WAAKHULIWA WA MAKOHO A MBIIBILIYANI

Niireke malaikha anninikhaliherya?

Yehova Muluku oopattuxa imilyau sinceene sa malaikha iyaakha sinci ohinatthi waapattuxa atthu. (Yobi 38:4, 7) Okhala wira malaikha ari soopattuxiwa sa omunepani soowerya sinimurumeela Muluku, okathi mukina annirummwa ni Muluku wira yaakhaliherye arumeyi a Muluku valaponi. (Esalimo 91:10, 11) Olelo-va, malaikha annaakhaliherya atthu wiixutta ihapari sooreera seiyo atthareli a Yesu anilaleya aya.​—Mmusome Wisupulula 14:6, 7.

Niireke nihaana opakaka mavekelo niroihaka wa malaikha? Nnaari. Ovekela oniirela mpantta okokhorela weiwo okhanle wa Muluku paahi. (Wisupulula 19:10) Okhala wira malaikha ti arumeyi a Muluku, awo aneettela malakiheryo anikhuma wa Muluku ohiya wa apinaatamu. Nto, nihaana onvekelaka paahi Muluku orweela wa Yesu.​—Musome Esalimo 103:20, 21; Matheyo 26:53.

Niireke ahaavo malaikha ootakhala?

Moolikanasa ni apinaatamu, malaikha apattuxiwe wira akhalaneke othanla wootaphuwa, opaka itthu sooloka wala soohiloka. Mooriipiha murima, malaikha manceene ammwareela Muluku. (2 Pedru 2:4) Opacenrye omwareya aari Satana, nto akina khumutakihaka ni khupakeya minepa sootakhala. Mwa okathi vakhaani ovinre, Satana ni malaikha awe ahoomoliwa wiirimu ni khuvonyeriwa valaponi.​—Mmusome Wisupulula 12:7-9.

Wuncerereya wa otakhala okhuma eyaakha ya 1914, ethoonyeryo yoowi moohipisa Muluku onirowa omutthukwela Satana ni axetwani awe. Nto Muluku onirowa olokiherya elapo wira ekhale ntoko yaari aya wanipacerya.​—Mmusome Wisupulula 12:12; 21:3, 4.

Wira musuwele soohimmwa sikina muwehe muru 17 wa eliivuru ela, yoolaleiwa ni Anamoona a Yehova

Mubaxari va www.jw.org/vmw