Nilokiherye Inamuna Sahu Soolaleerya​—Nipakeke Mikwaha Sootthikela Oxukurya

OTTHUNEYA WAYA: Anamunceene anooniherya osiveliwa ihapari sa Omwene apacenrye khalai ophavela ekeekhai voohimya sa Muluku. (Yes 55:6) Wira niwerye owiixuttiha oratteene, nihaana otthikela waaxukurya ikwaha sinceene. Atthu awo sinnaakhumelela mixankiho sinceene, tivonto moota woomukhaliherya khula mutthu ti woovirikana. Masi, hiyo nnoowerya ovara muteko owo nailokiherya oratteene ni okhalana yoolakela khula okathi onirowa ahu waaxukurya, niphavelaka opaceriha yoosoma ya Biibiliya.

MOOTA WOOPAKA EYO:

• Mwiimananihe otthikela waaxukurya muhina mwa mahiku vakhaani vaweryaneya.​—Mat 13:19.

• Mukhaleke oopatthaneya, oottittimiha ni mulavuleke mootaphuwa.

• Mmukhomaseke mooreera murima. Muromoleke nsina nawe mutthu owo. Mmuupuxeryeke wira mwaarweela otthikela omuxukurya wira mwaakhule nikoho nawe, omuruuhela irevista isya, omooniherya esaiti ahu, omooniherya eviidiyu, wala omooniherya moota eniiriwa aya yoosoma ya Biibiliya. Vakhala wira mutthu owo onnooleelani etthu enimuxankiha, nto nvaaneleke mwaha yoowo ohimmye awe.​—aFi 2:4.

• Mukhuwariki ipyo sa ekeekhai saalale anyu vamurimani va atthu mmurumeelaka Biibiliya wala omuhiyerya iliivuru. (1 aKor 3:6) Mmananihe olimalelana ni mutthu owo.

• Khula ekwaha muhiyeke mwaha onrowa anyu othokorerya mukwaha mukina.