Etthu Enikhaliherya Tthiri Itthoko
1. Waakhalihenrye sai itthoko sa aIsarayeli murehereryo wa eSaabadu khula esumana?
1 Yooruma ya eSaabadu yaari murehereryo woophenta wa Yehova mmureerelo wa itthoko. AIsarayeli yaanimumulela miteko saya wira akhalane okathi wowuupuwelela oreera murima wa Yehova ni wataana waarina aya n’uwo. Anamuyari yanwerya ottottela muraarelo okathi ole wira awiixuttiheke anaaya Nlamulo na Muluku. (Otum. 6:6, 7) Murehereryo wa eSaabadu wa khula esumana waaniwiiriha atthu a Yehova olipiha wataana waya ni Muluku.
2. Yooruma ya eSaabadu enniixuttiha exeeni voohimya sa Yehova?
2 Ekeekhai wira olelo-va, Yehova khonivekela wira itthoko seetteleke yooruma ya eSaabadu. Masi, yooruma eyo enniniixuttiha etthu voohimya sa Muluku ahu. Owo onnicalela vanceene okhala saana wa atthu awe mmukhalelo womunepani. (Yes. 48:17, 18) Olelo-va, Yehova onnooniherya oniphenta wawe okumiheryaka murehereryo wa okhalana okathi wa Omulompa Muluku Vatthokoni.
3. Tiivi eri yoolakela ya okathi wa Omulompa Muluku Vatthokoni?
3 Tiivi Eri Yoolakela ya Okathi wa Omulompa Muluku Vatthokoni? Okhuma Janero 2009, Yowiixutta ya Eliivuru ya Mmulokoni yaahipacerya wiiriwa vamosa ni Exikola ya Orummwa wa Muluku ni Muthukumano wa Orummwa. Murehereryo ola opakiwe wira itthoko silipihaneke momunepani, vaavo khula esumana vanikhalana aya okathi wa omulompa Muluku vatthokoni. Khuta etthoko yaahitumereriwa wira yiireke yoosoma aya ya etthoko okathi yoole khalai wiiriwa yowiixutta ya eliivuru. Nto, vaakhalelaka, pooti orumeela okathi yoole wiiriwa yowiixutta eyo wira athokorerye myaha sa Biibiliya moohaakuva ni wira yoosoma eyo moovarihana ni sootthuneya sa etthoko.
4. Niireke wira okathi wa Omulompa Muluku Vatthokoni okhaleke wa ewoora emosa paahi? Mutthokiherye.
4 Wira nirowe Yowiixutta ya Eliivuru ya Mmulokoni, hiyo nahaana ophwanya okathi wowiilokiherya, weetta mukwaha, ni itthu sikina. Anceene a hiyo wira arowe yoosoma eyo ya ewoora emosa, yaaniviriha iwoora sinceene yiireheryaka, ni weetta mukwaha woorowa ni otthika. Nto, murehereryo ola musya wa mithukumano, onninivaha okathi munceene nihiku nno wira nimulompeke Yehova vatthokoni vahu. Ti maana aya, okathi wa Omulompa Muluku Vatthokoni khonitaphulela wira okhaleke wa ewoora emosa paahi. Masi, nohaana wuupuwelaka sootthuneya ni owerya wa atthu a vatthokoni vahu, nto khiyamaliha okathi moovarihana ni mikhalelo iyo.
5. Niireke wira etthoko yohaana omalihaka okathi wotheene hoothe? Mutthokiherye.
5 Okathi Wotheene Othokoreriweke Mwaha Mmosa Paahi? Vaavo anamathelana ni itthoko seiye sirina anamwane vanithokorerya aya hoothe myaha sa Biibiliya, awo annilipihana. (aRom. 1:12) Nto etthoko enniiraana. Ovaanela myaha sa Biibiliya ohaana okhala etthu yuulupale okathi wa Omulompa Muluku Vatthokoni. Masi, khuta mutthu vatthokoni ohaana-tho okhalana yoosoma awe. Mwa ntakiheryo, nuumala wira yoosoma eyo hoothe, atthu awo pooti ovikaniha olompa iwo masi khula mutthu iiraka yoosoma awe, khino oreheryaka mithukumano wala osoma irevista. Itthoko sikina khasinimulikari televisau wala raadio nuumala yoosoma eyo.
6. Yiiriweke sai yoosoma eyo?
6 Yiiriweke Sai Yoosoma eyo? Yoosoma eyo ehikhaleke ya makoho ni waakhuliwa paahi. Itthoko sinceene sinnipaka eprokrama ntoko siniiriwa aya mithukumano sikina sa muloko, wira okathi wa Omulompa Muluku Vatthokoni okhale woolipiha ni woohakalaliha. Itthoko iyo sinnikhalana iponto sinceene sa omulompa Muluku, nto khuta eponto ennikhalana okathi onithokoreriwa aya. Mwa ntakiheryo, pooti omusoma Biibiliya hoothe, oreherya mithukumano sikina, ni winsayari inamuna sikina sa olaleerya. Nwehe malakiheryo makina epaaxina 6.
7. Mukhalelo xeeni anamuyari onitthuneya aya wooniherya okathi wa yoosoma?
7 Anamuyari Yooniheryeke Mukhalelo Xeeni? Etthoko anyu enoottottela mureerelo yoosoma eyo, akhala wira atthu awo anikhala ootaphuwa ni oophentiwa. Vaareerelaka, okathi mukina yoosoma eyo pooti wiiriwa opuro mukina wookhalela. Pooti omumulela okathi vakhaani vaavo vaniira anyu yoosoma eyo. Nuumala yoosoma, itthoko sikina sinnilokiherya etthu yoolya. Anamuyari ahaana osyaka orumeela okathi wa Omulompa Muluku Vatthokoni aphavelaka opwapwela wala ovaha yoolaka, nto pooti orumeela okathi mukina wira athokorerye muxankiho woonenle aya. Hata vari siiso, ti vooloka othokorerya mwaha owo ni mwaana owo paahi, okathi yoole anamwane akina ahikhanle aya wira muhimuulihihe muru. Okathi wa Omulompa Muluku Vatthokoni mmananihe wira okhale woohakalaliha ni wookuxa murima, maana Muluku onimukokhorela ahu toohakalala.—1 Tim. 1:11, Tradução do Novo Mundo.
8, 9. Ahooleli a itthoko alokiheryeke sai yoosoma?
8 Muhooleli a Etthoko Olokiheryeke Sai Yoosoma eyo? Etthoko enoottottela mureerelo okathi wa Omulompa Muluku Vatthokoni, akhala wira muhooleli a etthoko onnireherya vahinatthi ele enrowa othokoreriwa ni othanla moota sinrowa aya othokoreriwa. (Mir. 21:5) Nto, ti vookhalela mulopwana omukoha mwaarawe ele enireerela othokoreriwa. (Mir. 15:22) Nyuwo anamuyari, xeeni ohaakohaka aniinyu etthu enoona aya oreerela othokoreriwa? Mwapaka eyo, munoophwanya itthu sinaasivela wala waaxankiha.
9 Eyo enoomwiiriha muhooleli a etthoko osyaka omaliha okathi munceene olokiheryaka yoosoma ya khula esumana. Akhala wira etthoko eyo ethanlale osoma eliivuru emosaru khula esumana, muhooleli a etthoko khonitthuneya omakelaka oruuha eprokrama esya. Nuumala khuta yoosoma, owo pooti woona okhala vookhalela olokiherya yoosoma enittharelana, nlelo uupuwelaka sootthuneya somunepani simanle awe woona. Ahooleli akina a itthoko annilepa itthu vakhaani sinireerela othokoreriwa ni opweha opuro atthu a vatthokoni aniwerya aya woona, ntoko vageleirani wala vaxirini. Opaka eyo, onowuupuxerya atthu awo ni waakhaliherya wira yiireherye akhala wira vannireerela.
10. Ale anikhala mekhaya arumeeleke sai okathi wa Omulompa Muluku Vatthokoni?
10 Sai Akhala Wira Kiri Mekhaka? Ale anikhala mekhaya pooti orumeela okathi wa Omulompa Muluku wira yiire yowiixutta aya. Eprokrama eyo pooti ohela muhina omusoma Biibiliya, oreherya mithukumano, ni osoma irevista A Sentinela ni Despertai! Anamalaleerya akina annihela muhina ophavela otokosa itthu sihiniiwexexa aya saana. Okathi mukina, pooti omulattula namalaleerya wala etthoko ekina wira athokorerye hoothe yoosoma eyo ni olipihana momunepani.
11, 12. Mareeliho xeeni anikhumelela mmurehereryo wa Omulompa Muluku Vatthokoni khula esumana?
11 Mireerelo Xeeni sa Okathi wa Omulompa Muluku Vatthokoni Khula Esumana? Otheene yaale anaakhulela ekeekhai ni murima wotheene annimwaattamela Yehova. Nave-tho, itthoko seiye sinimulompa Yehova hoothe sinnilipihana. Voohimya sa mareeliho arina aya vatthokoni, munna mmosa ni mwaarawe aahimmye so: “Nnaamwi nri mapioneero ahirina anamwane, ninnilipelela moohakalala okathi wa Omulompa Muluku Vatthokoni. Okathi owo onnikhaliherya vatthokoni vahu ni onnilipiha wataana orina ahu ni Tiithi ihu a wiirimu. Nto, vaavo vanoona ahu wira noophiya nihiku na yoosoma ahu, hiyo ninkohana so: ‘Munnuupuwela etthu enipaka ahu olelo? Waakhula onikhala so: Nnimulompa Muluku vatthokoni!’”.
12 Nave-tho, murehereryo wa omulompa Muluku vatthokoni onnikhaliherya itthoko sowaatteliwa miteko. Maama mmosa onaahuwa anaawe anli aaxilopwana ni onirumeela ntoko pioneero olempe so: “Khalai, yowiixutta ahu ya etthoko khiyeetta saana. Khiyaamakeleleya ni khiniira khula esumana okhala wira kaakhala ootemwa. Nkaasuwela etthu yoowiira. Kinnilepa moolumo ala kiphavelaka oxukhuru murehereryo ola wa okathi wa Omulompa Muluku Vatthokoni. Vano nookhalana khula esumana yowiixutta ahu, ni ninniphwanya mareeliho manceene”.
13. Olipa momunepani wa etthoko anyu, onlipa ni xeeni?
13 Ntoko yooruma ya eSaabadu khalai, murehereryo wa okathi wa Omulompa Muluku Vatthokoni ti yoovaha ya Tiithi ihu a wiirimu wira okhaliheryeke itthoko. (Yak. 1:17) Olipa momunepani wa aIsarayeli, waalipa ni moota waarumeela aya nihiku na eSaabadu. Moolikanasa, naphavela olipiha itthoko sahu momunepani, nohaana orumeela saana murehereryo wa omulompa Muluku vatthokoni. (2 aKor. 9:6; aGal. 6:7, 8; aKol. 3:23, 24) Mwarumeela saana murehereryo ola, etthoko anyu enoowerya olavula ntoko nasaalimo aahimmye so: ‘Vano miyo, . . . kinowattamelani: Apwiya, miyo kinimotthyawelelani’.—Esal. 73:28.
[Eponto yuulupale epaaxina 5]
Okathi wa Omulompa Muluku Vatthokoni mmananihe wira okhale woohakalaliha ni wookuxa murima, maana Muluku onimukokhorela ahu toohakalala
[Ekaaxa epaaxina 6]
MUSUKE
Inamuna Sikina sa Moota Woomulompa Muluku Vatthokoni
Biibiliya:
• Musomeke hoothe yoosoma ya Biibiliya ya khuta esumana. Akhala wira yoosoma eyo enilavuliwa ni atthu oovirikana, mutthu mmosa pooti osoma mapuro a namatthokiherya, nto akina pooti osoma attharihelaka moolumo a atthu akina.
• Mutakiheryeke ele enisoma anyu mBiibiliyani, mpakaka ntoko edrama.
• Khula mutthu vatthokoni-vo munvaheke ekapiitulu enrowa awe osoma mBiibiliyani ni mulepe nikoho nimosa wala manli a khuta kapiitulu. Vano mutokoseke hoothe wira musuwele waakhuliwa waya.
• Khuta esumana mulepe vakartauni yoolepa ya Biibiliya ni mweererye otthokelela ni otthokiherya masu a yoolepa eyo. Mutakaahe ikartau iyo, vano muuluuleke khuta esumana wira moone soolepa siniwerya nyu otthokelela.
• Nwiriyaneke ekaravasau ya Biibiliya muttharaka osommwa waya mBiibiliyani mwanyu.
Mithukumano:
• Mureheryeke mithukumano hoothe.
• Mwinsayariki masipo a Omwene anrowa wimpwa esumana enittharelana.
• Akhala wira mutthu oovahiwa mwaha mmuthukumano wa Exikola ya Orummwa wa Muluku ni Muthukumano wa Orummwa, pooti oreherya hoothe ele enrowa anyu olavula, wala winsayari ohoolo wa etthoko yotheene.
Sootthuneya sa Etthoko:
• Muthokoreryeke myaha siri muliivuruni Os Jovens Perguntam aahiiso Aprenda do Grande Instrutor.
• Mwinsayariki moota woothokorerya mixankiho aahiiso makoho khino aniwerya okhumelela oxikola.
• Mwinsayariki ni aniinyu, masi muturukanaka, eyo piiyo, nyuwo wala aniinyu akhalaka mwaneene etthoko. Nuumala-vo, anamwane aphavelase otokosa mwaha mukina ni waatthokiherya anamuyari aya ele ephwannya aya.
Muteko Woolaleya:
• Mwinsayariki moota onrowa anyu olaleerya wanimala wa esumana.
• Muthokorerye soolukama siniweryaneya wa atthu a vatthokoni-vo, moophavela wuncererya muteko aya woolaleerya okathi wa wuupuwelela okhwa wa Yesu wala okathi wa ifeeriya.
• Mpake marehereryo wira khula mutthu a etthoko eyo okhalane okathi wowiilokiherya wira aakhule makoho khino anipakiwa naalaleeryaka, nto mwinsayariki hoothe.
Malakiheryo Makina:
• Musomeke hoothe myaha sikina sa irevista sa niinano.
• Khula mutthu a vatthokoni pooti osoma vahinatthi mwaha yoole onimusivela wa irevista sa niinano, nto owo pooti orowa ohimya ele esomme awe.
• Okathi mukina pooti omulattula namalaleerya mmosa wala anamathelana wira mukhale hoothe okathi wa Omulompa Muluku Vatthokoni, ni pooti waakoha wira ahimye sookumanana saya.
• Nwehe iviidiyu sahu ni mulavulase sa ele yoonale anyu.
• Muthokorerye hoothe myaha sa erevista Despertai! sini: “Os Jovens Perguntam” wala “Para Considerar em Família”.
• Muthokorerye hoothe myaha sa erevista A Sentinela sini: “Ensine Seus Filhos” wala “Para os Jovens”.
• Musome ni muthokorerye ittima sa Anuário musya wala iliivuru sikina sikumiheriwe okonkresuni ookiserya.
• Nuumala orowa okonkresuni wala osembleyani, muuluuleke iponto suulupale siixuntta anyu.
• Nweheke soopattuxiwa sa Yehova ni mphaveleke osuwela ele enniixuttiha aya voohimya sa Yehova.
• Mpakeke itthu hoothe, ntoko maapha, elatarato, aahiiso etabela.