Munoowerya Olaleerya Makaaripi?
1. Moovarihana ni eliivuru ekina, okathi xeeni murummwa Paulo aalaleerya awe khula empa?
1 Moovarihana ni eliivuru Daily Life in Bible Times (Miteko sa Khuta Nihiku sa Arumeyi a Muluku a Okathi wa Khalai), murummwa Paulo aanilaleerya khula empa “okhuma 16 hora mpakha wiila”. Ekeekhai wira khaninsuwela saana eprokrama ya Paulo, masi ninnisuwela wira owo ‘anira itthu . . . sothene mwaha w’Ehapari Yorera’. (1 aKor. 9:19-23) Eyo enitaphulela wira owo aanimpaka palano wira orowe olaleerya khula empa okathi waaphwanyaneya atthu.
2. Xeeni makaaripi oryaaya okathi wooreerela olaleerya?
2 Mapuro manceene, anamalaleerya aalimalela orowa olaleerya voosisu khula empa. Niireke nlelo muttetthe anyu ti vooreerela opaka eyo? Pioneero mmosa olavulaka sa muttetthe awe onihimya so: “Ti voovila waaphwanya atthu mmawannyeya voosisu. Masi, anamunceene aniphwanyaneya makaaripi”. Olaleerya makaaripi pooti onikhweiherya waalaleerya alopwana. Nave-tho, okathi owo axineene itthoko aniira aphumuryaka ni ophavela ovaanela. Nto, akhala wira vannireerela opaka eyo, axitokweene ahaana olokiherya mithukumano sa orowa olaleerya makaaripi.
3. Ninrowa okhala sai a miruku okathi ninlaleerya ahu makaaripi?
3 Mukhale a Miruku: Vaavo munilaleerya anyu makaaripi, muhaana okhala a miruku. Mwa ntakiheryo, akhala wira khivanireerela omulaleerya mutthu mwaha woowiila, ti vooreerela otthika okathi mukina. Akhala wira vaaripa, mweemeleke opuro yoole mwaneene etthoko okhanle awe owoowehani, nto voohipisa muhimyeke nsina nanyu ni etthu yaarwenle anyu. Nave-tho, ti vamiruku ovara muteko ni mutthu mukina wala ekrupu ni okhala muttetthe wooreerela. Nto muhilaleeryeke okathi woohireerela, ntoko variipale ene khihiyooneya saana. (2 aKor. 6:3) Akhala wira muttetthe owo onnoopiha olaleerya variipale ene, mulaleeryeke vahitempe wiila.—Mir. 22:3.
4. Mareeliho xeeni ninrowa ahu ophwanya nalaleerya makaaripi?
4 Mareeliho: Muteko woolaleerya onnihakalaliha vanceene akhala wira ninnimananiha olaleerya. Nto, akhala wira ninnimananiha, nnookhalana eparakha yoowakhaliherya akina wira “esuwele ekekhai” ni yoopowe. (1 Tim. 2:3, 4) Niireke mookhala oowiitthokiha wira mulaleerye makaaripi?