Enamuna Esya ya Olaleerya Mapuro Otheene Ari Atthu
1. Miloko seiye sirina mittetthe sinivira atthu anceene, sintumereriwa opaka exeeni?
1 Miloko sirina mittetthe sinivira atthu anceene, sinnitumereriwa olaleerya mittetthe iyo, sirumeelaka estande wala ekarinyu erina iliivuru. Akhala wira enirumeeliwa ekarinyu, munna mmosa pooti okhala opuro owo, vaavo munna mukina onilaleerya awe vakhiviru. Masi yarumeeliwa estande, anna anli ahaana okhala opuro owo. Ale athanliwe olaleerya mapuro awo akhaleke oophenta, oopatthaneya, ni anisuwela ovaanela. Akhala wira mutthu onimwaattamela, munna mmosa pooti opacerya ovaanela ni yena, oriki: “Kiireke mootoko wiikoha ele Biibiliya onixuttiha awe mmwaha ola?” Anna anilaleerya vakhiviru, ahaana ovahaka ephoole ekarinyu eyo wira yaaakhaliheryeke atthu vooreerela.
2. Muhimye yowiiraneya enooniherya otthuneya waya olaleerya nirumeelaka ekarinyu wala estande.
2 Olaleerya nno onnikumiherya soosoma sa Biibiliya. Mwa ntakiheryo, musomi mmosa a Universidade aahithanla olepa mwaha voohimya sa Anamoona a Yehova, masi khiwaasuwela moota woophwanya Empa ya Omwene. Nuuvira esumana emosa, aahiweha estande yaari iliivuru vate va Universidade. Aahipacerya omusoma Biibiliya, nto olelo-va owo murokora ni onnilaleerya orumeelaka enamuna ela.
3. Anamalaleerya akina anoonela sai olaleerya mapuro otheene ari atthu?
3 Murokora mmosa onilaleerya orumeelaka enamuna ela, ohimmye so: “Atthu akina anneemela wira ekuxe erevista. Akina khaatonko wiiwa sa Anamoona a Yehova. Enamuna ela ennikhaliherya waalaleerya atthu anci”. Murokora mukina oni: “Enamuna ela esya ti yoohakalaliha mwaha woowi atthu annoorwa opuro ori anyu, hata ahiphavelaka omusoma Biibiliya”.
4. Xeeni vaniloka aya opweha estande wala ekarinyu okathi ni opuro omosaru khuta esumana?
4 Akhala wira khuta esumana estande eyo wala ekarinyu ennipwehiwa opuro, mahiku ni okathi omosaru, atthu anoolimalela ni animoona okhweya waattamela opuro owo wira epake makoho wala oveka iliivuru. Niireke muloko anyu onnilaleerya mapuro otheene ari atthu? Waaniheryasa munoowerya wiirela mpantta enamuna ela yoohakalaliha ni yooreera ya ‘olaleya omwene wa Muluku’.—Luka 9:60.