Masu Oomaliherya

1, 2. Xeeni varyaaya vootthuneya olipiha waamini wahu vano? Nvahe ntakiheryo.

WAAMINI. Ti nuulumo nooreera, ninootepexa ovara murima. Masi okathi oniphwanya ahu nuulumo nla, nnimwiira saana akhala wira ninnuupuwela nuulumo nikina noowi: “waakuvela!” Okhala wira naahikhalane waamini, ti vootthuneya waakuvela okhala mutthu oowaamini. Nto nakhala owaamini, nihaana waakuvela okhapelela ni olipiha. Mwaha wa xeeni?

² Nkahaya muupuwele mweettaka motakhoni. Nyuwo khuvoliwa ntthona nto khuyaphavela maasi. Okathi oniphwanya anyu, munothokorerya saana wira ahimale mwaha wa oviha wa nsuwa. Ohiya-vo nyuwo muhaana waacererya maasi ale wira ahimale mpakha nyuwo ophiya onirowa anyu. Vamosaru, olelo-va hiyo niri ntoko mutthu oneetta opuro woothowa maasi, elapo ela waamini wekeekhai weiwo onilikana ni maasi, onnithowa ni waakuva omala, ntoko maasi animala mwaha wa oviha wa nsuwa ni ohaacereriwa. Ntoko vahiniweryaneya aya okhala ohiwuryaka maasi, khivaniweryaneya wataana ni Yehova mutthu ohaaminiki.​—aRom. 1:17.

3. Yehova okumihenrye exeeni wira onikhaliherye wunnuuherya waamini wahu, nave itthu xeeni piili sinitthuneya ahu wuupuwelelaka?

³ Yehova onnisuwela otthuneya waya waakuvela waamini, nave onnisuwela wira olelo-va ti voovila olipiha ni okhapelela waamini iwo. Tivonto okumihenrye awe matakiheryo ooloka wira nitthareke. Yehova aahimuupuxerya murummwa Paulo olepa so: “Mutthareke mwettelo w’atthu ale anamini ni arina nthiti, ni siso anakhela sohiyeriwa Muluku salaihenryawe”. (aHéb. 6:12) Ti maana aya nikhuuru na Yehova ninnintumererya wiimananiha otthara matakiheryo a alopwana ni athiyana oowaamini, yaawo naathokorenrya ahu eliivuru ela. Vano nihaana opaka exeeni? Nihaana wuupuwelelaka itthu piili: (1) Nihaana olipiha waamini wahu; (2) okathi wotheene nihaana owuupuwela anatiri a Muluku.

4. Satana onooniherya sai okhala nwanani a waamini, masi xeeni nihintthuneya ahu otthikela ottuli?

⁴ Nvikaniheke olipiha waamini wanyu. Waamini wookhalana nwanani aya muulupale, eyo piiyo, Satana. Satana ohonona elapo ela enakhala ntoko othako, ophavelaka wira atthu yuupuweleke wira khivaniweryaneya waamini. Satana owo toowerya onivikana hiyo. Nto niireke eyo ehaana onitthikiherya ottuli nuupuwelaka wira khanniwerya okhalana waamini woolipa? Hata vakhaani! Yehova ti Mpatthani muulupale waale arina waamini wekeekhai. Owo onninlipiherya wira onoonikhaliherya omukhootta Diabo, mpakha Diabo onitthyawa. (Yak. 4:7) Ninnimukhootta Diabo vaavo vanaavya ahu okathi wira nikhapelele ni olipiha waamini wahu. Moota xeeni?

5. Alopwana ni athiyana oowaamini ari mBiibiliyani yaaphwanyale sai waamini? Mutthokiherye.

⁵ Ntoko soonale ahu alopwana ni athiyana oowaamini ari mBiibiliyani, khahiyo yaayariwe ni waamini waya. Awo ahooniherya wira waamini onikumiheriwa ni munepa wootteela wa Yehova. (aGal. 5:22, 23) Nto yaanivekela wira akhaliheriwe, nto Yehova khulipiha waamini waya. Nihaana ottharaka ntakiheryo naya, nihiliyale wira Yehova onnaavaha munepa awe wootteela ale aninvekela ni anivara itthu moovarihana ni oveka waya. (Luka 11:13) Etthu xeeni-tho enitthuneya ahu opaka?

6. Ninrowa ottottela sai mureerelo sowiiraneya siri mBiibiliyani?

⁶ Eliivuru ela, nithokorenrye paahi matakiheryo vakhaani a atthu yaawo yoonihenrye waamini woolipa. Masi aakhala-tho matakiheryo makina! (Mmusome aHéberi 11:32.) Nnoowerya-tho wiixutta etthu sa atthu akina ahithokoreriwe muliivuruni-mu. Nto wira nilipihe waamini wahu nihaana osoma voohitthimaka matakiheryo awo ari mBiibiliyani. Wira nittottele mureerelo ele enisoma ahu, nihaana waavya okathi wira nuupuwelele saana ele esommya ahu. Akhala wira khula okathi ninnuupuwela wira alopwana ni athiyana awo oowaamini yaari “ntoko hiyo”, nto waamini waya onoolipiha waamini wahu. (Yak. 5:17) Opaka eyo onooniiriha woona moota awosa yoonela aya okathi yaakumana aya mixankiho ntoko seiye sinikumana ahu.

7-9. (a) Alopwana ni athiyana oowaamini a okathi wa Biibiliya, yaarowa woonela sai omukokhorela Yehova ntoko hiyo olelo? (b) Xeeni vanitthuneya ahu olipiha waamini nooniheryaka ni miteko sahu?

⁷ Nave nihaana olipiha waamini wahu nivarelaka muteko ele enisoma ahu. Okhala wira “wamini ohirina miteko sorera ti wokhwa”. (Yak. 2:26) Nkahaya muupuwelele moota alopwana ni athiyana naathokorenrye ahu eliivuru ela, saarowa aya ohakalala vaakhanle wira aathanleliwa muteko yoole Yehova onivahale awe olelo-va!

⁸ Mwa ntakiheryo nkahaya muupuwele, aarowa woonela sai vaakhanle wira Abrahamu aahimyeeriwe orowa omukokhorelaka Yehova, ohiya va malukuni ooweemexiwa moothakoni, masi eriyari aya ikrupu sa atthu oowaamini ni ootthokiheya saana, opuro wooreera oniitthaniwa Empa ya Omwene, ni opuro wa akongresu, weiwo soolaiherya seiye sooniheriwe awe ‘ottaiwene’, onithokoreriwa aya mwa enamuna yoohakalaliha ni yoowiiweya saana? (Mmusome aHéberi 11:13.) Nave sai vaakhanle wira okathi mwene ootakhala aamurukunuwenle Muluku, Eliya aahimyeeriwe wira muteko awe khahiyo waari owiiva maprofeta a Bayali, masi aahaana omananihaka omurumeela Yehova aaxukuryaka atthu ni waahimyeerya ihapari sa murettele soolipiha ni sa nlipelelo? Tthiri, alopwana ni athiyana awo oowaamini ari mBiibiliyani yaamuhakalala omukokhorela Yehova ntoko siniira ahu vano.

⁹ Nto nihaana olipiha waamini wahu nivarelaka muteko ele eniixutta ahu. Niira siiso, nnimooniherya wira ninnivarihela muteko matakiheryo aniixutta ahu a alopwana ni athiyana oowaamini ari mBiibiliyani. Ntoko sihimmwale aya wa masu oopacerya, eyo enooniiriha owaattamela atthu awo ntoko apatthani ahu. Masi voohipisa, ohoolo opatthani owo onimwiiraneya tthiri.

10. Ohakalala xeeni onrowa ahu okhalana mParayiisu?

¹⁰ Nwuupuweleke anatiri a Muluku. Alopwana ni athiyana oowaamini, yaahiwerya olipelela ele yaaleihenrya awe Muluku. Ankhi nyuwo? Mwa ntakiheryo, nkuupuwelani ohakalala onrowa anyu ophwanya okumana ni arumeyi oowaamini a Muluku okathi onrowa aya ohihimuxiwa “ale òrera murima”. (Musome Miteko 24:15.) Niireke sihaavo itthu siniphavela anyu waakoha atthu awo?

11, 12. Elapo esya, makoho xeeni nyuwo munoona anyu wira munrowa omukoha (a) Abeli? (b) Nowe? (c) Abrahamu? (d) Ruthi? (e) Abigayili? (f) Estheri?

¹¹ Mwakumana ni Abeli, niireke munrowa ophavela osuwela moota saarya aya anamuyari awe? Wala munrowa omukoha so: “Kiireke nyuwo mwaahiwerya olavulana maKherubi yaawehaweha ephiro ya wÉdeni? Kiireke yookhala etthu yaahimmye aya?” Ankhi Nowe? Woonasa wene, mwaarowa omukoha so: “Kiireke mwaaniwoova atthu ale oorakamexa ni aikuru? Mwaawenrye sai okhapelela inama sotheene saari mukalawani?” Mwakumana ni Abrahamu, pooti wira mwaarowa omukoha so: “Kiireke mootoko okumana ni Semi? Mwaamusuwenle sai Yehova? Moonenle sai othaama elapo ya Uri?”

¹² Vamosaru, muthokorerye makoho makina woonasa wene muniphavela anyu waakoha athiyana oowaamini anrowa ohihimuxiwa. Wa Ruthi, pooti wira munrowa omukoha so: “Etthu xeeni yaawiirihaleni othanla omukokhorela Yehova?” Wa Abigayili, pooti ophavela osuwela ela: “Kiireke mwahoova okathi waarowa anyu omuleela Nabali wira monvaha nikhaliheryo Davidi?” Wa Estheri, waaniheryasa munrowa omukoha so: “Exeeni yiiraneyale nyuwo ni Mardokeyo nuumala ele enihimmwa mBiibiliyani?”

13. (a) Itthu xeeni woonasa wene alopwana ni athiyana oowaamini anrowa aya wookohani? (b) Munoonela sai voohimya sa okumana ni alopwana ni athiyana oowaamini a khalai?

¹³ Nave pooti wira alopwana awo ni athiyana oowaamini sookhala itthu sinrowa aya wookohani. Tthiri vanrowa okhala vooreera waaleela itthu saakhumelela mahiku ookiserya, ni moota Yehova aareelihale awe atthu awe okathi ola woovila! Voohaaniherya anoosiveliwa wiiwa moota Yehova owaakhwanihenrya awe anatiri awe. Okathi owo, khivanrowa ovilaka owuupuwelela arumeyi oororomeleya a Muluku aniromoliwa mBiibiliyani. Mwaha woowi ninrowa okhalaka vamosa mParayiisu! Nto nvikaniheke opaka ele eniwerya anyu wira mwaawehe atthu awo. Nvikanihe otakiha waamini waya. Muhakalaleke omurumeela Yehova ntoko arumeyi awo, ni nwooneke okhala apatthani anyu mahiku otheene!