Tanii Mwekeekhai Onilamulela Olumwenku?
Anceene yaarowa waakhula nikoho nno vasulu ni nsuu nimosaa paahi—Muluku. Masi ti vanthoonyeryo wi khivakhanle mBiibiliyani mapuro anaakhulela wi Yesu Kristu aahiiso Tiithi awe arii mwekeekhai anamalamulela a olumwenku ola. Moovirikana, Yesu aahimmye: “Okathi ula, . . . yowo oniruma vathí-va, t’unrowawe womoliwa.” Ni aahincererya: “Mulupale òlumwenk’ula ohanle orwa. Owo kharina owerya w’okìriha etthu.”—Yohani 12:31; 14:30; 16:11.
Vano, namalamulela a olumwenku ola orii ovaanyihanaka ni Yesu. Tanii namalamulel’ola?
Mikhalelo sa Elapo Yotheene Sinnikhaliherya Waakhula
Nnaamwi vakhanleene wimananiha w’atthu arina ophavela wooloka, olumwenku orii ohaawaka vaalupale mu ovira wa Soohimmwa S’atthu. Ela enniiriha wi atthu anupuwelela yiikoheke, ntoko namalepa okhwiiye David Lawrence: “‘Murettele elapo ya vathii’— kinoona wi atthu otheene amphavela yeeyo. ‘Oreera murima w’apinaatamu’—kinoona wi mixovo sotheene sa olumwenku sinnilavula voophavela yeeyo mukina ni mukhw’awe. Nto, ettheken’ye exeeni? Mulattu xeeni vanopopihaniwa aya ni ekhotto nnaamwi vakhanleene sotthuna s’ephattu s’atthu?”
Vankhala ntoko vohiweryaneya, kahiyo siso? Vanaamwi yoophavela y’ephattu y’atthu eryeene okhala ni murettele, awosa vanli-vanli anninyokhana ni wiivanana mukina ni mukhw’awe—ni otakhala vanceene! Nvarerye otakhala murima wulupale opakiwe woonamaphwata. Apinaatamu anivarihela muteko ikwartu sa gás oniiva, mapuro anthukumanyiwa atthu oovariwa, malumi a mooro oovonyiwa, ibomba napalm ni iphiro sikina sootakhalexa wira ahaaxeke ni wiivanana mukina ni mukhw’awe moohikhalana ikharari.
Munnikupali wira apinaatamu, aniphavela murettele ni ohakalala, anoowerya, wa awo mmansayaru, wiira soonanara sulupale awiirelaka akina? Ikuru xeeni seiyo sinaalipiherya aahiiso siniwiiriha atthu wiira itthu seiya soonanara, saroohaka mmikhalelo iniwiiriha opaka sootakhala? Mootoko wiikoha akhala wi vaakhala ikuru sikina sootakhala, sihinooneya, inaalamulela atthu siwiirihaka opaka miteko sohooxa?
Osuwanyeehiwa w’Anamalamulela Oolumwenku Ola
Khivantthuneya wanyiheryaka, okhala wira Biibiliya onnooniherya mowooneya wira ookhala mutthu aankhili, ohinooneya, onaalamulela apinaatamu hataa maloko. Ola onihimya: “Olumwenku wotheene orii mu owerya wa mutakhali.” Nto Biibiliya onnimusuwanyeeha, oriki: ‘Onìhaniwa xetwani walá satana . . . oniwototha atthu othene.’—1 Yohani 5:19, Tradução do Novo Mundo NM; Wisupulula 12:9.
Okathi mukina, ‘èhereriwaka ni xetwani’, Yesu khaakhoottale muteko wa Satana ntoko namalamulela oolumwenku ola. Biibiliya onnitaphulela yeele yiranen’ye: “Xetwani ahinweliha Yesu vasulu va mwako worekamexa, ahimoniherya omwene wothene wa mulaponi n’uvuwa waya, khumwirela: ‘Kinimovahani itthu iye sothene, mwakikokhorelaru.’ Vano Yesu ahimwirela: ‘Khuma va, xetwani!’”—Matheyo 4:1, 8-10.
Mupuwelele yeeyo. Satana aamwehale Yesu onvahaka “omwene wothene wa mulaponi”. Masi, yoovaha ya Satana yamukhala yoweeha yekeekhai vaakhanle wira Satana kahiyo mwekeekhai namalamulela a mamwene ale? Nnaari, khiyaakhala. Wehani wi Yesu khaakhoottale wira mamwene otheene a mulaponi ta Satana, etthu yaakela awe wiira vaakhanle wi Satana khaarina owerya wa awo. Sisonto, Satana, Diabo, orii mwekeekhai namalamulela oohooneya a olumwenku! Mwekeekhai, Biibiliya onimwiihana okhala “muluku a mukhalelo ola wa itthu”. (2 aKorinto 4:4, NM) Nto, moota xeeni vaweryanen’yaya mutthu ootakhala siso okhalana memelelo ooweryexa?
Yoole okhanle Satana aari nlaikha naapattuxiwe ni Muluku, masi aahipacerya oramela mapuro a Muluku. Owo aahinyohola ophwanelela olamulela w’ephattu wa Muluku. Mwa yeeyo aahivarihela muteko enowa ntoko namakuxa masuu wira enwoke muthiyana oopacerya, Eva, ni aahiwerya wi awo ni iyawe, Adamu, apake yeele yaaphavela awe, ohiya omwiiwelela Muluku. (Maphattuwelo 3:1-6; 2 aKorinto 11:3) Owo aahihimya-tho wira anwerya wahapuxa wa Muluku anamwane otheene a’Adamu n’Eva, yaale nlelo yawehererya oyariwa. Sisa, Muluku aahinvaha okathi wira Satana wererye woona yahimmya awe, masi khisinkhumelela saana wa Satana.—Yobi 1:6-12; 2:1-10.
Vanthoonyeryo vo, Satana khonilamulela olumwenku mekhawe. Owo aahiwerya owoka malaikha makina khikhalaka vamosaa n’uwo moomurukunuwela Muluku. Alasa yahikhala minepa sootakhala, anamakhaliherya awe oomunepani. Biibiliya onnaromola yaawosa wawaraalihaka makristau: ‘Mwisakiheke n’ikuru sa Muluku, ni siso munowerya omòmola xetwani, onorwelani nyuwo n’ulavilavi awe. Vekekhai, hiyo khanniwàna nivirikanyaka owerya w’atthu; ekhotto eniwànahu ti yovirikanya oweryan’ikuru ni makhulupale a elapo ela, eri mwepiphini, nave-tho axetwani a musulu.’—aEfeso 6:11, 12.
Mukhoottele Minepa Sootakhala
Oolamulela ala ahinooneya eelapo ni ootakhala arii oowimananiha wira yaahapuxe apinaatamu otheene, yaahapuxaka mu omukokhorela Muluku. Imosaa sa iphiro seiyo minepa sootakhala sinivarihela aya muteko sirii omwarexa mupuwelelo wawi vaakhala okumi numala okhwa, nnaamwi Nuulumo na Muluku noniheryaka mowiwanyeya wi alipa-ookhwa khansuwela-tho etthu. (Maphattuwelo 2:17; 3:19; Ezekiyeli 18:4; Esalimo 146:3, 4; Musuweli 9:5, 10) Sisonto, munepa wootakhala, otakihaka nsuu na mutthu okhwiiye, waanyiheryasa onoolavula n’amusi aahiiso aphatthani awe akumi, hataa orweela mwa waakoha anamaciini, hataa orweela mwa “nsuu” nnikhuma mmapuro ahinooneya. “Nsuu” nniipaka okhala mulipa-ookhwa, masi mwekeekhai orii munepa wootakhala!
Vanonto, nihiku nno mwiiwa “nsuu” siso, muhihiye mootothiwaka. Mukhoottele etthu eri yotheene enikela aya ohimya, mutthikele oromola masuu a Yesu: “Khuma va, xetwani!” (Matheyo 4:10; Yakobo 4:7) Muheemererye wi ophavela otokosa mapuro ahinooneya owiiriheni okhala oovoloohiwa ni minepa sootakhala. Ovoloohiwa wenno oniihaniwa onammunepani, navee Muluku onnaawaraaliha anamakokhorela awe osyaka mikhalelo sotheene sa seiya. Biibiliya onnikhoottiha wi “ahikhalé onrowa waxerya ehakó . . . walá wakoha amuluku a ethiru, nnákhala opaka maxitta . . . ni minepa s’alipa-òkhwa”.—Otumererya 18:10-12; aGalasia 5:19-21; Wisupulula 21:8.
Okhala wi onammunepani onnimwiiriha mutthu okhala ohapuweliwa ni minepa sootakhala, mukhoottele soopaka saya sotheene, moohithokorerya oreera waya aahiiso okhala sookuxa murima. Sowiira sene seiya sinihela muhina ehako ya loola ni khavacira, otaphulela mitthotti sa matata ahu (kiromancia) ni waxererya ehako itheneeri. Minepa sootakhala sinniruuha-tho onyakula ni sookhumelela sikina sowooneya mwa ipa seiye simpaka aya okhala muttetthe aya.
Ohiya eyo, minepa sootakhala sinnivarela muteko yowuramela ya ottheka w’apinaatamu, ikumiheryaka ilivuru, ifilime ni iprograma sa televisau sinooniherya mukhalelo woohiloka wa orupihana ni wohikhala w’ephattu. Minepa sootakhala sinnisuwela wira mupuwelelo woohiloka, wahikumihiwe mmupuweleloni, onnihiya malepa ahimmala ni onniwiiriha atthu okuxa mwettelo woohiloka—ntoko sisale minepa sootakhala.—Maphattuwelo 6:1, 2; 1 aTesalonika 4:3-8; Yuda 6.
Ekeekhai wira anceene anninyohola mupuwelelo woowi olumwenku ola onilamuleliwa ni minepa sootakhala. Oheemererya wenno ohikhalee ontutuxaka, okhala wi Biibiliya onihimya wira: “Hatá xetwani onìtatuxa wira òneye ntoko nlaikha nowarya.” (2 aKorinto 11:14) Owoka wawe woovikana orii owiiriha anceene okhala oohoona ekeekhai yoowi owo ni minepa sootakhala sookhala tthiri. Masi muhiwokiwe! Diabo ni minepa sootakhala sookhala tthiri, nto nyuwo muntthuneleya ovikaniha wakhoottela awosa.—1 Pedru 5:8, 9.
Moohakalaliha, nrii vakhiviru nihiku vaavo Satana ni muloko awe ohinrowa awe okhala-tho! “Makhalelo ala [ohela muhina anamalamulela awe ootakhala] anomala”, onninlipiherya Biibiliya, “nto ole onettela otthuna wa Muluku onokhala mahiku othene”. (1 Yohani 2:17) Otaphuwa wowira sai vaavo yohapuwela ela yootakhala vanrowa aya ovenxiwa! Nikhalee, vanonto, muhina wa ale anipaka yotthuna ya Muluku ni anrowa waakhela okumi ohinimala mu elapo esyaa yaxariya ya Muluku.—Esalimo 37:9-11, 29; 2 Pedru 3:13; Wisupulula 21:3, 4.
Voohikhala wira varii nthoonyeryo nikina, soromoliwa sotheene sa mBiibiliyani vasulu, siri sa Biblia - Solempwa sa Muluku, Solempwa sa eHeberi; ni Watàna wa Nanano, Solempwa sa eKriki.
[Elatarato eri epaaxina 4]
Anwerya Satana onvaha Yesu ikuvernu sotheene sa mulaponi vaakhanleke wira kahiyo sawawe?