Ipyo Sihaana Okhuwariwa Wira Sinnuwe
1. Etthu xeeni enitthuneya okhuwari wira yinnuwe?
1 Ipyo saaliwe mmatta sihaana okhuwariwa wira sinnuwe. Etthu emosaru eyo enniireya voohimya sa ipyo sa ekeekhai sinaaliwa vamurimani wa atthu ari mmuttettheni mwahu. (1 aKor. 3:6) Naphavela wira atthu awo akhale oolipa ntoko mwiri orina mitathaari, oninnuwa ni wiima, nihaana opaka mikwaha sootthikela wira nikhuwari ipyo sa nthoonyeryo, nimurumeelaka saana Biibiliya.
2. Nimukhaliherye sai mwaneene etthoko wira osiveliwe ni ele enirowa ahu ohimya okathi onitthikela ahu?
2 Muhaana Opaka Nikoho: Okathi onilokiherya anyu ele enirowa anyu ohimyaka, vanooreera akhala wira munoolokiherya nikoho ninrowa anyu opaka wira mwaakhule mukwaha onitthikela anyu. Nikoho nno mukumiheryeke wanikisa wa ovaanela wanyu, nuumala-vo mwiiwanane saana okathi wootthikela ovaanela. Akina annoona okhala vooreera orumeela eliivuru Biibiliya Oniixuttiha Exeeni wira yooniherye moota woomusoma Biibiliya.
3. Itthu xeeni sinireerela olepa nuumala omulaleerya mutthu?
3 Muhaana Olepaka: Mmalakaru okhuma vapuwani vo, muhaana olepaka itthu siiranen’ye. Mulepeke nsina nawe ni enderesu. Vannikhalela-tho olepa nihiku, ewoora, ni etthu ene elavunle anyu vamosa ni iliivuru akhala wira monvaha. Niireke wira oohimya ekerexa awe? Ookhalana emusi? Oohimya etthu eniphavela awe wala enimuxankiha? Olepa itthu iyo onimookhaliheryani okathi wootthikela ovaanela ni yena. Mulepeke-tho nihiku nivarihanne anyu otthika vamosa ni nikoho ninrowa anyu waakhula.
4. Voohimya sa waakhaliherya ale anooniherya osiveliwa ekeekhai, xeeni vanitthuneya ahu ohooceya?
4 Muhooceye: Satana khoniphumurya wiimananiha wawe wira ‘owakhe ehapari yorera’ yaaliwe vamurimani wa atthu awo. (Mar. 4:14, 15) Tivonto muhooceye akhala wira khamunimphwanya mutthu yoole aalehanne anyu. Vaareerelaka nyuwo pooti omuroihela ewarakha wala olepa etthu khuhiya vapuwani-vo. Murokora mmosa pioneero aahipaceriha yoosoma eemenle ene, masi okathi aatthinke awe khamphwanyale; nto owo aahilepa epaphelo khuroiha. Okathi murokora ole amphwannye awe vapuwani vale, muthiyana ole aahixukhurela vanceene moota murokora ole soonihenrya awe omucalela. Nto vaavo vanikhuwari ahu ipyo sa ekeekhai, nnoophwanya ohakalala onikhumela okathi oniphuwa aya, winnuwa mpakha okhoomala ni wiima mihokhorokho ‘miloko miraru, sikina mpakha miloko mithanu na mmosa, sikina-tho mpakha miloko mulokó’.—Mar. 4:20.