Khalai Yaari Maferera Vano Khukhala Anamoona

Felisa: Kihuuwale emusi yoohithaaciri vanceene wEspanya. Amusi aka yaari maKatoolika, nto naaniluttuweliwa miteko sa okerexa. Tthiri, amusi aka 13 yaari mapaatiri aahiiso yaavara miteko sa okerexa. Murokoraya amaama aari paatiri ni aixuttiha ekerexa Katoolika. Nuumala owo okhwa, Paapa João Paulo II aahimuhimya okhala oowaarya. Paapa aka aari mulipa-oohana iyuuma, masi maama aka aari mulimi. Naari anamwane 8, nto miyo kaari muulupale.

Okathi kaarina aka iyaakha 12, yaahipacerya ekhotto wEspanya. Nuumala ekhotto, apaapa yaahitthukweliwa maana guvernu khaasiveliwe ni muupuwelo aya mmyaha sa epoliitika. Nto eyo yaahimuxankiha vanceene maama aka, okhala wira khaawerya mekhawe onilyiha otheene ahu. Tivonto, maama aka aahuupuwela waaroiha axihima aka Araceli, Lauri, ni Ramoni opuro onikhala maferera muttetthe wa oBilbao. Nto opuro ole axihima aka khiyaarowa ovoliwaka etala.

Araceli: Okathi kaarina aka iyaakha 14, Lauri aarina 12, nto Ramoni aarina 10. Vano naahivalaanyiwa ni emusi ahu. Nto muteko ahu waari orattela opuro ole wa maferera. Nuuvira iyaakha piili, maferera ale yaahiniroiha oZaragoza, opuro mukina muulupale waakhapeleliwa atthu oowuuluvala. Naahikhalana muteko munceene ni wookhulumula nirattelaka okosinya wa mapuro ale.

Felisa: Okathi axihima aka yaaronwe aya oZaragoza, maama aka, ni taata aka paatiri, nave yaahikiroiha opuro omosaru. Yoophavela aya yaari okivalanyiha ni mmiravo aasiveliwa ni miyo. Kaahiviriha okathi munceene opuro ole waaroihiwe aka maana kaanimphenta Muluku. Nkaacompela okerexa, okhala wira kaaphavela okhala misionaaria Katoolika, wAfrica ntoko murokoraka.

Masi opuro ole wa maferera, kaahoona wira nkaarowa opaka ele yaaphavela aka. Maana maferera ale khiyaakitumererya omurumeela Muluku elapo ekina, ntoko saaphavela aka. Nuumala mwaakha mmosa, kaahitthikela owaani wira kaakhapeleleke ataata, yaawo yaari paatiri. Kaanaakhaliherya miteko sa vate, nto khula nihiku ohiyu naanimwiira Terso hoothe. Nave-tho vaanikisivela olokiherya ifilori mukerexa, ni owariha ilatarato sa Maria ni sa “masanto”.

Araceli: Kiryeene oZaragoza, kaahilapha ekwaha yoopacerya wira kikhale ferera. Nto maferera akina yaahinivalaanya. Yaakiroihale oMadrid mapuro makina anikhala maferera, masi Lauri yaamuroihale oValencia. Ramoni aahanle oZaragoza. Muttetthe wa oMadrid, kaahilapha ekwaha ya nenli wira kikhale ferera. Atthu anceene yaahiruuhiwa opuro ole, eyo piiyo, anaxikola ni atthu oowuuluvala. Nto muteko khiwaareere. Miyo kaavara exipitaali ya maferera.

Mwekeekhai, kuupuwela wira muteko wa oferera waari woohakalaliha. Koona wira naarowa ovirihaka okathi munceene nimusomaka Biibiliya, ni wiixutta etthu. Nto nkaareere onyoonyiheya. Maana khuuvo aamusoma Biibiliya nnakhala olavula voohimya sa Muluku ni Yesu. Kaahixutta nttaava na eLatin, ni makhalelo a “masanto” a oKatoolika, ni omukokhorela Maria. Masi okathi munceene naavara muteko paahi.

Kaahipacerya oxankiheya ni okhulumuwa. Kahuupuwela wira kaahaana ophavela musurukhu wira kaakhaliheryeke amusi aka, ohiya ovara muteko mapuro a maferera ni owiiriha akina othaaciri. Kaahilavulana muulupale a maferera, khimuleela mwaha ole, ni wira kaaphavela okhuma mapuro ale. Nto aahikiwalela ekwartu emosa, uupuwelaka wira nkaarowa ophavela okhuma-tho.

Maferera ale yaahikikumiha mukhatteya, masi vaavo yoonale aya wira nlelo kaaniphavela okhuma opuro ole, yaahikiwalela-tho. Nuumala opaka eyo ikwaha 3, yaahimmye wira kaphavela okhuma kaahaana olepa masu ala: “Kinnikhuma mapuro ala maana kiniphavela omurumeela Satana, ohiya Muluku”. Masu awo khiyaareere okinanara. Tthiri kaaniphavela okhuma, masi nkaarowa olepa masu ale. Moottharelana kaahivekela olavula ni paatiri, kimuleela ele yiiraneyale. Nto Bispu aahimweemererya wira okittikiherye oZaragoza. Nuumala myeeri vakhaani, kaheemereriwa okhuma. Nave moohipisa, Lauri ni Ramoni yaahikhuma opuro ole.

ELIIVURU “YAAKHOOTTIHIWE”, YEEYO YAANIVALANNYE

Felisa: Muhoolo mwaya kaahitheliwa, nto kinarowa okhala oCantabria, eprovinsia ya wEspanya. Kaahivikaniha orowa okerexa. Ettiminku emosa, paatiri aahinanariwa nto khukhuwela oriki: “Nwehe eliivuru ela!” Aahinooniherya eliivuru eni: A Verdade Que Conduz à Vida Eterna. Vano khuhimya wira: “Akhala wira mutthu oovahiwa eliivuru ela, ohaana okivahererya aahiiso oriha”.

Miyo nkaarina eliivuru ele, nto kaaniphavela okhalana. Nuumala mahiku vakhaani, athiyana anli yaahirwa vate vaka. Awo yaari Anamoona a Yehova, nto khukivaha eliivuru ene yeele. Kaahisoma ohiiyu yoole. Okathi athiyana ale yaatthinke aya, yaahikikoha akhala wira kaaniphavela omusoma Biibiliya, miyo kheemya.

Okathi wotheene kaaniphavela omusiveliha Muluku. Nto kaahiixutta ekeekhai voohimya sa Yehova, kipacerya omphenta vanceene. Vano kaahiphavela waaleela atthu otheene voohimya sa Yehova. Mwaakha wa 1973, kaahibatiziwa. Kaanimananiha waaleela ekeekhai amusi aka. Masi amusi aka, vanceenexa muhima aka Araceli, aathipelela ohikupali oriki itthu sowoothiwa.

Araceli: Okhala wira nkaareere ohasuliwa opuro ole wa maferera, nkaasiveliwa ni etiini aka nnakhala ohakalala. Hata vaari siiso, kaanirowa okerexa khula Ettiminku ni omwiira Terso. Masi kaaniphavela omwiiwexexa Biibiliya ni kaaninvekela Muluku wira okikhaliherye. Nto Felisa aahikileela ele yiixutta awe voohimya sa Biibiliya. Aalavula moohakalala sookupali sawe, vano miyo koona wira oroovahuwa. Miyo nkaakupali ele yaahimya awe.

Nuumala-vo, kaahirowa ovara muteko oMadrid, opuro yoowo waatheliwaka. Nuuvira iyaakha sinceene, kaahoona wira ale yaarowa okerexa khiyeettela sowiixuttiha sa Yesu. Nto eyo yaahikiiriha ohiya orowa okerexa. Kaahihiya waakupali “masanto” aahiiso yowiixuttiha ya omooroni, ni kaanoona wira mapaatiri khaniwerya olevelela itampi. Nto kaahiriha ilatarato sotheene saarina aka. Masi nkaasuwela wira kaapaka etthu yooloka. Kaahinyoonyiheya, nlelo kinavikaniha onvekela Muluku kiriki: “Kiniphavela woosuwelani. Mukikhaliherye”. Nto kaahuupuwela wira ikwaha sinceene Anamoona a Yehova yaahirwa vate vaka, masi nkaatonko owaakhela. Maana khiivo etiini yaakupali aka.

Munnaka Lauri, aakhala oFrança, nto Ramoni aakhala wEspanya. Mwaakha wa 1980, awo yaahipacerya omusoma Biibiliya ni Anamoona a Yehova. Kaahaahimeerya wira awo yaahithweelela ntoko Felisa. Muhoolo, kaahipatthana Angelines yoowo aari namwaattamanani aka. Nave owo aari Namoona a Yehova. Nto Angelines ni iyawe yaahikikoha ikwaha sinceene akhala wira kaaniphavela omusoma Biibiliya naawo. Anamathelana ale yahoona wira nnaamwi kaahimya wira nkinisiveliwa ni etiini, tthiri kaaniphavela omusuwela Biibiliya. Vano kahaakhulela omusoma Biibiliya kiriki: “Khi vamwaha. Masi kihaana omurumeelaka Biibiliya aka!” Maana kaahikhalana Biibiliya a eversau ya Nácar-Colunga.

BIIBILIYA OONIIRAANIHA

Felisa: Okathi waabatiziwa aka mwaakha wa 1973, yaari Anamoona a Yehova 70 epooma ya oSantander, ekapitaali ya oCantabria. Vano nahaana weetta mikwaha soorakama wira naalaleerye atthu mapuro manceene a eprovinsia ele. Wanipacerya naarowa ni karera wira nalaleerye mittetthe iye, nto muhoolo mwaya naarumeela ekaaro ahu.

Mwa iyaakha sinceene, kinnaasomiha Biibiliya atthu anceene, nto 11 aabatiziwa. Atthu anceene asomanne aka Biibiliya, yaari maKatoolika. Nto kaahaana waapixerya murima. Ntoko miyo, awo yahaana oviriha okathi mpakha woona wira ele yaakupali aya khahiyo yaari ekeekhai. Kaahisuwela wira paahi Biibiliya ni munepa wootteela wa Yehova toniwerya omukhaliherya mutthu orukunuxa muupuwelo awe ni wiiwexexa ekeekhai. (aHéb. 4:12) Iyaka, Bienvenido, yoowo aari poliisia, aahibatiziwa mwaakha wa 1979, nave maama aka aahipacerya omusoma Biibiliya okathi vakhaani ohinatthi okhwa.

Araceli: Okathi waapacenrye aka omusoma Biibiliya ni Anamoona a Yehova, nkaakupali atthu ale. Masi nuuvira okathi, muupuwelo aka ole waahipacerya oturukeya. Kaahoona wira Anamoona ale khahiyo yaakiixuttiha Biibiiliya paahi, masi-tho yaaneettela ele yiixuttiha aya. Omwaamini waka Yehova ni Biibiliya waahipacerya wunnuwa, nto kaari oohakalala. Ale yaattamanne aka yahoona marukunuxo ala, khukihimeerya wira: “Nyuwo Araceli, nvikaniheke otthara ephiro ethanlale anyu!”

Kinnuupuwela kivekelaka so: “Kinnoxukhuruni Yehova, mwaha woohikinyanyala ni okikhaliherya ophwanya ele yaaphavela aka, eyo piiyo, osuwela ekeekhai ya Biibiliya”. Nave kaahinvekela munnaka Felisa wira okilevelele mwaha wa masu ale yaalavunle aka. Okhuma okathi ole, naahihiya ovaanyihana, masi naavaanela voohimya sa Biibiliya. Mwaakha wa 1989, kaahibatiziwa kirina ene iyaakha 61.

Felisa: Vano kirina iyaakha 91. Iyaka ohookhwa, ni miyo nkiniwerya opaka itthu sinceene ntoko khalai. Nlelo kinnimusoma Biibiliya khula nihiku, kinnirowa omuthukumanoni ni olaleerya moovarihana ni owerya waka.

Araceli: Vannikisivela waaleela mapaatiri ni maferera otheene voohimya sa Yehova, maana khalai kaari ferera. Vannireera ovaanela ni atthu awo, nto anceene anneemererya iliivuru ni irevista sahu. Vanceenexa kinnimuupuwela paatiri mmosa. Nuumala olavulana okathi vakhaani, aaheemererya masu aka. Nto khuhimya wira: “Miyo kihuuluvala. Nto mapaatiri makina ni amusi aka anrowa ohimya exeeni?” Kaahimwaakhula wira: “Ankhi Yehova onrowa woonela sai?” Aahoona ele yaahimya aka, nto kaahiweha oriipiwa wawe murima. Masi vaaninvila ohiya ele yeettela awe.

Kinnuupuwela okathi woohakalaliha mookumini mwaka. Waari okathi yoole iyaka aahimmye awe wira kiniphavela woottharani omuthukumanoni. Nnaamwi aarina iyaakha saavikana 80, vaavo aarwenle awe muthukumano woopacerya, khonacompele okhuma nihiku nne. Aahimusoma Biibiliya ni opacerya olaleerya ni muloko. Kinnuupuwela nrowaka hoothe olaleerya. Nto aakhwiiye sihalaka myeeri miili wira obatiziwe.

Felisa: Vaavo kaapacenrya aka omurumeela Yehova, axihima aka 3, khiyaasiveliwa ni miyo. Masi muhoolo mwaya, awo yaaheemererya ekeekhai. Tthiri eyo yaari etthu yuulupale yaakiiranenle miyo. Nuumala-vo, naahiviriha okathi munceene hoothe nilavulaka voohimya sa Yehova, Muluku onimphenta ahu, ni Nuulumo nawe! Wanikisa waya, otheene ahu nimmukokhorela Yehova.a