Moota Woolaleerya Saana Mphironi
1. Enamuna xeeni ya olaleerya enitthuneya ahu omutakiha Yesu?
1 Okathi Yesu aalaleerya awe, khoovelela olavula ni atthu aakumana awe mphironi ni mapuro makina. (Luka 9:57-61; Yoh. 4:7) Yesu aanisuwela wira muhupi awe waari wa faita, tivonto aanaalaleerya atthu anceene aaphwanya awe. Olelo-va, olaleerya mphironi etthu yooloka eniwiiriha atthu omusuwela saana Muluku. (Mir. 1:20) Okhala a miruku ni osuwela opaceriha olavula, ti etthu enirowa onikhaliherya okhumela saana.
2. Opaceriha olaleerya mphironi, onitaphulela exeeni?
2 Mpaceryeke Olavula: Okhala wene, ti vooreerela opaceriha owaattamela atthu aniphavela ahu waalaleerya, ohiya weemela wala okilaathi nlipelelaka wira atthu awo anaattamele. Mutheyeke, munweheke moomaaleleya ni moopatthaneya ole oniphavela anyu omulaleerya. Akhala wira muri ni anamalaleerya akina, ti vooreerela namalaleerya mmosa olavula ni mutthu owo. Namphwanya mutthu onisiveliwa ekeekhai, ti vootthuneya ovikaniha omukhaliherya. Vaaweryaneyaka, mmukohe mwa nttittimiho moota womphwanya nihiku nikina. Akina, annilaleerya opuro omosaru ikwaha sinceene, wira yaaphwanye atthu yaatonko aya waalaleerya aphavelaka owiixuttiha Biibiliya.
3. Ninrowa okhala sai a miruku vaavo vanilaleya ahu mphironi?
3 Mukhaleke a Miruku: Mukhaleke a miruku vaavo vanithanla anyu opuro woweemela ni mutthu onireerela olavulana. Khivanitthuneya omulaleerya khuta mutthu onivira. Tivonto, muhaana okhala a miruku. Mwaamoona mutthu aakuveyaka, pooti okhala vooloka ohimweemexa. Mwaalaleeryaka mapuro aniiriwa nakoso, mukhalaneke ephoole wira muhaattiyeleleke alipa anitumiha. Ti vooreerela waalaleerya atthu nuumala okhuma nipuro yaathuma aya itthu, ohiya waalaleerya aphavelaka othuma itthu iyo. Nave-tho, muhaana owaattamelaka mwa nttittimiho wira muhaatutuxe. Mukhalaneke ephoole okathi wookawa iliivuru. Akhala wira atthu akina khansiveliwa vanceene, pooti waavaha etratato paahi.
4. Mireerelo xeeni nimphwanya ahu naalaleeryaka mphironi?
4 Olaleerya mphironi onnikhweiherya owiixuttiha atthu ekeekhai mwa okathi vakhaani. (Mus. 11:6) Atthu akina anaaphwanya ahu mphironi, pooti okhala yaale nihinaaphwanya ahu naalaleeryaka khuta empa. Tthiri, osuwela wiitthokiha onooniiriha olaleerya saana mphironi!