Nilokiherye Inamuna Sahu Soolaleerya: Olepa Itthu Sootthuneya sa Ole Onisiveliwa Ekeekhai

Murummwa Paulo aahimuhimeerya Timootheyo wira: “Mwipasope mmansinyu n’itthu sinixuttihanyu”. (1 Tim. 4:16) Yoolepa ela enooniherya wira hata niryeene anamalaleerya a niinano wala a khalai, nihaana wiimananihaka orowa vahoolo. Wira nikhaliheriwe mmwaha owo, yootthokihiwa epantte esya ya Orummwa Ahu wa Omwene eni: “Nilokiherye Inamuna Sahu Soolaleerya”. Khula mwaha onoothokoreryaka enamuna emosa yootthuneya ni enoovahaka malakiheryo. Ninnitumereriwa orumeela enamuna eyo mweeri wotheene. Wanikisa wa mweeri, Orummwa Ahu wa Omwene onookhalanaka epantte enrowa onivahaka eparakha yoohimya mureerelo niphwannye ahu mwaha woorumeela epantte eyo. Mweeri ola nintumereriwa olepa itthu sootthuneya sa ole onisiveliwa ekeekhai.

Otthuneya Waya: Wira nimalelihe muteko orummwale ahu, nihaana opaka itthu sikina ohiya olaleerya paahi. Nitthikeleke waaxukurya ale anisiveliwa ekeekhai ni owiixuttiha, nikhuwariki ipyo sa ekeekhai naalale ahu. (Math. 28:19, 20; 1 aKor. 3:6-9) Nto nihaana otthikela-tho omphwanya mutthu owo, olavula itthu sinimuxankiha ni orumeela mwaha navaanenle ahu ekwaha yoopacerya wira nimulipihe. Tivonto, namphwanya mutthu onisiveliwa ekeekhai, nilepake itthu sinooniherya osiveliwa wawe.

Itthu Sooreerela Olepa:

• Mwaarowaka olaleerya, muheleke mmrupani itthu munirumeela anyu wira mulepe myaha sootthuneya. Itthu iyo sikhaleke sowooneya saana ni sootthokiheya. Nuumala ovaanela, mulepeke itthu sotheene sooreerela.

• Mulepe makhalelo a mwaneene etthoko: nsina nawe, okathi wooreerela omphwanya, opuro onikhala awe, nummuru na selulari, wala email aakhalanne ene. Niireke ehaavo yoonale anyu voohimya sa owo ni emusi awe?

• Mulepe mwaha mulavunle anyu. Soolepa xeeni musomme anyu? Exeeni olavunle awe voohimya sa sookupali sawe? Iliivuru xeeni munvanhe anyu? Mulepe okathi, nihiku na esumana ni nihiku na mweeri mmuxukunrye anyu.

• Mulepe etthu enuupuwela anyu olavula mukwaha wootthikela, ntoko: mwaha woolavula, ni nihiku nootthikela.

• Mulepeke etthu khuta nihiku munimuxukurya anyu. Ti vooreera olepa itthu sinceene.

Mweererye Ela Mweeri Yoola:

• Vaavo munlepa anyu itthu sootthuneya, mwaaleeleke ale arina anyu itthu sinilepa anyu.