Mwiixutte Ele Nuulumo Na Muluku Enihimya Aya

Malaikha Ooloka ni Ootakhala Annirihani?

Epantte ela ya erevista, enithokorerya makoho waaniheryasa atonko anyu opaka nave ennitthokiherya moota Biibiliya onaakhula awe. Anamoona a Yehova anoohakalala othokorerya mwaha ola ni nyuwo.

1. Malaikha, ikhalelo saya siri sai?

Malaikha soopattuxiwa sinikhala wiirimu, khinniwerya waaweha. Mukhalelo aya wa erutthu ti wuulupale waavikana apinaatamu. Muluku, yoowo-tho ohiniwerya ahu omoona, oopattuxa malaikha ahinatthi opaka etthaya. (Yobi 38:4, 7; Matheyo 18:10) Yehova, ookhalana imilyau sinceene sa malaikha oororomeleya.​—Musome Esalimo 103:20, 21; Daniyeli 7:9, 10.

2. Niireke malaikha annaakhaliherya atthu?

Malaikha, yaahimukhaliherya mulopwana axariya iihaniwa Lothi. Owo aakhala esidade yeeyo Muluku aarowa awe ohonona mwaha wa otakhala wa atthu elapo ele. Malaikha manli yaahimuleela Lothi wira atthyawe ni emusi awe. Atthu akina yoona wira waari othweela, nto khuhicalela. Masi Lothi ni anaawe axithiyana, yahoopowa mwaha wa wiiwelela malaikha yaarummwe ni Muluku.​—Musome Maphattuwelo 19:1, 13-17, 26.

Biibiliya onihimya wira, olelo va malaikha annaakhaliherya atthu oororomeleya olaleya ihapari sooreera sa Omwene wa Muluku. (Matheyo 24:14) Ihapari iyo sinihela muhina waalopola atthu. Ntoko sarya aya okathi wa Lothi, ti vooloka wiiwelela soolopola sa Muluku.​—Mmusome Wisupulula 1:1; 14:6, 7.

Muluku pooti waarumeela malaikha wira onilipihe okathi wa mixankiho. Aahiruma malaikha wira emulipihe Yesu.​—Mmusome Luka 22:41-43.

Moohipisa Muluku onrowa oruma malaikha mmoota mukina, wira yaapwetexe atthu anikumiherya ohaawa. Eyo ti etthu enrowa owoopola apinaatamu.​—Mmusome 2 aTesalonika 1:6-8.

3. Itthu xeeni sinniiriha aya malaikha ootakhala?

Ntoko siisaale valaponi apinaatamu akina ahinimwiiwelela aya Muluku, wiirimu aakhala malaikha manci amurukunuwenle Muluku. (2 Pedru 2:4) Awo aniihaniwa malaikha ootakhala. Mukhulupale aya ti Satana Diabo. Satana ni malaikha awe ootakhala, annaahapuxa apinaatamu.​—Musome Wisupulula 12:9.

Satana onnaarumeela anakoso oohiloka, ikuvernu sa apinaatamu ni itiini sowootha wira saahapuxeke atthu ephiro ya Muluku. Nto, Satana tonikumiherya opuheryana, ohaaxana, ni ohaawa wa apinaatamu.​—Mmusome 1 Yohani 5:19.

4. Malaikha ootakhala anaawoka sai atthu?

Satana onnaawoka atthu anceene vaavo oniwiixuttiha awe wira alipa ookhwa annithatuwa minepa khiyuuluma ni atthu. Masi Biibiliya onihimya wira mutthu okhwiiye khansuwela etthu. (Musuweli 9:5) Masi minepa sootakhala, sinnaawoka atthu vaavo sinitakiha aya esooti ya mmusi okhwiiye. (Yesaya 8:19) Sinnaarumeela akulukhana, anahako, anookhwiri, ni anamaxitta wira saawoke atthu anci. Nuulumo na Muluku ninnitumererya okhootta itthu iyo sotheene. Nto, nihaana onyaanya itthu sotheene sirina ahu sinivarihana ni minepa.​—Musome Otumererya 18:10, 11; Miteko 19:19.

Akhala wira ninnimphenta Yehova, khaninrowa woovaka minepa sootakhala. Naasomaka Nuulumo na Muluku khiyavarihela muteko mookumini mwahu, ninrowa omukhoottela Satana wira nimwaattamele Muluku. Yehova toowerya sotheene ovikana minepa sootakhala. Nto malaikha a Yehova anoonikhaliherya okathi wa mixankiho.​—Musome Esalimo 34:7; Yakobo 4:7, 8.

Mwaphavela soolakiherya sikina nwehe muru 10 wa eliivuru ela epakiwe ni anamoona a Yehova. Biibiliya Oniixuttiha Exeeni Tthiri?