Omulompa Muluku Vatthokoni Exeeni Enireerela Opaka Wira Okhale Woohakalaliha?

Paapa mmosa oBrasil onihimya so: “Hiyo napacerya Omulompa Muluku Vatthokoni vosiilo, ninnirowana mpakha ohiyu akhala wira nkinhimya wira nimaleleke vaava”. Paapa mukina oJapão, onihimya wira mwanawe mwaamulopwana orina iyaakha 10, onikhala ntoko wira khonoona okathi oviraka, vannimusivela ovikaniha osoma. Mwaha wa xeeni? Paapa awe onihimya so: “Ehaavo etthu enimusivela nto khiyaphavela ovikaniha osoma”.

Ekeekhai wira khahiyo anamwane otheene annisiveliwa mmoota owo, akina woonasa wene khanoona oreera Omulompa Muluku Vatthokoni. Nto exeeni eniwiiriha? Namuyari mmosa oTogo onitthokiherya so: “Omulompa Muluku Vatthokoni ohikhaleke wookhulumula”. Nto akhala wira ti wookhulumula, niireke moota oniirihiwa aya tohikhanle saana? Imusi sinceene sihoona wira omulompa Muluku ohaana okhala ntoko Yesaya saahimmye awe wira ekhaleke ntoko eSaabadu ya “otteliwa murima”.​—Yes. 58:13, 14.

Anamuyari anceene ahoona wira yaphavela wira emusi aya ekhale yoohakalala okathi wa omukokhorela Muluku vatthokoni atthu otheene ahaana okhala ootaphuwa. Ralf yoowo orina aana axithiyana araru ni mmiravo mmosa, onihimya wira okathi aya wa omulompa Muluku vatthokoni onikhala ntoko okathi wovaanela paahi, ohiya ntoko okathi woosoma, nto eyo ennaakhweiheirya atthu otheene wiirela mpantta. Masi khivanikhweya ovikaniha okhala oohakalala okathi wotheene onisommwa. Maama mmosa onihimya so: “Nkiniwerya khula okathi owiiriha atthu a vatthokoni vaka okhala oohakalala okathi woomulompa Muluku ntoko saaphavelaka”. Niireke munoowerya ovikana muxankiho owo?

MUHIMAKELEKE OPAKA ETTHU EMOSA

Paapa mmosa orina anamwane anli wAlemanha, onihimya so: “Hiyo khinnimakela opaka etthu emosaru”. Natalia yoowo orina anamwane anli, onihimya so: “Etthu yootepexa otthuneya vatthokoni vaka, ori omakela opaka itthu soovirikana, khula ekwaha enisoma ahu”. Imusi sinceene sinnikawanya okathi aya woomulompa Muluku vatthokoni, khukhala ipantte sinceene. Cleiton yoowo orina anamwane anli oowunnuwela, onitthokiherya so: “Eyo enniiriha osoma wahu okhala wookuxa murima, nave atthu otheene vatthokoni anniirela mpantta”. Mwaha wookawanya okathi, anamuyari anniwerya omuthokorerya khula mwaana, akhala wira iyaakha saya ti sootepa ovirikana. Anamuyari pooti othanla yoosoma moovarihana ni sootthuneya sa khula mutthu a vatthokoni, nto khiyakhweiherya yoosoma eyo.

Nto imusi sikina sinipaka exeeni wira siphwanye myaha soovirikana sinireerela othokorerya? Imusi sikina omulompa waya Muluku vatthokoni onipacerya ni wiipa isipo sa Yehova. Juan oMéxico onihimya so: “Wiipa nsipo onniwiiriha atthu otheene ohakalala ni vannikhweya olokiherya muupuwelo voohimya sa ele enrowa othokoreriwa”. Emusi eyo, ennithanla isipo sinivarihana ni ele enirowa othokoreriwa nihiku nlo.

Imusi sinceene sinnisoma hoothe epantte emosa ya Biibiliya. Mwaha woophavela opaka itthu soovirikana, epantte enisommwa mBiibiliyani ennikawanyiwa, nto khuta mutthu khiyasoma epantte emosa. Paapa mmosa oJapão onihimya wira oona okhala “etthu yoovila omusoma Biibiliya moota owo wuupaceryani”. Masi anaawe anli vaahaasivela waaweha anamuyari aya yaahelaka mpuwa anaaya. Imusi sikina sinnipaka edrama ya myaha sa Biibiliya. Roger yoowo orina anamwane anli wAfrica do Sul oni: “okathi mukina anamwane anniwerya woona etthu emosa enihimmwa mwa yowiiraneya ya mBiibiliyani yeeyo anamuyari aya ehiwenrya aya woona”.

Enamuna ekina yohimakela opaka etthu emosa, ori opaka itthu hoothe odesenyari wala opaka itthu ntoko ekalawa ya Nowe aahiiso, etemplo ya Solomoni. Ovara miteko ntoko iyo onivekela otokosa vanceene weiwo onikumiherya ohakalala. Mwa ntakiheryo vasaala va empa emosa wAsia yaahithukumana emusi emosa yeeyo yaarina mwaana muthiyana a iyaakha thanu, anamuyari, ni apiipi awe. Awosa yaamwiira xooku a mikwaha sa omisionaario sa murummwa Paulo. Imusi sikina sihaapaka axooku aya anikhuma mmyaha sa eliivuru ya Okhuma. Donald orina iyaakha 19, yoowo onikhala oTogo oni: “Opaka itthu soovirikana okathi woomulompa Muluku vatthokoni wookumiherya etthu esya yohakalaliha vatthokoni vahu”. Niireke yookhala etthu enuupuwela anyu ekhanle anyu oopaka wira yiirihe okathi anyu wa omulompa Muluku okhala woohakalala?

WIILOKIHERYA TI WOOTTHUNEYA

Vanaamwi opaka itthu soovirikana okumiheryaka ohakalala okathi woomulompa Muluku, masi wira mireerelo sikhumele saana, atthu otheene ahaana wiilokiherya. Okathi mukina anamwane annikhulumuwa, tivonto anamuyari ahaana wuupuwela saana myaha sinrowa aya othanla ni waavya okathi wira yiilokiherye. Paapa mmosa onihimya so: “Kailokiherya saana khula mutthu onniphwanya mureerelo”. Paapa mukina wAlemanha sihalaka isumana sinceene onnaaleela atthu a emusi awe mwaha onrowa othokoreriwa. Okathi onuupuwela awe onweha ni emusi awe DVD a myaha sa Biibiliya, paapa mmosa orina anamwane 6 oBenin onnaakawela vahinatthi makoho a eviidiyu eyo. Aayo, wiilokiherya oratteene onnikumiherya mireerelo sinceene etthoko ahu.

Akhala wira atthu awo annisuwela vahinatthi myaha sinrowa othokoreriwa, awo anovaanelaka sa mwaha owo esumana eyo, nto eyo enowiiriha osiveliwa. Akhala wira khula mutthu onnivahiwa etthu yoopaka, khuta mutthu onrowa woonaka wira tthiri onnipaka etthu okathi womukokhorela Muluku.

MWIIMANANIHE OHICOMPELA

Imusi sinceene sinnoona okhala vooxankiha omulompa Muluku vatthokoni voohicompela.

Anamuyari anceene ahaana ovara muteko iwoora sinci wira aphwanye itthu sinitthuneya. Mwa ntakiheryo paapa mmosa oMéxico onivenya 6 hora ya vosiisu nto onitthika ohiyu viilaleene. Ikwaha sikina vanitthuneya omurukunuxa programa aya mwaha wa sowiireya sikina sa mmulokoni.

Hata vari siiso, nihaana wiimananiha wira nihicompele omukokhorela wahu Muluku vatthokoni. Loïs yoowo orina iyaakha 11, onikhala oTogo, olavulaka sa wiimananiha wa emusi awe oni: “Nnaamwi ikwaha sikina nipaceryaka viilaleene mwaha wa etthu ekina enikhumelela nihiku nlo, ninnimananiha ohicompela”. Tivonto imusi sikina vanithanla aya omulompa Muluku vatthokoni wuupaceryani wa esumana. Akhala wira ehaavo etthu enikhumelela mootutuxerya, annimuturuka programa aya khiyakhala nihiku nikina esumana yeele.

Ntoko sinooneya aya yoolakela ya omulompa Muluku vatthokoni, eyo eri epantte anyu ya omukokhorela Yehova. Nto nwiirihe atthu otheene a emusi anyu, onvaha Yehova moolumo aya “ntoko mukuttho wa inyompe” khuta esumana. (Hos. 14:2) Nto owo okhale okathi woohakalaliha tthiri wa etthoko yotheene mwaha woowi ‘otteliwa murima onrwa wa Yehova t’unkhala ikuru sanyu’.​—Neh. 8:9, 10.

[Ekaaxa epaaxina 19]

OMULOMPA WANYU MULUKU VATTHOKONI OHAANA OKHALA:

Woohikhulumula

Woohimakela opaka etthu emosaru

Soowiira soovirikana

Woolokiheriwa saana

Woohicompela