Nilokiherye Inamuna Sahu Soolaleerya​—Nipacerihe Ovaanela Wira Niwerye Olaleerya

Yesu aahiwerya omulaleerya moohiilokiherya muthiyana ooSamariya okhala wira aahipacerya ovaanela ni muthiyana ole. Ninrowa olokiherya sai inamuna sahu nipacerihaka ovaanela ni atthu nihinaasuwela ahu?

• Mukhaleke oopatthaneya ni mulavuleke ni atthu. Nnaamwi aakhulumunwe, Yesu aahipaceriha ovaanela ovekaka maasi. Nto nyuwo pooti opaceriha mmukohaka ihaali mutheyaka vakhaani, waaniheryasa mulavulaka voohimya sa oriirya wala oviha, aahiiso etthu ekhumelenle niinaano. Muhiliyale wira yoolukama anyu opaceriha ovaanela, nto mulavuleke etthu enrowa omwiiriha mutthu ophavela ovaanela. Vakhala wira mutthu owo khoniphavela ovaanela, muhixanke. Mmananihe ovaanela ni mutthu mukina. Munvekeleke Yehova wira oovaheeni olipa murima.​—Ne 2:4; Mit 4:29.

• Mwaavyeke okathi wooreerela olaleya ihapari sooreera, masi muhilavuleke moowaakuveya. Nvaaneleke moopatthaneya. Vakhala wira munoolavula mwaha ohimmusivela mutthu owo, waaniheryasa owo pooti onyoonyiheya ni ohiphavela-tho ovaanela. Muhikhumuwe akhala wira mwaha owo woomala muhiwenrye olaleerya. Moonaka ovila opaceriha olaleerya moohiilokiherya, mpaceriheke ovaanela hata muhirina palano oolaleerya. [Mooniherye ni muthokorerye eviidiyu 1.]

• Mpaceryeke olavula voohimya sa waamini wanyu, mwa enamuna enrowa omwiiriha mutthu owo ophavela otthokiheriwa etthu. Yesu aahilavula moolumo ootikiniha yaawo yaamwiirinhe muthiyana ole opaka makoho. Yesu aahipaceriha olavula voohimya sa ihapari sooreera aakhulaka makoho muthiyana ole aapanke awe. [Mooniherye ni muthokorerye eviidiyu 2, nuumala-vo mooniherye ni muthokorerye eviidiyu 3.]