Epantte 7

Tanii Aneettela Etiini Yekeekhai?

1. Exeeni entthuneya ahu wiira wi nimuhakalalihe Muluku?

WIRA nikhalane wataana woolokexa ni Muluku, nihaataane ni etiini yoowoka. Nohaana weettela etiini yekeekhai. Olelo imilyau sinceene sa atthu a elapo yotheene annipaka yeeyo.

2. Arii wuuwi Anamoona a Yehova nto muteko xeeni onivara aya?

² Ntoko sihimmwalya aya vahinatthi mBiibiliyani, anamakokhorela eekeekhai arii “muttitthi mulupalexa” onikhuma “ilapo sothene n’a maloko othene n’a mahimo othene n’a malavulelo othene.” (Wisupulula 7:9) Mu ilapo sowiiraka 235, imilyau sa Anamoona a Yehova arii avaraka muteko moowaakhaliherya akina wiixutta voohimya sa iphiro sa Yehova ni soovekela sawe.

Osuwanyeehiwa wa Anamakokhorela Eekeekhai

3. Anamoona ammukokhorela aani, nto mukhalelo xeeni wa okokhorela ansyaka aya?

³ Anamoona aasuwela wi Yehova paahi toniphwanelela okokhoreliwa. Annikhootta owuuraamela amuluku a ethiru aahiiso amuluku a itiini. (1 Yohani 5:21) Khanaakokhorela alipa-ookhwa yiirelaka mpantta mu olaxerya munepa wa murutthu aahiiso meera a muhapo anikumiherya sookupali soowoka sa etiini ni “sowixuttiha sa xetwani.” (1 Timoteyo 4:1) Masi-nto, annivaha nimaaliho nekeekhai wa alipa-ookhweliwa yaataphulelaka yoolakela ya Muluku ya wi vanookhala ohihimuxiwa wa alipa-ookhwa elapo ela eryeene eparayiisu.—Yohani 5:28, 29; Miteko 24:15.

4. Tuuvi ori mukhalelo wa arumeyi a Muluku voohimya sa maxintta?

⁴ Anamoona khanaataana-tho ni maxintta, mwaawelo, aahiiso okhwiri, okhala wira annisuwela wi itthu iyo ti sa Diabo. Khanroromela-tho waakihiwa ni maxintta—ammuroromela Yehova.​—Miruku 18:10.

5. Mmukhalelo xeeni Anamoona a Yehova ‘ahinirela aya mpantta wa elapo’?

⁵ Yesu aahimmye wira awiixutti awe “khanirela mpantta wa elapo.” (Yohani 17:16, NM) Yesu mwaneene aahikhootta mmahiku awe wiirela mpantta miyaha sa epoliitika. ( Yohani 6:15) Moolikanasa, Anamoona khaniirela mpantta wa epoliitika, waakiha nloko, ni ikhotto sa mahimo sa elapo ela. Masi, anniliva mpoosto ni anniiwelela malamulo a elapo enikhala aya.​—Yohani 15:19; aRoma 13:1, 7.

6. Malamulo xeeni anitthara aya arumeyi a Muluku voohimya sa othela ni omwalana?

⁶ Moowiiwelela malamulo a ekuvernu, Anamoona annittittimiherya othela waya wi okhalee woolepaniwa. (Tito 3:1) Anniiwelela malamulo a Muluku, tivonto ansyaka aya waatteya. (1 Timoteyo 3:2) Ohiya vo, okhala wira annivarihela muteko ipacereryo sa mBiibiliyani mookumini mwaya, othela wa arumeyi a Muluku okorakora omalela moomwalanani.

7. Anooniherya sai Anamoona ophentana eriyari aya?

⁷ Anamoona anniphentana eriyari aya. Ophenta nno, vamosaa ni omphenta waya Muluku, onniwuuraanya mu emusi yekeekhai ya elapo yotheene, vanaamwi aryeene a mahimo ni maloko oohiyana. Vaavo enikhumelela aya ehasara aahiiso okathi wa othoiwa, Anamoona annikhaliheryana mukina ni mukhw’awe moohilokela. Anamoona annooniherya ophenta mmakhalelo aya.​—Yohani 13:35.

8. Miteko xeeni sootakhala ansyaka aya wiira arumeyi a Muluku?

⁸ Arumeyi a Yehova annimananiha okhala axariya, ni a ekeekhai. Annisyaka wiiya, wootha, oraruwa, ohapaliwa, ni miteko soohixariya munakosoni. Alopwana oothela khanaamana axaaraya. Akina ahinatthi okhala Anamoona, yaaniira itthu iyo, masi nnikhaliheryo na Yehova aahiya opaka itthu iyo. Nto ‘arapihiwa’ vamaithoni va Muluku.​—1 aKorinto 6:9-11.

Annipaka Yotthuna ya Muluku

9. Exeeni enlavula aya eliivuru emosaa voohimya sa ikerexa somunepani sa wÁfrica?

⁹ Mweephattu, itiini sinceene sinaakhulela okhalana ekeekhai. Waaniheryasa animooniherya miteko sootikiniha akhaliheryaka soohimya saya. Mwa ntakiheryo, voohimya sa ikerexa siniihaniwa okhala somunepani sa wÁfrica, eliivuru emosaa enihimya so: “Muteko wa namaxintta aahiiso aakulukhana mpantta munceene oniranttelihiwa ni [miloko misyaa sa maKristau]. . . . Awosa anaakhulela ohimya itthu sihinatthi wiiraneya ni opaka miiriira. Maprofeta eriyari aya aakhalana sowoonihiwa ni annitaphulela oloha. Annirumeela maasi ootteela, makhura ooreelihiwa, ettuurwa, iveela ni rupani wira avonihe ni asyake iretta.”

10, 11. Nthowa xeeni iye siniihaniwa okhala miiriira olelo sihinooniherya aya wi etiini eyo ti ya Muluku?

¹⁰ Atthu a ikerexa iyo anaakhulela wi miiriira sinooniherya wi etiini aya ennireelihiwa ni Muluku. Masi iyo siniihaniwa okhala miiriira khasinooniherya wi etiini eyo yookhalana weemereriwa ni Yehova. Satana onnivaha ikuruu wa anamakokhorela akina oowoka wira apakeke “sotikiniha.” (2 aTesalonika 2:9) Ohiya vo, Biibiliya aahimmye vahinatthi wi ikuruu sa opaka miiriira wa mpantta wa Muluku, ntoko ohimya etthu ehiiranen’ye, olavula mmattaava, ni okhalana osuwela wa vameekh’aya, ‘saarowa omala.’​—1 aKorinto 13:8.

¹¹ Yesu aahiwaraaliha oriki: “Wira mutthu akelé momweneni mwa Muluku, khivamphiyerya okìrela: ‘Apwiya! Apwiya!’. Anikela-mo t’ale anìra sintthunaya Atithi ari wirimu. Naphiyá nihiku nlo, atthu anjene anokìrela: ‘Apwiya! Apwiya! Hiyo nalaleya ni nsina ninyu! Ni nsina ninyu nenlo nahiwomola axetwani: ni nsina ninyu nenlo-tho nahira sotikiniha sinjene!’ Vano miyo kinowakhula wira: ‘Miyo nkinosuwelani! Mukhumase va, nyuwo atakhali!’”​—Mateyo 7:21-23.

12. Tanii anrowa okela mooMweneni a wirimu?

¹² Nto, tanii anrowa okela mooMweneni a wirimu? Ale anipaka yotthuna ya Yehova.

Anamalaleerya a Omwene wa Muluku

13. Muteko xeeni Muluku oniphavela awe wi opakiwe olelo ni arumeyi awe, nto tanii anipaka?

¹³ Tiivi eri yotthuna ya Muluku wa arumeyi awe olelo? Yesu aahimmye wira: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke.” (Mateyo 24:14) Ola muteko yoowo Anamoona a Yehova anipaka aya ni nthiti.

14. Omwene wa Muluku tanii, ni tanii anrowa olamulelaka mooMweneni mmo?

¹⁴ “Mulaponi mothene,” Anamoona a Yehova annilaleya Omwene wa Muluku ntoko ekuvernu ya wirimu enrowa olamulela elapo yotheene mwaxariya. Anniixuttiha wi Yehova oomuthanla Kristu Yesu ntoko Mwene a Omwene, vamosaa ni 144.000 anamalamulela akhw’awe yaawo athanliwe eriyari yaapinaatamu.​—Daniyeli 7:14, 18; Wisupulula 14:1, 4.

15. Omwene onrowa onyaanya exeeni?

¹⁵ Anvarihelaka muteko Biibiliya, Anamoona anniwooniherya atthu wira Omwene wa Muluku onrowa onyaanya mukhalelo wotheene wa Satana. Enoomala etiini yoowoka ni sowiixuttiha saya sinimunyoholiha Muluku ni omuttittimiha Diabo! (Wisupulula 18:8) Sinrowa omala-tho, ikuvernu saapinaatamu sinvaanyihana ni Muluku!​—Daniyeli 2:44.

16. Tanii anrowa okhala anamalamuleliwa a Kristu Yesu, nto anrowa okhalaka wuuwi?

¹⁶ Ohiya vo, Anamoona a Yehova tanisuweliha wi Kristu Yesu onrowa oruuha mireerelo sooreerexa wa otheene anipaka ele Muluku oniphavela awe. Awo anrowa okhala oolamuleliwa awe a valaponi. Biibiliya onimutthukwa natiri oriki: “Onrowa owòpola alipa-òhawa animukhuwelela: onowòpola òthoiwa ahinimona òwakiha. Onimwamorela ikharari alipa-òthanyiwa: onowòpola atthu òhawa ni òwiyeviha.”​—Esalimo 72:12, 13.

17. Tinivii nloko nimosaa paahi nnilaleya Omwene wa Muluku?

¹⁷ Khinivoo nloko nikina na atthu nnipaka yotthuna ya Muluku nlaleeryaka ihapari isyaa sa Omwene. Anamoona a Yehova paahi tanisuweliha Omwene wa Muluku mu elapo yotheene.

[Ilatarato epaaxina 23]

Anamoona a Yehova arii oowiiraana mu emusi ya elapo yotheene