Murumeeleke Saana Okathi Anyu Mmutekoni Woolaleerya
Mwaakha wa muteko wa 2014, Anamoona a Yehova aaviriha iwoora 1.945.487.604 elaleeryaka. Eyo enooniherya wira ninniluttuweliwa mmuteko wa Yehova! (Esal. 110:3; 1 aKor. 15:58) Okhala wira “okathi onnihalela ori vakhani”, niireke vanniweryaneya orumeela saana okathi ahu mmuteko woolaleerya wira nivaanele ni atthu anceene?—1 aKor. 7:29.
Orumeela saana okathi ahu mmuteko woolaleerya onivekela opaka marukunuxo. Akhala wira ikwaha sikina munniviriha ewoora emosa wala ovikana-vo, nvaraka muteko woolaleerya, masi voohilavula ni mutthu, niireke munnipaka marukunuxo wira mulavule ni atthu anceene? Ekeekhai wira mikhalelo sinnivirikana khula muttetthe. Masi malakiheryo anittharelana animookhaliheryani orumeela saana okathi anyu ni osyaka ‘omana epheyo’.—1 aKor. 9: 26.
• Olaleerya Khuta Empa: Mwa iyaakha sinceene, anamalaleerya aalimalela opaceriha muteko aya woolaleerya erowaka khuta empa. Okhala wira anamunceene anivara muteko voosisu wala othana, vaamureera omananiha olaleerya khuta empa makaaripi aahiiso okathi mukina vaavo atthu anikhala aya owaani wala aniphumurya aya. Voosisu wala makaaripi, olaleerya mphironi wala mapuro aniiriwa nakoso, onnikumiherya mireerelo.
• Olaleerya Mapuro Otheene Ari Atthu: Meesa wala ekarinyu erina iliivuru, ahaana opwehiwa opuro onivira atthu anceene mmuttettheni wa muloko. (Nwehe Orummwa Ahu wa Omwene, Julyo 2013 epax. 5.) Akhala wira mapuro awo anivira atthu vakhaani, Ekomisau ya Muteko ya Muloko pooti opweha meesa wala ekarinyu eyo opuro mukina anivira atthu anceene.
• Otthikela Oxukurya ni Wiiriha Soosoma sa Biibiliya: Niireke vanniweryaneya otthikela oxukurya wala wiiriha soosoma sa Biibiliya okathi inamuna sikina sa olaleerya sihinikhumela aya saana? Akhala wira olaleerya khuta empa onikumiherya mureerelo eSaabadu voosisu, muhaana opaka mareheryo wira soosoma sanyu mwiiriheke makaaripi. Okathi munipaka anyu mikwaha sootthikela, niireke anna pooti okawanyiwa mwa igrupu saamukhaani wira olaleerya otepeke okhumela saana?
Hiyo ninnikontari okathi ninrumeela ahu nilaleeryaka, masi ohakalala wahu onnincerereya vaavo nnaaphwanya ahu atthu. Akhala wira munoona wira enamuna ya olaleerya enirumeela anyu okathi mukina khenikumiherya mireerelo, muhaana orumeela enamuna ekina. Munvekele Yehova “mwanene ematta” wira oovaheeni malakiheryo awe wira nweryeke orumeela saana okathi anyu mmuteko woolaleerya.—Math. 9:38.