Nilokiherye Inamuna Sahu Soolaleerya—Mpake Nikoho Wira Mwaakhule Okathi Wootthikela
Otthuneya Waya: Okathi onimphwanya ahu mutthu onisiveliwa ekeekhai, nitthikeleke omuxukurya okathi mukina wira nimukhaliherye wiixutta ekeekhai. (1 aKor. 3:6) Nto, nihinatthi okhuma ti vootthuneya omukoha mutthu owo nihiku nootthikela. Nave, ti vooloka opaka nikoho wira naakhule nihiku nlo. Eyo enoomwiiriha mwaneene etthoko olipelela oxukuriwa. Nave, akhala wira nikoho nlo nnaakhuliwa ni eliivuru ninvahale ahu, woonasa wene owo onoosoma eliivuru eyo. Opaka nikoho wira naakhule okathi mukina, onoonikhweiherya otthika maana noothanla mwaha ene; nave mwaneene etthoko oosuwela ele enrowa ahu ovaanela. Namphwanya mutthu owo, nimuleeleke wira nihoorwa wira naakhule nikoho naahiyale ahu mukwaha wookiserya, nto nuumala-vo nivikaniheke ovaanela.
Moota Woopaka Eyo:
• Okathi munilokiherya anyu ele enrowa anyu olavula khula empa, nave muupuweleke nikoho wira mwaakhule mukwaha wootthikela. Nikoho nlo pooti okhuma muliivuruni munivaha anyu, wala pooti okhala na eliivuru enirumeela ahu wira nimusomihe Biibiliya, enrowa anyu opaceriha okathi wootthikela.
• Okathi onimaliha anyu ovaanela, mmuleeleke wira munniphavela olavula ni yena okathi mukina, nto mpake nikoho mulokihenrye anyu. Mittetthe sikina, atthu toowaatteliwa miteko nto annoovelela oleihana ni namalaleerya sa nihiku nootthika. Akhala wira ti siiso, pooti ohimya so: “Niireke ola okathi wooreerela wira koophwanyeeni? [Nwehererye waakhuliwa.] Esumana enirwa, kinoovira vaava wira mwa okathi vakhaani kaakhule nikoho nla . . . Akhala wira munimwaatteliwa miteko nihiku nlo, nnoovaanelaka nihiku nikina”.
• Mwaleihana ni mutthu owo wira munootthika, muhaana ohokolowa okathi yoowo. (Math. 5:37) Okathi onimaliha anyu ovaanela, muhimyeke-tho etthu ekina wira mwathokorerye okathi wootthikela.
Mweererye Ela Mweeri Yoola:
• Okathi munilokiherya anyu ele enrowa anyu olavula okathi woolaleerya, nave muupuweleke nikoho wira mwaakhule mukwaha wootthikela. Mwaaleeleke anna arina anyu ele elokihenrye anyu.