Mpantta 11
Mathipelo A Elapo Esya Anneemexiwa Vano
1, 2. Yaakhwanihereyaka eprofesia ya Biibiliya, exeeni eniweha ahu yiiraneyaka?
ETTHU ekina eri yootepa oreera ti yoowi mathipelo a elapo esya ya Muluku anneemexiwa vano, masi olumwenku ola wa khalai wa Satana onootepa ohononeya. Hiyo ninniweha wira Muluku onnaathukumanya atthu a maloko otheene, owiirihaka atthu awo okhala mathipelo a makhalelo masya, yaawo anrowa okhalaka elapo esya, yeeyo enrowa oranttela olumwenku ola woohiiwanana. MBiibiliyani, mu 2 Pedru 3:13, atthu ala a makhalelo masya, aniitthaniwa ‘elapo esyá’.
2 Eprofesia ya Biibiliya enihimya-tho wira: “Yaphiyá mahiku aya [mahiku ala anikhala ahu], . . . atthu a maloko othene anotthimakela-wo: anorowa-wo maloko òhikontareya ehimyaka wira: ‘Rwani, niwelé mwako w’Apwiya [okokhorela wekeekhai], . . . owo ononixuttiha iphiro sawe, wira nitthareke miphito sawe’”.—Yesaya 2:2-3.
3. (a) Eprofesia ya Yesaya enaakhwanihereya sai? (b) Moota xeeni eliivuru yookiserya ya Biibiliya enilavula aya mmwaha owo?
3 Eprofesia ele ennaakhwanihereya vano, eriyari ya ale aniiwelela ‘iphiro sa Muluku ni otthara miphito sawe’. Eliivuru yookiserya ya Biibiliya ennilavula sa atthu a olumwenku wotheene aniphenta murettele, aahimyaka okhala “muttitthi mulupalexa . . . a ilapo sothene ni a maloko othene ni a mahimo othene ni a malavulelo othene”, eyo piiyo, axinna eekeekhai oowiiraana a olumwenku wotheene, yaawo animurumeela Muluku mowiiwanana. Ni Biibiliya onihimya-tho wira: “Ala ti yale yaharere olupatthiwa n’uhaxiwa”. Aayo, awo anrowa woopowa mmukhalelo ola wa itthu wootakhala.—Wisupulula 7:9, 14; Matheyo 24:3.
Axinna Eekeekhai Oowiiraana Molumwenkuni
4, 5. Nthowa xeeni vaniweryaneya aya Anamoona a Yehova okhala oowiiraana molumwenkuni?
4 Imilyau sa Anamoona a Yehova, anniphavela ni murima wotheene, okhala moovarihana ni malakiheryo ni iphiro sa Muluku. Nlipelelo naya na okumi woohimala nlimpe ni elapo esya ya Muluku. Mwaha wa khuta nihiku ottharaka mweettelo wowiiwelela malamulo a Muluku, awo annimooniherya Muluku wira anniphavela wiiwelela moota onilamulela awe vano, ni mu elapo esya. Khuta opuro, moohicikha etthu sa elapo enikhala aya aahiiso nikhuli naya, atthu awo anniiwelela malamulo mamosaru, eyo piiyo, yaale Muluku ohimmy’awe mu Nuulumo nawe. Ti nthowa naya awo ary’aya anna ekeekhai oowiiraana molumwenkuni, atthu a makhalelo masya anrowa okhalaka mu elapo esya yoopakiwa ni Muluku.—Yesaya 54:13; Matheyo 22:37, 38; Yohani 15:9, 14.
5 Anamoona a Yehova aasuwela wira awo khahiyo tanikumiherya wiiraana orina aya molumwenkuni. Masi annisuwela wira eyo eniweryaneya mwaha wa munepa woowerya wa Muluku, onivara muteko wa ale aniiwelela malamulo awe. (Miteko s’Arummwa 5:29, 32; aGalasia 5:22, 23) Muluku tonipaka itthu iyo. Ntoko sihimaly’awe Yesu, “etthu enarikela atthu, Muluku omukhwèla”. (Luka 18:27) Nto, Muluku yoowo opanke olumwenku wotheene ohinimala, ti yoowo-tho oniiriha okhala nloko n’atthu a makhalelo masya, nenno ninrowa okhalaka mu elapo esya, mu okathi woohimala.
6. Nthowa xeeni wiiraana wa Anamoona a Yehova molumwenkuni oniphwanelela aya wiihaniwaka okhala etthu yootikiniha vano?
6 Tivonto, moota woolamulela wa Yehova mu elapo esya, pooti wooneyaka vano mmoota owo onipaka awe mathipelo a elapo esya, yaawo anitthokihiwa vano. Mmukhalelo mmosa, ele enipaka awe vano wa Anamoona awe, eri etthu yootikiniha. Mwaha wa xeeni? Mwaha woowi Yehova oowiiriha Anamoona awe okhala oowiiraana molumwenkuni, ahilipelelaka okawanyiwa mwaha wa soophavela sa maloko, makhuli, aahiiso itiini. Nnaamwi Anamoona yincerereyaka mu imilyau sinceene ni akhalaka mu ilapo soovikana 235, awo aakhalana wiiraana woohimala, ni khivanweryaneya waavalaanya. Wiiraana nno wa anamoona molumwenkuni, tthiri eri etthu yootikiniha, eyo piiyo, etthu epakiwe ni Muluku.—Yesaya 43:10, 11, 21; Miteko s’Arummwa 10:34, 35; aGalasia 3:28.
Osuwanyeihiwa wa Atthu a Muluku
7. Yesu aahimmye wira atthareli awe eekeekhai yaarowa osuweliwa sai?
7 Etthu xeeni ekina enrowa okhaliherya osuweliwa atthu yaawo Muluku onaarumeela awe ntoko mathipelo a elapo esya? Saana, tani anaakhwaniherya masu a Yesu ari mu Yohani 13:34, 35? Owo ohimmye so: “Kinovahani nikano na nanano: mphentaneke mukina ni mukhw’awe. Sisale miyo kophentalyakani, siso-tho nyuwo muhana ophentana. Atthu othene anosuwela wira mwá awixutti aka, mwaphentanaka mukina ni mukhw’awe”. Anamoona a Yehova annikupali masu ala a Yesu ni anneettela. Ntoko siiso Nuulumo na Muluku nniixuttiha aya, awo ‘annikhalela nthiti ophentana’. (1 Pedru 4:8) Awo ‘annikuxa murima wophenta, yoowo ommaleliha orera murima’. (aKolosi 3:14) Tivonto, ophentana wa anna otheene ori ntoko “ekoola” eniwiiraaniha mu olumwenku wotheene.
8. Moota xeeni 1 Yohani 3:10-12 nave-tho onaasuwanyeiha awe atthu a Muluku?
8 Nave-tho, 1 Yohani 3:10-12 onihimya wira: “Enimusuweliha mutthu okhala mwana a Muluku walá mwana a Satana t’ila: othene ale ahinvara miteko sa xariya, walá ahinaphenta akhw’aya, awo khahiyó àna a Muluku. Vekekhai, nikano nìwalyanyu okhuma wopajeryani ti nla: niphentaneke. Nihikhaleke ntoko Kayini: owo ari mutthu a Mutakhali, tivó vamwivalyawe muhim’awe”. Ti nthowa naya atthu a Muluku oowiiraana a olumwenku wotheene, ahintuphelana aya.
Etthu Ekina Enaasuwanyeiha
9, 10. (a) Muteko xeeni waarowa waasuwanyeiha arumeyi a Muluku mmahiku ookiserya? (b) Moota xeeni Anamoona a Yehova animwaakhwaniherya aya Matheyo 24:14?
9 Wookhala moota mukina wowaasuwela arumeyi a Muluku. Mu eprofesia awe voohimya sa omala wa olumwenku wootakhala, Yesu aahilavula itthu sinceene saarowa okhala ethoonyeryo ya mahiku ookiserya. (Nwehe Mpantta 9.) Ethoonyeryo yuulupale ya eprofesia ela, ti ele ehimmy’awe mMatheyo 24:14 oriki: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.
10 Niireke wira ninniweha eprofesia eyo yaakhwanihereyaka? Aayo. Okhuma vaavale vapacenrye aya mahiku ookiserya mwaakha wa 1914, Anamoona a Yehova annilaleerya ihapari sooreera sa Omwene wa Muluku molumwenkuni motheene, ntoko Yesu saarumme awe, eyo piiyo, olaleerya empa ni empa. (Matheyo 10:7, 12; Miteko s’Arummwa 20:20) Mu ilapo sotheene, imilyau sene sa Anamoona, annilavula n’atthu yaahimeeryaka sa elapo esya. Ti nthowa naya nyuwo mwaakhenle anyu ebroxura ela, okhala wira muteko wa Anamoona a Yehova onihela muhina opaka ni okawa ibilyau sinceene sa iliivuru sinlavula sa Omwene wa Muluku. Nyuwo munnaasuwela atthu akina anilaleerya Omwene wa Muluku empa ni empa, molumwenkuni motheene? Marko 13:10 onooniherya wira muteko ola woolaleerya ni wiixuttiha, ohaana opacerya “toko”, wanikisa ohinatthi ophiya.
Waakhuliwa wa Mwaha wa Nenli Muulupale
11. Etthu xeeni ekina Anamoona a Yehova anaakhwaniherya aya vaavo vaniiwelela aya olamulelo wa Muluku?
11 Anamoona a Yehova annaakhwaniherya etthu ekina, orweela mwa wiiwelela waya malamulo a Muluku. Awo annooniherya wira Satana aamootha, vaavo aahimmy’awe wira apinaatamu khiyaarowa ororomeleyaka wa Muluku okathi oneehereriwa aya. Nto awo annaakhula mwaha wa nenli muulupale, yoowo onihela muhina ororomeleya wa apinaatamu. (Yobi 2:1-5) Mwaha wookhala ekrupu yuulupale ya atthu imilyau sene a maloko otheene, Anamoona, ntoko erutthu emosa, annooniherya ororomela olamulelo wa Muluku. Nnaamwi aryeene atthu oohimalela, awo annikhala mpantta wa Muluku, voohimya sa ole orina ehakhi ya olamulela, nnaamwi Satana aweehereryaka.
12. Tani Anamoona animutakiha aya, orweela mwa nroromelo naya?
12 Olelo va, imilyau iya sinceene sa Anamoona a Yehova, anincererya onamoona yoowo opacenrye ovahiwa ni anamoona a khalai, yaawo yoonihenrye ororomeleya waya wa Muluku. Akina vakhaani a anamoona awo, yaari Abeli, Nowe, Yobi, Abrahamu, Sara, Isakhi, Yakobe, Deebora, Ruthi, Davidi ni Daniyeli. (aHéberi, ekapiitulu 11) Ntoko Biibiliya sinihimya awe, awo ti ‘anamona òroromeleya owàtta ntoko meku’. (aHéberi 12:1) Anamoona ala ni akina, waahela muhina arummwa a Yesu, ahooniherya omuroromela Muluku. Nto, mwaha wa omuroromela Muluku moomalela, Yesu oovaha ntakiheryo nuulupalexa.
13. Masu xeeni a Yesu voohimya sa Satana yooniheren’ye okhala eekeekhai?
13 Ela ennooniherya wira ele Yesu aalenle awe ahooleli a itiini voohimya sa Satana, ti ekeekhai. Owo aahimmye so: “Nto nyuwo mumphavela okìva miyo kòhimenryeni ekekhai emwiwalyaka Muluku. . . . Nyuwo, tith’inyu ti Satana: nyuwo munnitthuna wira sintthunawe tith’iny’uwo. Owo ti mulipa-òwiva okhuma wopajeryani. Owo khanakhale n’ikekhai, okhala wira mwa yowo khivo ekekhai. Òthaka, onnettela makhalelo awe: tthiri uwo mulipa-òwotha ni tithi a wothá”.—Yohani 8:40, 44.
Tiivi Eri Yoothanla Anyu?
14. Etthu xeeni eniiraneya vano wa mathipelo a elapo esya?
14 Olelo va Muluku onneemexa mathipelo a elapo esya, orweela mwa Anamoona awe ari oowiiraana molumwenkuni; nto mathipelo awo annitepa olipa. Khuta mwaakha, ikonto imiya sene sa atthu annirumeela othanla waya mootaphuwa, wira yeemererye olamulelo wa Muluku, orweela mwa osuwela wekeekhai aniphwanya aya. Awo aniirela mpantta wa atthu a makhalelo masya, yaawo anrowa okhalaka mu elapo esya, ni annikhala mpantta wa Muluku voohimya sa ole orina ehakhi ya olamulela, ni annooniherya wira Satana nawoothe.
15. Muteko xeeni woovalaanya onrowa ovariwa mahiku ahu ala?
15 Mwaha wa othanla olamuleliwa ni Muluku, awo anoophwanelela opwehiwa ‘mono wolopwana’ wa Kristu, vaavo vanivalaanya awe “ipwittipwitthi” “n’ipuri”. Mu eprofesia awe voohimya sa mahiku ookiserya, Yesu aahihimya vahinatthi, oriki: “Atthu a maloko othene anothukumanyiwa oholo wawe. Vano, Owo onimwavalanya atthu òrera murima n’ale òtakhala murima, ntoko makampusi sinvalanyawe ipwittipwitthi n’ipuri. Onokhaliha ipwittipwitthi mono awe wolopwana n’ipuri mono awe wothiyana”. Ipwittipwitthi atthu yaale oowiiyeviha athukumanne ni yaakhalihenrye axinna a Kristu, yiiwelelaka olamulelo wa Muluku. Ipuri atthu yaale ahitthunne wiiwelela, yaawo ahaacalenle axinna a Kristu ni ahikhalihenrye olamulelo wa Muluku. Exeeni enrowa okhumelela? Yesu aahimmye so: “Siso, ala [ipuri] animomoleliwa wohawani wohimala: vano, anaxariya anorowa wekumini ehinimala”.—Matheyo 25:31-46.
16. Etthu xeeni enitthuneya anyu opaka, akhala wira munniphavela okhala mParayiisu enirwa?
16 Tthiri, Muluku onninikhapelela! Mowaakuveya, owo onoopaka eparayiisu yoohakalaliha valaponi. Niireke wira munniphavela okhala mParayiisu mmo? Akhala wira munniphavela, nto muxukhureleke soovaha sa Yehova, mwiixuttaka itthu voohimya sa owo, ni mweettelaka ele eniixutta anyu. “Mwaphaveleke Apwiya, mahiku ala vamphwanyaneyaya: mwalompeke vava varyaya vakhiviru. Atakhali ehiyeke iphiro saya: alipa-òttheka erukunuxe mirima saya. Etthikeleke w’Apwiya, awo animwamorela ikharari”.—Yesaya 55:6, 7.
17. Nthowa xeeni nihintthuneya ahu ohonona okathi voohimya sa omuthanla ole onireerela omurumeela?
17 Nihihononeke okathi. Wanikisa wa mukhalelo ola wa khalai onnaattamela vanceene. Nuulumo na Muluku ninnivaha miruku, niiraka: “Muhiphenteke itthu sa vathí-va, sihinimphavela Muluku. Mwaphentaka itthu sene seiyo, khamunkhalana mwa nyuwo ophenta w’Atithi . . . Vano, makhalelo ala anomala vamosá n’itthu simphavelexaya: nto ole onettela otthuna wa Muluku onokhala mahiku othene”.—1 Yohani 2:15-17.
18. Mweettelo xeeni onrowa onikhaliherya olipelelaka ni nroromelo wira nnookhala mu elapo esya ya Muluku, yeeyo eri yootepa ohakalaliha?
18 Atthu a Muluku anniixuttihiwa vano wira yakhaleke mu okathi woohimala mu elapo esya. Anniixutta itthu somunepani ni itthu sikina sintthuneya wira yinnuuherye eparayiisu. Hiyo ninnootumereryani wira mmuthanle Muluku ntoko Namalamulela ni mukhaliherye muteko awe onoopola okumi, yoowo onivariwa vano mulaponi motheene. Mmusomeke Biibiliya ni Anamoona a Yehova, ni mmusuwele Muluku yoowo onoothokoreryani tthiri, ni onrowa omaliha ohaawa. Mwiira siiso, nyuwo-tho munookhala mpantta wa mathipelo a elapo esya. Nto nyuwo pooti olipelelaka ni nroromelo wira Muluku onooweemereryani wira mwakhaleke mu okathi woohimala mu elapo eyo esya yootepa ohakalaliha.
[Elatarato eri epaaxina 31]
Anamoona a Yehova aakhalana wiiraana wekeekhai molumwenkuni motheene
[Elatarato eri epaaxina 32]
Mathipelo a elapo esya ya Muluku anneemexiwa vano