“Mulaleyeke [Moomalela] Ehapari Yorera”
1. Ntakiheryo xeeni nooloka Paulo ovanhe awe wa muteko woolaleerya?
1 “Munvareleke Muluku muteko womalela”. (2 Tim. 4:5) Murummwa Paulo aanilavula moolumo ala mohoova etthu, vaavo aamutumererya awe Timootheyo. Tthiri, eriyari ya iyaakha 47 ni 56 E.C., murummwa Paulo aahimaleliha mukwaha wa neeraru wa omisionaario. Eliivuru ya Miteko ennihimya ikwaha sinceene wira Paulo aahilaleerya moomalela. (Mit. 23:11; 28:23) Ninrowa omutakiha sai olelo-va?
2. Ninrowa olaleerya sai moomalela khuta empa?
2 Olaleerya Khuta Empa: Wira naalaleerye atthu ahitonko wiiwa ihapari sooreera, nihaana waaxukuryaka okathi woovirikana. Nto, pooti omphwanya mwaneene etthoko makaaripi wala wuumalani wa esumana. Nave, nihaana wiimananiha olavula ni mutthu khula empa, nixukuryaka moohihiyererya hata ipa ahikhanle atthu. Ankhi akhala wira wiimananiha wanyu waaphwanya atthu khonikhumela saana? Waaniheryasa, olepa ewarakha wala omurumeela telefoni pooti okumiherya mireerelo.
3. Iparakha xeeni nyuwo murina anyu wira mulaleerye mapuro ari atthu ni mohiilokiherya?
3 Olaleerya Mapuro Ari Atthu ni Mohiilokiherya: Olelo-va, arumeyi a Yehova ‘annasuweliha’ ekeekhai atthu otheene aniphavela wiiwa. Ikwaha sikina, awo annipaka eyo “mphironi” wala mapuro makina ari atthu. (Mir. 1:20, 21) Niireke okathi ninvara ahu miteko sahu sa khula nihiku ninnuupuwelela olaleerya? Niireke atthu akina annoona wira ‘ninnìvahererya olalerya’? (Mit. 18:5) Akhala ti siiso, hiyo ninnivara muteko orummwale ahu wa ‘olaleya [moomalela] ehapari yorera’.—Mit. 10:42; 17:17; 20:20, 21, 24.
4. Moota xeeni ovekela ni wuupuwelela onikhaliherya aya olaleerya moomalela?
4 Ikwaha sikina, mwaha wa otteettheya wahu wala woova, pooti oniiriha ohoverya olaleerya. Tthiri, Yehova onnisuwela makhalelo ahu. (Esal. 103:14) Masi, wakhumelela okathi, nihaana onvekela wira onilipihe wira nilavule mohoova. (Mit. 4:29, 31) Nave-tho, okathi nimpaka ahu yoosoma ahu ni wuupuwelela Nuulumo na Muluku, nihaana ophavelaka wunnuuherya ovaha wahu efaita ihapari sooreera. (aFil. 3:8) Opaka eyo, onooniiriha olaleerya mooluttuweliwa!
5. Ninrowa wiirela sai mpantta wiiraneya wa eprofesia ya Yoweli?
5 Eprofesia ya Yoweli yaahihimya wira, vahinatthi ophiya nihiku nuulupale ni nowoopiha na Yehova, arumeyi a Muluku yaarowa ovikaniha olaleerya, ni khiivo etthu yaarowa waakhoottiherya muteko owo. (Yow. 2:2, 7-9) Nto, nrowe nivikanihe ovara muteko ola woolaleerya yoowo ohinrowa-tho otthikeliwa!