Atthu Oowiiraana

SAAHIVIRA iyaakha 1.500, aIsarayeli ari ene nloko noothanliwa na Yehova. Nuumala-vo, Yehova aahipacerya “wajaliha amalapo, athanlaka eriyari aya nloko naìhaneleliwa nsina nawe”. (Mit. 15:14) Atthu aniihaneliwa nsina na Yehova yaarowa okhala Anamoona awe. Nto moohicikha elapo anikhala aya awo yaarowa okhala oowiiraana arina ene muupuwelo mmosaru ni soovara simosaru. Atthu awo oowiiraana yaarowa othukumanyiwa mwaha wa olaleiwa ihapari sooreera ntoko Yesu aalenle awe atthareli awe oriki: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni n’eroho yowarya. Mwawixuttiheke wettela sothene sòrumalyakani”.—Math. 28:19, 20.

² Vaavo muniivahererya anyu wa Yehova ni opatisiwa, nyuwo munnikhala mutthareli a Yesu Kristu. Nto nyuwo munnipacerya wiirela mpantta emusi ya olumwenku wotheene ya atthu oowiiraana. Emusi eyo kheneemererya ovirikana wa atthu ntoko elapo oyariwe awe, nloko, akhala wira thaaciri aahiiso nnaari ewiirihaka okhala ookawanyeya. (Esal. 133:1) Nto muhaana waattittimiha ni waaphenta anninyu a mmulokoni. Anna ni arokora akina a mmulokoni, woonasa wene ta nikhuli nikina, elapo, aasoma wala khasomme, atthu yaawo woonasa wene khalai muharowa anyu waataana mwaha woovirikana iwo. Vano nyuwo munnaaphenta vanceene atthu awo ni mookhalana waataana woolipa ovikana waataana onikhala mmuttettheni, etiini wala mweemusini.—Mar. 10:29, 30; aKol. 3:14; 1 Ped. 1:22.

OLOKIHERYA MUUPUWELO AHU

³ Woonasa wene, atthu akina onnaavila oxintta nthalu voohimya sa ovirikana makhalelo mmuttettheni, epoliitika ni inamuna sikina. Akhala wira ti siiso, awo pooti owuupuwela maKristau aYuda a eseekulu yoopacerya. MaKristau ale yaahaana ohiya waakhalela nthalu atthu akina mwaha wa etiini aya. Musuweleke wira murummwa Pedru aahikhalana muxankiho owo. Nto okathi aavahiwa awe muritti woorowa empa ya Kornelio mukhulupale a anakhotto a oRoma, mooreerela murima Yehova aahimukhaliherya mwaha wa yoothanleliwa ele aavahiwe awe.—Mit. Ekap. 10.

⁴ Yehova aapanke sai eyo? Pedru aahoonihiwa inama seiyo aYuda yaathokorerya aya okhala sa mwiikho, nto aahileeliwa wira aahaana wiiva ni okhuura inama iyo sa mwiikho. Okathi Pedru aakhoottale awe opaka eyo, aahiiwa nsu nikhumaka wiirimu nihimyaka wira: “Muhìreleké ti sa mwikho itthu sirerihiwe ni Muluku!” (Mit. 10:15) Yowoonihiwa ele yaahimukhaliherya Pedru oturuka muupuwelo awe ni weemererya yoothanleliwa aavahiwe awe ya omuxukurya mmalapo. Iiwelelaka malakiheryo a Muluku, Pedru aahaaleela atthu yaathukumanne empa ele wira: “Nyuwo mosuwela wira aYuda annikhottiheriwa othukumana n’amálapo, hatá ophiya vaté vaya. Masi Muluku òkithonyerya wira khavo onweryahu omuhimya okhala òthanyeya walá a mwikho. Tivó-nto mwiralyanyu okìhana wene, miyo khíyarwa kihanyiheryaka etthu”. (Mit. 10:28, 29) Tthiri Pedru aahoona wira Yehova aanimweemererya Korneelio ni emusi awe.

⁵ Saulo a oTarso, nFarisi yoowo iixuttihiwe vanceene aahiiyeviha ni aahituruka moonelo awe. Owo aahipacerya waataana ni atthu yaawo ahaaphavela awe waataana khalai. Saulo aahaana otthara malakiheryo aatthu awo. (Mit. 4:13; aGal. 1:13-20; aFil. 3:4-11) Nkahaya muupuwele marukunuxo yaapanke aya a moonelo aya atthu ntoko Sergio Paulo, Dionisio, Tamari, Fileemoni, Oneesimo ni atthu akina yaawo yeemerenrye ihapari sooreera ni yaari atthareli a Yesu Kristu.—Mit. 13:6-12; 17:22, 33, 34; Fil. 8-20.

MOOTA WOOLIPIHA WAATAANA WAHU

⁶ Moohaanyiherya, ophenta wa anna ni arokora a mmulokoni ohookhaliheryani nyuwo okhalana waataana wooloka ni Yehova ni mutthenkeso awe. Nyuwo mwaahoona ophenta nrina ahu, ekanyeryo yeeyo ennisuwanyeiha okhala atthareli eekeekhai a Yesu Kristu, ntoko aahimmye awe oriki: “Kinovahani nikano na nanano: mphentaneke mutthu ni mukhw’awe. Sisale miyo kophentalyakani, siso-tho nyuwo muhana ophentana. Atthu othene anosuwela wira mwà awixutti aka, mwaphentanaka mukina ni mukhw’awe”. (Yoh. 13:34, 35) Tthiri nuumala nyuwo woona wira ophentana iwo khonimalela paahi mmulokoni, masi oniiraneya olumwenku wotheene, nyuwo mwaahincererya omuxukhurela wanyu Yehova ni mutthenkeso awe. Nave munnoona yiiraneyaka eprofesia ya mBiibiliyani yaahimya wira mahiku ookiserya atthu a maloko otheene yaamuthukumanyiwa wira amukokhoreleke Yehova mwa murettele ni mowiiraana.—Mik. 4:1-5.

⁷ Niwehaka itthu sinceene sinaakawanya atthu olelo-va, tani onuupuwela wira vanweryaneya owiiraaniha atthu “a ilapo sothene ni maloko othene ni a mahimo othene ni a malavulelo othene”? (Wis. 7:9) Nkahaya nwehe ovirikana okhanle wa atthu hata ilapo seiye etekonologia aahiiso atthu aya ari oosomexa wala ilapo seiye atthu aya anivarexexa soolema sa khalai aahiiso sa munlokoni. Nave nwehe onyakulihana onikhumelela mwaha wa etiini, atthu a nikhuli nimosaru ni a elapo emosaru. Nave-tho okhala wira atthu anceene annikhaliherya vanceene ilapo saya, nkahaya nwehe moota atthu akawanyeyale aya mwaha wa epoliitika. Ohiya-vo, niwehaka ovirikana wa makhalelo aatthu ntoko akina oohaawa, akina oothaaciri ni itthu sikina sinaavirikanyiha atthu, wiiraana mwa murettele ni moophenta wa atthu a maloko oovirikana, a ilavulelo soovirikana ni a ilapo soovirikana onnooneya wira mwiiriirya onipakiwa ni Muluku oowerya sotheene.—Zak. 4:6b.

⁸ Tthiri wiiraana iwo ti wekeekhai. Okathi mwaakhanle anyu Namoona a Yehova, nyuwo mwaahipacerya wiirela mpantta emusi eyo yowiiraana. Nto okhala wira munnittottela mureerelo wiiraana iwo, muritti anyu okhaliherya olipiha wiiraana iwo. Munoowerya opaka eyo muttharaka malakiheryo a murummwa Paulo ari aGalasia 6:10, yaawo ani: “Tivó, okathi wothene ninweryahu, niwireleke sorera atthu othene, masi vanjenexa amus’ihu òwamini”. Nave muhaana otthara malakiheryo ala ani: “Ehikhalé etthu enìranyu mphavelaka oxinttana walá wittottopa: nto mwiyeviheke, khula mutthu awonelaka vatthu akhw’awe vowivikana mmansawe. Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”. (aFil. 2:3, 4) Vaavo nniimananiha ahu waathokorerya anna ni arokora ntoko Yehova onaathokorerya awe, ohiya moovarihana ni makhalelo aya, nnovikanihaka okhalana waataana wooloka, murettele ni ohakalala.—aÉf. 4:23, 24.

NTHOKORERYANEKE MUKINA NI MUKHWAAWE

⁹ Murummwa Paulo aahirumeela nlikanyiho na erutthu ya apinaatamu wira ooniherye wira muloko ti wowiiraana. Nto atthu otheene mmulokoni annithokoreryana mukina ni mukhwaawe. (1 aKor. 12:14-26) Ekeekhai wira noorakamelana ni annihu ari ilapo sikina. Masi hata vari siiso, hiyo ninniphavela osuwela moota anikhala aya ni waaphenta wahu khonivukuwa mwaha woorakamelana. Nave akhala wira annihu a ilapo sikina annilupatthiwa, otheene ahu ninnixanka. Ohiya-vo, akhala wira annihu akina annihaawa wala sinnaakhumelela ihasara ntoko ikhotto ni itthu sikina, ninniimananiha waakhaliherya momunepani ni waavaha itthu sinaathowa sa werutthuni.—2 aKor. 1:8-11.

¹⁰ Otheene ahu, nihaana waavekelela anna ni arokora khula nihiku. Anna ni arokora akina anneehereriwa opaka itthu soohiloka, akina anniviriha mixankiho sinisuweliwa ni atthu anceene. Nave-tho akina annilupatthiwa ni ale anvarana aya muteko, anisomana aya oxikola aahiiso ni atthu ale ankhalana aya etthoko emosa mwaha wa ovirikana etiini, woonasa wene atthu akina khanisuwela itthu iyo sinaakhumelela. (Math. 10:35, 36; 1 aTes. 2:14) Itthu iyo sinninixankiha vanceene, mwaha woowi ninnaaphenta annihu a olumwenku wotheene. (1 Ped. 5:9) Anna akina anniimananiha vanceene ovara muteko wa Yehova ahoolelaka muteko woolaleerya ni mmulokoni. Nave aakhala akina arina miritti sa ohoolela muteko ahu olumwenku wotheene, nto otheene ahu nihaana waavekelela niwooniheryaka wira ninnaaphenta ni ninnaathokorerya hata noonaka wira khanikhanle oopaka etthu wira naakhaliherye.—aÉf. 1:16; 1 aTes. 1:2, 3; 5:25.

¹¹ Atthu a Yehova ahaana wiilokiherya wira akhaliheryane mukina ni mukhwaawe nnaamwi olumwenku ola ohireere mixankiho mahiku ala ookiserya. Okathi mukina, ihasara sa ephattu ntoko itetere, osareya wa maasi, onniniiriha waakhaliherya anna awo aphwanyiwe ihasara iyo naavahaka itthu sa werutthuni. MaKristau a eseekulu yoopacerya aanivaha ntakiheryo nooloka ninreerela ahu otthara. Attharaka malakiheryo a Yesu, maKristau a epooma ya wAntiyokiya yaahaavaha itthu sa werutthuni annaya a oYudeya. (Mit. 11:27-30; 20:35) Muhoolo mwaya murummwa Paulo aahaatumererya maKristau ooKorinto okhaliherya muteko wowaakhaliherya atthu ale oothoiwa mwa enamuna yootthokiherya. (2 aKor. 9:1-15) Olelo-va, arumeyi a Yehova ntoko ekrupu wala ntoko mutthenkeso anniimananiha waakhaliherya annaya oothoiwa.

NOOTHANLIWA WIRA NIPAKEKE OTTHUNA WA YEHOVA

¹² Annihu a olumwenku wotheene tootthokiheya wira nipakeke otthuna wa Yehova. Olelo-va, Yehova oniphavela wira ihapari sooreera sa Omwene silaleiwe elapo yotheene wira maloko otheene esuwele. (Math. 24:14) Vaavo ninvara ahu muteko owo, Yehova oniphavela wira neetteleke malamulo ni malakiheryo awe. (1 Ped. 1:14-16) Tthiri nimphavela wiimananiha wiiwanana mukina ni mukhwaawe vaavo ninlaleya ahu ihapari sooreera sa Omwene. (aÉf. 5:21) Moohaanyiherya, ola khahiyo okathi wowaavya soophavela sahu, masi nihaana opweha nipuro noopacerya Omwene wa Muluku mookumini mwahu. (Math. 6:33) Vaavo ninlaleya ahu ihapari sooreera mowiiraana nuupuwelaka eyo, ninniphwanya ohakalala niinaano-va ni nnoophwanya mareeliho ahinimala.

¹³ Hiyo Anamoona a Yehova noovirikana ni apinaatamu akina, maana ninneettela malamulo a Yehova ni ninniluttuweliwa ovara muteko wa Muluku. (Tito 2:14) Omukokhorela wahu Yehova onniniiriha ovirikana ni atthu akina. Ohiya paahi ovara muteko ni anna ni arokora a olumwenku wotheene, hiyo ninlavula nttaava nimosa paahi, nttaava na ekeekhai. Nave ninneettela ekeekhai ninlavula ahu. Eyo yaahihimmwa vahinatthi vaavo Yehova aamulenle awe profeta Sofoniya olepa so: “Numalá, kinoreriha iyano s’amálapo, wira othene aya ekilompeke miyo pahi, ehalompeké-tho amuluku a ethiru, ni wira ekirumeleke ni murima mmosaru”.—Sof. 3:9.

¹⁴ Nave Yehova aahimuleela Sofoniya moota annihu yaarowa aya wiiraana olumwenku wotheene olelo-va. Owo aahimmye so: “Awo khantthikela-tho watthekela akhw’aya: khanihokolowela-tho wotha, nnakhala olavula itthu siniwototha atthu. Anowerya olya n’umumula, ehòvaka etthu: khivo etthu enrowa owopopiha”. (Sof. 3:13) Hiyo ninniwerya ovara moowiirana mwaha woowi ninnisuwela Nuulumo neekeekhai na Yehova, nooturuka muupuwelo ahu ni noorukunuxa okumi ahu wira ovarihaneke ni malamulo a xariya a Yehova. Hiyo ninniwerya opaka itthu seiyo moonelo wa apinaatamu sinikhala ntoko wira khisiniweryaneya. Tthiri vannooneya wira hiyo na atthu a vameekhaaya, atthu a Yehova, yaawo aninvuwiha olumwenku wotheene.—Mik. 2:12.