Yoosoma 9

Apatthani A Muluku Tanii?

Yesu Kristu Mwaana a Yehova ni mpatthani awe oomwaattamela ni oophentexiwa. Ohinatthi okhala ntoko mutthu valaponi, Yesu aahikhala wirimu ntoko nlaikha nomunepani noowerya. (Yohani 17:5) Numala, aahirwa valaponi wira owiixuttihe atthu ekeekhai ya Muluku. (Yohani 18:37) Owo oovaha okumi awe womutthu wi owoopole apinaatamu wutthekani ni wukhwaani yaale ari oowiiwelela. (aRoma 6:23) Yesu ninano-va orii Mwene a Omwene wa Muluku, ekuvernu ya wirimu enrowa opaka elapo ela okhala Eparayiisu.—Wisupulula 19:16.

Malaikha nave-tho arii apatthani a Muluku. Malaikha khapacerin’he okhala akumi ntoko apinaatamu valaponi. Awo apattuxiwe wirimu ni Muluku ohinatthi opattuxa elapo. (Yobi 38:4-7) Aakhala malaikha ikonto ikonto sene. (Daniyeli 7:10) Apatthani ala a wirimu a Muluku aniphavela wira atthu yiixutte ekeekhai ya Yehova.—Wisupulula 14:6, 7.

Muluku ookhalana-tho apatthani valaponi; owo oniwiihana okhala anamoon’awe. Nipuro nniphukiwa milattu, namoona onlavula ele enisuwel’awe sa mutthu aahiiso sa etthu ekina. Anamoona a Yehova anaaleela akina ele enisuwel’aya voohimya sa Yehova ni soolakela sawe. (Yesaya 43:10) Ntoko malaikha, Anamoona aniphavela wookhaliheryani nyuwo wira mwiixutte ekeekhai ya Yehova. Anniphavela-tho wira mukhale apatthani a Muluku.