Olavula Itthu Sinaasivela Atthu Akina

Yoolepa: “Ole oniphenta, . . . Khoniphavela mureerelo awe”. — 1 aKor. 13:4, 5.

Etthu Yesu Aapanke Awe

Jesus conversing with a woman at a well.

EVIIDIYU: Yesu ni Muthiyana Musamariya Ari Ene Veehimeni

1. Nwehe EVIIDIYU, aahiiso mmusome Yohani 4:6-9. Nuumala-vo, mwaakhule makoho anittharelana:

Etthu xeeni Yesu anwehanne awe muthiyana ole ohinatthi ovaanela nuuwo?
Yesu aahimmye wiira: “Mukivahe maasi oowurya”. Xeeni munoona anyu wiira eyo yaari enamuna yooreera ya opacerya ovaanela?

Etthu Yesu Onniixuttiha Awe

2. Woonasa wene, nnoowerya ovaanela saana ni mutthu, vakhala wiira nnoolavula mwaha onimusivela mutthu owo.

Mmutakiheke Yesu

3. Muhivarexexeke paahi mwaha mwaalokihenrye anyu. Muhikhanyereryeke olavula paahi mwaha nyuwo mwaalokihenrye anyu khalai ene. Mpaceryeke ovaanela ni atthu, mulavulaka itthu sikhumelenle niinaano awo anisuwela aya. Mwiikoheke so:

‘Ihapari xeeni sinlavuliwa mahiku ala muraatiyoni?’
‘Itthu xeeni anilavula aya mavisiinyu aka ni ale anivarana aka muteko, wala ale anisomana aka oxikola?’

4. Nweheke makhalelo a opuro owo. Mwiikoheke so:

‘Etthu xeeni mutthu owo onivara awe okathi ene yoowo? Etthu xeeni woonasa wene, onuupuwela awe?’
‘Ikuwo siwanre awe, makhalelo awe, aahiiso etthoko awe, enooniherya wiira ta etiini xeeni ni ta elapo xeeni?’
‘Niireke vannireerela ovaanela ni mutthu ola niinaano-va?’

5. Nwiriyaneke.

Muhaatteke itthu soolavula.
Mmwiiriheke mutthu munilavulana anyu, ohimya itthu onuupuwela awe. Vaareerelaka, mmukoheke makoho.

NWEHE-THO SOOLEPA IYA:

Math. 7:12; 1 aKor. 9:20-23; aFil. 2:4; Yak. 1:19.