Niireke Ifesta Sootheene Sinnimusivela Muluku?

Yehova oniphavela wira nihakalaleke ni okathi mukina nitthekuleke. Masi niireke iferiyatu sootheene sinnimusivela? Ninrowa wooniherya sai wira ninnimphenta Yehova voohimya sa mwaha owo?

1. Xeeni ifesta sinceene sihinimusivela aya Yehova?

Woonasa wene, vanimootikinihani osuwela wira ifesta sinceene khasinivarihana ni ele Biibiliya oniixuttiha awe ni sinivarihana ni etiini yoowootha. Iferiyatu sikina sinivarihana ni okhwiri ni yowiixuttiha yoowi mutthu ookhalana erooho ehinikhwa. Nave iferiyatu sikina sinivarihana ni woova ithiru ni muupuwelo woowi Muluku onnaalepela atthu khula etthu enaakhumelela. (Yesaya 65:11) Yehova onnaalopola atthu otheene animukokhorela oriki: “Mukhume eriyari aya, nvalaane naawo, ni muhiye ovara itthu soonanara”.—2 aKorinto 6:17;a

2. Yehova onoonela sai ifesta wala iferiyatu sinaavuwiha apinaatamu?

Yehova onninlopola wira nihaaroromeleke ‘atthu’. (Mmusome Yeremiya 17:5.) Ifesta ni iferiyatu sikina sinaavuwiha apinaatamu ntoko anamalamulela a elapo ni anakhotto. Sikina sinivuwiha elapo wala nloko. (1 Yohani 5:21) Nave iferiyatu sikina sinivarihana ni epoliitika ni myaha sa mmuttettheni. Yehova aarowa woonela sai akhala wira ninniirela mpantta ifesta aahiiso iferiyatu sinaavuwiha apinaatamu ni sinvuwiha mitthenkeso sihinivarihana ni ele oniphavela awe?

3. Niireke itthu sinipakiwa okathi wa ifesta aahiiso iferiyatu ti sooloka?

Biibiliya onnikhoottiha “ophavela itthu sootakhala, ohapaliwa [ni] ifesta sootakhala”. (1 Pedru 4:3) Ifesta sikina, atthu anceene annipaka itthu soohiloka ni soowuuliha muru. Nto wira nikhale apatthani a Yehova nihaana okhootta ifesta iyo sootakhala.

MWIIXUTTE ITTHU SIKINA

4. Mukhootteke ifesta sihinimusivela Yehova

Mmusome aEefeso 5:10, nuumala-vo mwaakhule makoho anittharelana:

• Etthu xeeni enrowa onikhaliherya wiirela mpantta efesta aahiiso ohiirela mpantta?

• Ifesta xeeni ni eferiyatu sinimakela opakiwa muttetthe anyu?

• Munoona wira ifesta ni iferiyatu iyo sinnimusivela Yehova?

Mwa ntakiheryo, niireke mootoko wiikoha akhala wira Muluku sinnimusivela ifesta sa otthapela nihiku mutthu oyariwe awe? Biibiliya khonimuhimya nnakhala murumeyi mmosa a Yehova aatonko wuupuwelela nihiku aayariwe awe. Masi Biibiliya onnaalavula atthu anli yahaamukokhorela Yehova yuupuwelela nihiku yayariwe aya. Musome Maphattuwelo 40:20-22 ni Matheyo 14:6-10. Nuumala-vo, mwaakhule makoho anittharelana:

• Atthu ala anli yuupuwelela nihiku yayariwe aya, itthu xeeni sootakhala yaapanke aya?

• Moovarihana ni Soolepa iya, Yehova onoonela sai wuupuwelela nihiku mutthu oyariwe awe?

Woonasa wene, nyuwo munniikoha so: ‘Kiireke Yehova onnisiveliwa akhala wira kinniirela mpantta efesta aahiiso eferiyatu ehinivarihana ni ele Biibiliya oniixuttiha awe?’ Mmusome Okhuma 32:1-8. Nuumala-vo, nwehe EVIIDIYU ni mwaakhule makoho.

EVIIDIYU: Iferiyatu ni Ifesta Sihinimusivela Yehova (5:07)

• Xeeni vari aya vooloka osuwela etthu enimusivela Yehova?

• Ninrowa owerya sai opaka eyo?

Ninrowa osuwela sai akhala wira efesta ennimusivela Muluku?

• Niireke efesta eyo aahiiso eferiyatu, enivarihana ni soowiixuttiha sihinivarihana ni Biibiliya? Musuweleke moota eferiyatu aahiiso efesta eyo epacenrye aya.

• Niireke enaavuwiha apinaatamu, mitthenkeso sa apinaatamu aahiiso elapo? Hiyo nninvuwiha Yehova ni ninnikupali ni murima wootheene wira onoomaliha mixankiho sootheene sa moolumwenkuni.

• Atthu anipaka exeeni okathi wa eferiyatu aahiiso efesta eyo? Niireke itthu anipaka aya sinnivarihana ni ele Biibiliya onihimya awe? Nihaana okhalana mweettelo wooloka.

5. Mwaakhaliherye atthu akina osuwela ni ottittimiha yoothanla anyu

EVIIDIYU: Okathi Munaatthokiherya Anyu Atthu Sookupali Sanyu, Mwaattittimiheke (2:01)

Matheyo 7:12, nuumala-vo mwaakhule makoho anittharelana:

• Moovarihana ni yoolepa ela, niireke muhaana waakhanyererya amusi anyu ohiirela mpantta efesta wala eferiyatu?

• Munrowa owooniherya sai amusi anyu wira hata muhiirelaka mpantta ifesta sikina, eyo khentaphulela wira khamunaaphenta?

6. Yehova oniphavela wira nihakalaleke

Yehova oniphavela wira niviriheke okathi woohakalaliha niri ene ni amusi ni apatthani ahu. Mmusome Musuweli 8:15, nuumala-vo mwaakhule nikoho ninttharelana:

• Yoolepa ela, enooniherya sai wira Yehova oniphavela wira nihakalaleke?

Yehova oniphavela wira arumeyi awe aviriheke okathi woohakalaliha ari ene hoothe. Nwehe EVIIDIYU enooniherya moota eyo eniiraneya aya okathi wa akonkresu ahu internasional.

EVIIDIYU: Owaakhela Anna Okathi wa Konkresu Internasional (5:40)

Mmusome aGalasia 6:10, nuumala-vo mwaakhule makoho anittharelana:

• Niireke nihaana wiirela mpantta ifesta aahiiso iferiyatu atthu anipaka aya wira “naakhaliherye atthu otheene”?

• Etthu xeeni yaarowa woohakalalihani, okhanyereriwa onvaha mutthu etthu mwaha wa efesta aahiiso onvaha mutthu etthu mwaha woowi munniphavela ni murima anyu wootheene?

• Anamoona a Yehova anceene annipaka ifesta saamukhaani ni waavaha anaaya itthu sooreera. Mwaarina ene anamwane, itthu xeeni sooloka mukhanle anyu oowaapakela?

IPONTO SUULUPALE

Yehova oniphavela wira niviriheke okathi woohakalaliha niri ene ni amusi ni apatthani ahu. Masi khoniphavela wira niireleke mpantta iferiyatu ni ifesta sihinimusivela.

Wuuluula

• Makoho xeeni anrowa onikhaliherya osuwela akhala wira efesta aahiiso eferiyatu ennimusivela Yehova?

• Ninrowa waakhaliherya sai amusi ni apatthani ahu osuwela etthu enniiriha ohiirela mpantta ifesta ni iferiyatu sikina?

• Ninsuwela sai wira Yehova oniphavela wira nihakalaleke ni nitthekuleke?

NWEHE ITTHU SIKINA

Nwehe iferiyatu ni ifesta makristau ahiniirela aya mpantta.

“Xeeni Anamoona a Yehova Ahiniirela Aya Mpantta Ifesta ni Iferiyatu Sikina?” (Mwaha ori va jw.org)

Nwehe itthu xexe sinnikupaliha wira wuupuwelela nihiku mutthu oyariwe awe khonimusivela Muluku.

“Xeeni Anamoona a Yehova Ahinuupuwelela Aya Nihiku na Oyariwa?” (Mwaha ori va jw.org)

Nwehe moota mmiravo mmosa oonihenrye awe nttittimiho okathi aaveehiwa awe oxikola mwaha wa ohimulya Natali.

Mwaattittimiheke Atthu Anoolupatthani (2:04)

Makristau manceene eekeekhai aathanla ohimulya Natani. Awo anoonela sai yoothanla apanke aya?

“Awo Yaahiphwanya Etthu ya Faita” (Owehaweha, 1 a Dezembro, 2012)