ooweehererya ororomeleya wahu?
NWEHE ITTHU SIKINA
Itthu xeeni ninreerela ahu opaka wira nihiireleke mpantta elapo?
Xeeni atthu otheene a vatthokoni anireerela aya wiilokiherya vahinatthi wira awerye ovilela okathi aneehereriwa aya ni ikuvernu sa mulaponi?
Xeeni waakiherya elapo mutthu onikhala awe nihikhanle aya nttittimiho nuulupalexa?
Nwehe etthu enrowa wookhaliheryani ohiirela mpantta elapo okathi munithanla anyu muteko munrowa anyu ovaraka.
“Khula Mutthu Onrowa Oteexa Muritti Awe” (Owehaweha, 15 a Março, 2006)