Nilokiherye Inamuna Sahu Soolaleerya​—Naathokoreryeke Akina

Otthuneya Waya: Yesu aanaathokorerya ni waaphenta atthu otheene. Mwa ntakiheryo, okathi aaphavela awe ompenuxa mutthu yoowo ahaiwa, aahimuroiha opuro wahaakhanle atthu. Owo aahipaka eyo mwaha woowi aahoona wira mulopwana ole aanuuliwa muru. (Mar. 7:31-35) Nave-tho, Yesu aanisuwela sootteettheya sa awiixutti awe. Tivonto, aanaahimeerya paahi itthu seiye yaawerya aya wiiwa okathi ole. (Yoh. 16:12) Nnaamwi oryeene wiirimu, Yesu onnivikaniha waathokorerya atthu. (2 Tim. 4:17) Ntoko atthareli a Kristu, nimphavela omutakiha. (1 Ped. 2:21; 1 Yoh. 3:16, 18) Olaleerya wahu onooloka akhala wira nnoothokorerya makhalelo ni soophavela sa ole onilavulana ahu. Waaniheryasa owo onooniwiriyana akhala wira onooweha wira ninnimuthokorerya ohiya paahi omulaleerya wala onvaha eliivuru.

Moota Wowaathokorerya Akina:

• Mwiilokiheryeke saana. Mukhaleke oomaaleleya, mutheyeke, ni mukhaleke oopatthaneya.

• Mukhaleke oowehaweha. Niireke ehaavo etthu enooniherya wira owo ookhalana anamwane? Wala onisiveliwa ejardim aahiiso axinama? Niireke ookhalana etiini? Waaniheryasa munoowerya olokiherya masu anyu oopacerya moovarihana ni makhalelo a mutthu owo.

• Mmukoheke moonelo awe, ni munwiriyane saana voohimukwasa masu. Munweheke mutthu owo; eyo enimooniherya wira munninwiriyana. Mmuxukhurele ni omuttottopela. Musyake onyakulihana ni mutthu owo.

• Murukunuxeke masu anyu oopacerya moovarihana ni makhalelo a mutthu owo. Opaka eyo ti vookhweya maana ifolyeeto sahu, ibroxura ni irevista sinnilavula myaha soovirikana. Akhala wira okathi onimuxukurya anyu ti woohireerela, wala ohaatteliwa miteko, nvukuleke itthu soohimya.

Mweererye Ela Mweeri Yoola:

• Okathi wa omulompa Muluku vatthokoni wala okathi onilaleerya anyu ni munna mukina, mwinsayariki inamuna sikina sa moota woolokiherya masu moovarihana ni mutthu onilavulana anyu.

• Munna onihoolela muthukumano wa orowa olaleerya, pooti otthokiherya wala wooniherya inamuna sa waathokorerya atthu.