Itiini Sowootha Siniwiiriha Sai Atthu Ohimwaattamela Muluku?

Akhala wira Muluku ti ophenta, nto xeeni itiini siniihimya omukokhorela Muluku sinipaka aya itthu sootakhala mwa nsina na Muluku? Olavula mookwasa itiini iyo ti sowootha. Nave sinniixuttiha itthu sowoothiwa voohimya sa Muluku. Itiini sowootha siniwiiriha sai atthu ohimwaattamela Muluku? Muluku onoonela sai mwaha owo? Onrowa opaka exeeni?

1. Itthu siniixuttiha aya itiini sowootha siniwiiriha sai atthu ohimwaattamela Muluku?

Itiini sowootha sooturuka “ekeekhai ya Muluku, ni wootha”. (aRoma 1:25) Mwa ntakiheryo, itiini sinceene khasiniiwiixuttiha atthu aya nsina na Muluku. Masi Biibiliya onihimya wira ti vooloka orumeela nsina na Muluku. (aRoma 10:13, 14) Vaavo sinikhumelela aya itthu sootakhala wala ihasara, mapaatiri, mapastoore ni ahooleli akina a itiini anihimya wira yootthuna ya Muluku. Masi eyo etthu yowoothiwa. Maana Muluku khahiyo tonikumiherya itthu sootakhala. (Mmusome Yakobo 1:13.) Mooriipiha murima, itthu iyo sowoothiwa sinniwiiriha atthu akina ohimwaattamela Muluku.

2. Itthu sinipakiwa ni itiini sowootha siniwiiriha sai atthu ohimwaattamela Muluku?

Biibiliya onihimya wira itampi sa etiini yoowootha “khasinkontareya”. (Wiisuupulula 18:5) Mwa iyaakha sinceene, itiini sowootha sinnikhaliherya epoliitika ni ikhotto. Nave itiini sowootha sinniiriha wiiviwa atthu imilyau sinceene. Ahooleli anceene a itiini sowootha toothaaciri, niire so, aakhalana makhalelo ooloka ni annaakhanyererya atthu aneetta etiini aya waavaha musurukhu wira aliveryeke itthu arina aya. Nave itiini sowootha khasinaathokorerya atthu ntoko Yehova onaathokorerya awe. Ahooleli a itiini sowootha anihimya wira arummwale ni Muluku, masi itthu anipaka aya sinnooniherya wira kharummwale ni Muluku. Awo khanimusuwela Muluku nnakhala vakhaani.—Mmusome 1 Yohani 4:8.

3. Muluku onoonela sai itiini sowootha?

Akhala wira itthu sinipakiwa ni itiini sowootha sinnoonanarani, ankhi Yehova onoonela sai? Ahooleli a itiini sowootha anniwiiriha atthu ohimwaattamela Muluku ni khanaathokorerya saana atthu aneetta itiini saya. Yehova onnaaphenta vanceene atthu ni khasinimusivela itthu soohiloka sinipakiwa ni ahooleli a itiini. Nave Muluku ooleiherya wira moohipisa onoopwetexa itiini sowootha ni ‘khasinrowa-tho ophwanyiwa’. (Wiisuupulula 18:21) Eyo enooniherya wira moohipisa itiini iyo sowootha khasinrowa-tho okhala.—Wiisuupulula 18:8.

MWIIXUTTE ITTHU SIKINA

4. Muluku khoneemererya itiini sootheene

Atthu anceene anuupuwela wira itiini siri ntoko iphiro soovirikana siniroiha opuro omosa, niire so, wa Muluku. Niireke eyo ekeekhai? Mmusome Matheyo 7:13, 14, nuumala-vo mwaakhule nikoho ninttharelana:

• Biibiliya onihimya exeeni voohimya sa estaraata eniphwanyiha okumi woohimala?

Nwehe EVIIDIYU, nuumala-vo mwaakhule nikoho.

EVIIDIYU: Niireke Muluku Onneemererya Inamuna Sotheene Sookokhorela?—Eviidiyu yaamukhaani (3:22)

• Niireke Biibiliya onniixuttiha wira itiini sootheene sinnimuhakalaliha Muluku?

5. Itthu sinivariwa ni itiini sowootha khasinooniherya wira Muluku toophenta

Itiini sowootha sinniwiiriha atthu ohimwaattamela Muluku mwa inamuna sinceene. Enamuna yootepexa otakhala, okhala wira itiini sowootha sinnikhaliherya ikhotto. Nrowe niwehe ntakiheryo nimosa, nwehe EVIIDIYU. Nuumala-vo mwaakhule makoho.

EVIIDIYU: Moota Itiini Siirenle Aya Mpantta Ekhotto ya Nenli ya Olumwenku Wotheene (2:22)

• Itiini sinceene saapanke exeeni okathi wa Ekhotto ya Nenli ya Olumwenku Wootheene?

• Nyuwo munoonela sai ele yaapanke aya?

Mmusome Yohani 13:34, 35 ni 17:16. Nuumala-vo mwaakhule makoho anittharelana:

• Yehova onoonela sai vaavo itiini siniirela aya mpantta ikhotto?

• Itiini sowootha sookhalana nthowa mwaha wa itthu soohiloka sinipakiwa. Itthu xeeni soohiloka munoona anyu sinooniherya wira itiini sowootha khasinooniherya wira Muluku toophenta?

6. Muluku oniphavela waakhaliherya atthu okhuma itiini sowootha

Mmusome Wiisuupulula 18:4,a (nwehe enoota) nuumala-vo mwaakhule makoho anittharelana:

• Itiini sowootha, sinnaawoka atthu. Nyuwo munoonela sai osuwela wira Muluku oniphavela waakhaliherya atthu okhuma itiini sowootha?

7. Muhihiye wiixutta voohimya sa Muluku eekeekhai

Niireke itthu soohiloka sinipakiwa ni itiini sowootha sihaana owiirihani ohimwaattamela Muluku? Nkahaya mmuupuwele mwaana ohiniiwelela miruku sooloka onivahiwa awe ni paapa awe. Mwaana owo onnikhuma vatthokoni, nuumala-vo onnipacerya opaka itthu soohiloka. Paapa awe khoneemererya itthu soohiloka mwanawe onipaka awe. Niireke vaarowa okhala vooloka onvaha nthowa paapa awe mwaha wa itthu soohiloka mwanawe onipaka awe?

• Niireke vaarowa okhala vooloka onvaha nthowa Yehova ni ohiya wiixutta voohimya sa yena mwaha wa itthu soohiloka sinipakiwa ni itiini sowootha?

IPONTO SUULUPALE

Itiini sowootha sinniwiiriha atthu ohimwaattamela Muluku, sinniixuttiha itthu sowoothiwa ni sinnipaka itthu sootakhala. Muluku onrowa opwetexa itiini sootheene sowootha.

Wuuluula

• Munoonela sai itthu itiini sowootha siniixuttiha aya ni sinipaka aya?

• Yehova onoonela sai itiini sowootha?

• Muluku onrowa wiiriha exeeni itiini sowootha?

NWEHE ITTHU SIKINA

Nwehe itthu piili sinooniherya wira itiini sowootha khasinipaka ele Muluku oniphavela awe.

“Niireke Itiini Sotheene Sinoolikana? Niireke Sotheene Siniroiha wa Muluku?” (Mwaha ori va jw.org)

Xeeni Yehova oniphavela awe wira nimukokhoreleke vamosa ni atthu akina?

“Niireke Vannireerela Wiirela Mpantta Etiini?” (Mwaha ori va jw.org)

Nwehe yowiiraneya ya paatiri yoowo aapacenrye waanyiherya itiini. Masi hata vaari siiso, owo khaahiyale ophavela omusuwela Muluku eekeekhai.

“Exeeni Yaamwiirinhe Paatiri Okhuma Ekerexa Awe?” (Nvenye!, Feverero 2015)

Mwa iyaakha sinceene, itiini sinniixuttiha itthu sowoothiwa voohimya sa Muluku. Nto atthu anceene anuupuwela wira Muluku khonnithokorerya ni tootakhala murima. Mwiixutte ekeekhai voohimya sa itthu tthaaru sowoothiwa.

“Itthu Sinaakhoottiherya Atthu Omphenta Muluku” (Owehaweha, 1 a Novembro, 2013)