4 Olevelelana

ELE ENTAPHULELA AYA

Olevelela onitaphulela oliyala etthu yoonarara mwiireliwe anyu ni ohitthikela-tho wuupuwela etthu eyo. Olevelela khontaphulela wira etthu epakeliwe ahu ti yooloka wala kiyiiraneyale.

ELE BIIBILIYA ONIHIMYA AWE: “Nvilelaneke, mulevelelaneke imara sothene muntthekelananyu”.​—aKolosi 3:13.

“Akhala wira munnimphenta mutthu owo, khamuniwehexexa soovonya sawe paahi, masi muniweha mikhalelo sawe sooloka ni moota oniimananiha awe”.​—Aaron.

XEENI VANIREERELA AYA?

Ohilevelela ni murima wotheene pooti woophwanyihani eretta ni okhulumuwa. Ohiya-vo, pooti ohonona ekasamento anyu.

“Ekwaha emosa, iyaka aahikivekela musammaha mwaha wa etthu yoohiloka aakiirenle awe. Vaahikivila omulevelela. Hata vari siiso, kaahimulevelela, masi kinnithanana mwaha wa ohimulevelela khalai ene, maana yaahikumiherya mixankiho mukasamentoni mwahu”.​—Julia.

ETTHU YOOPAKA

MWIIKOHEKE SO:

Ekwaha ekina ole othelanne anyu onrowa awe owiirelani etthu yoohiloka, mwiikoheke so:

• ‘Kiireke ka mutthu oowaakuva otthekeleya?’

• ‘Kiireke etthu ela ti yootepaxa otakhala, kihikhanle aka oolevelela?’

MUTHOKORERYE MAKOHO ALA NI OLE OTHELANNE ANYU

• Natthekelana, niireke onnivira okathi munceene nihilevelelanne?

• Nipakeke exeeni wira naakuveke olevelelana?

MIRUKU

• Mwatthekeliwa, muhaakuveleke wuupuwela wira ole othelanne anyu orimoolakelani.

• Mphaveleke makhalelo ooloka arina awe ole muthelanne anyu, muupuweleke wira: “atthu othene annittheka n’inamuna sinjene”​—Yakobo 3:2.

“Okhweya olevelelana vakhala wira otheene ahu noottheka, masi vannivila olevelela vakhala wira mutthu mmosa paahi tomutthekenle mukhwaawe. Waakuva olevelela onnooniherya wira mutthu owo towiiyeviha”.​—Kimberly.

ELE BIIBILIYA ONIHIMYA AWE: “Mwaakuveleke ophuka milattu”.​—Matheyo 5:25. Tradução do Novo Mundo.