Yehova Oonivaha Moopoli

29 Nlaikha noopacerya opakiwa ni Muluku, naari wa owo ntoko mwanawe ompacerya.

Muluku onnimphenta vanceenexa ni ononvarihela muteko wi aapwetexe atthu ootakhala ni owoopola ale ari oowiiwelela.—Yohani 3:16, 36.

30 Yehova aahimuruma Mwanawe wira oyariwe veelaponi ya vathii. Aahivahiwa nsina na Yesu. Amamawe yiihaniwa Maria.—Luka 1:30-35.

31 Vaavo Yesu annunwawe, aahixuttiha itthu sinceene sooloka. Aahixuttiha wira Yehova paahi ori Muluku ekeekhai.—Marko 12:29, 30.

Yesu ahimmye wira nimukokhoreleke Yehova paahi.—Mateyo 4:10; Yohani 4:23, 24.

Aahiwiixuttiha-tho atthu sa omwene wa Yehova.—Luka 17:20, 21.

32 Yesu aahavoniha aretta ni aahipaka itthu sinceene sooloka. Khaapanke etthu yootakhala.—Miteko 10:38; 1 Pedru 2:21, 22.

Masi, aarowa onoopola sai mwa yoottheka ni okhwa?

33 Owo aahaana ovaha mukuttho wa Muluku, wira owoopole atthu ooloka. Khalai, Muluku aahaaruma atthu wira avaheke mukuttho wa inamaa mwaha wa soottheka saya.—aHeberi 7:25, 27.

34 Yesu khaavan’he mukuttho wa inamaa. Owo iivaherenrye mwaneene ntoko mukuttho wa hiyo.—Mateyo 20:28; aHeberi 10:12.

Munnisuwela mathowa aya?