Mulaleeryeke Mohoova Mittetthe Siniiriwa Nakoso
1. Nthowa xeeni vahinitthuneya ahu okhumuwa akhala wira ninnoovelela olaleerya mittetthe siniiriwa nakoso?
1 Nyuwo munnoovelela olaleerya mittetthe siniiriwa nakoso? Akhala wira ti siiso, muhikhumuwe, maana pooti murummwa Paulo yoowo aari namalaleerya ohoova, aahaana ‘olipiha murima’ wira owerye olaleerya. (1 aTes. 2:2) Nto, nrowe niwehe mixankiho sikina ni nithokorerye moota wooxintta woova okathi ninlaleerya ahu mapuro aniiriwa nakoso.
2. Xeeni vahinitthuneya ahu oxanka wira ninrowa waanyoonyiha ale animwiira nakoso?
2 Niireke ti Vootthekeya Ovaanela ni Mutthu Onivara Muteko? Atthu anceene anivara muteko mapuro aniiriwa nakoso, annilipelela ikwaha sikina ohiya ele enivara aya wira evaanele ni mutthu mukina. Awo khanrowa onyoonyiwa, maana anrowa woonaka wira nyuwo muniphavela othuma etthu. Nto akhala wira munoowara saana, okhala oohakalala ni ootheya-theya, pooti ottittimihiwa.
3. Ninrowa osyaka sai waanyoonyiha alipa anithuma?
3 Kiireke wira Kihaana Olaleerya Ohoolo wa Atthu Anceene Anithuma? Vaaweryaneyaka, mulaleeryeke okathi yoole mulooxa ahinaatta aya atthu, ntoko okathi yoole ilooxa sinihuliwa aya. Mpaceryeke olavula vaavo xerenti wala mutthu oninweherya nakoso owo oryaawe mekhawe. Muhimaliheke okathi munceene mulavulaka.
4. Nihimyeke exeeni naalaleeryaka mapuro aniiriwa nakoso?
4 Nihimyeke Exeeni? Yakhala anamuteko anceene mulooxa mmo, mpaceryeke olavula ni xerenti. Pooti ohimya so: “Okhala wira orika waaphwanya atthu animwiira nakoso mmawannyeya, nto olelo va naarwenle wooxukuryani okathi vakhaani paahi omutekoni wanyu va. Koosuwela wira atthu anivara muteko, nto nkinrowa opisa”. Wira nihilikanyihiwe naatthu anitumiha etthu, ti vooloka ohihimya wira ninnaakhelela musurukhu onikhaliherya muteko ahu. Masi nakohiwa moota muteko ahu onikhaliheriwa aya pooti otthokiherya. Vaareerelaka, pooti onvekela xerenti owo wira mulavule vakhaani ni anamuteko akhwaawe. Nvaanele ni anamuteko awo etthu emosa-ru mwaalavula anyu ni xerenti. Mwamphwanya namuteko ohirina okathi mwaha wa miteko sawe, nvukule ele mwaaphavela anyu ohimya ni munvahe etratato. Pooti vahiweryaneyaka olavulana anamuteko akhwaawe, waaniheryasa munimweemereriwa ohiya iliivuru opuro yoole anamuteko anirumeela aya wira aphumurye, wala opuro mukina wooreerela.
5. Mathowa xeeni anniiriha olaleeryaka mapuro aniiriwa nakoso mohoova?
5 Hiyo nnoowerya omutakiha Yesu ni Paulo yaawo yaalaleerya atthu mohoova mapuro yiiriwa anakoso. (Math. 4:18-21; 9:9; Mit. 17:17) Munvekele Yehova wira ookhaliheryeni okhala oomaaleleya ni olipa murima. (Mit. 4:29) Olaleerya mapuro aniiriwa nakoso onooniiriha waaphwanya atthu anceene ahinaphwanya ahu mmawannyeya. Nto, nrowe neererye enamuna ela ya olaleerya wira niphwanye mireerelo sinceene.