Nilokiherye Inamuna Sahu Soolaleerya​—Opaceriha Mwaha Wira Nilaleerye Mohiilokiherya

Otthuneya Waya: Okathi onilaleerya ahu khula empa, ikwaha sikina vannivila waaphwanya atthu anceene. Masi, ninnikumana atthu awo okathi oneetta ahu mukwaha wala niryeene muxaapani; okathi onilipelela ahu wiitthaniwa hospitali, aahiiso okathi woophumurya omutekoni wala oxikola. Yehova oniphavela wira atthu otheene yiiwe ihapari sa Omwene. (1 Tim. 2:3, 4) Ikwaha sinceene, wira naalaleerye atthu awo, nihaana opaceriha mwaha.

Moota Woopaceriha Mwaha:

• Mukhaleke a miruku. Niireke mutthu owo toopatthaneya ni onniphavela ovaanela? Niireke okathi owo ti wooreerela? Anna akina wanipacerya anninweha mutthu owo nto khiyatheya. Akhala wira nuuwo onnitheya nave, awo annimananiha opacerya ovaanela.

• Mpake nivekelo nowaakuveya ni noomaaleleya, akhala wira munnoovelela olavula.​—Neh. 2:4; Mit. 4:29.

• Mulavuleke etthu yookhweya, waaniheryasa mmukohaka ihaali. Yesu khaapacenrye ovaanela ni muthiyana oSamariya olavulaka sa Omwene. (Yoh. 4:7) Ikwaha sikina, pooti opaceriha mwaha mmuttottopelaka mutthu owo. Pooti ohimya so: “Aniinyu toowiiwananeya!” Wala pooti omukoha so: “Mooweha wala owiriyana ihapari saakumiheriwe nsana?”

• Nuumala opaceriha mwaha, mwaavye moota woolaleerya; masi khamuntthuneya waakuveya. Waaniheryasa, pooti olavula etthu enimwiiriha mutthu owo otikinihiwa ni ophavela osuwela. Mwa ntakiheryo, akhala wira munilavula myaha sa emusi, pooti ohimya so: “Kiniphavela owooniheryani malakiheryo oororomeleya anikhaliherya waahuwa anamwane”. Akhala wira munilavula mwaha ohimmwale niinano muraadioni wala televisau, nyuwo pooti ohimya so: “Sihaavo ihapari sooreera kisomme aka niinano, seiyo sinivirikana ni myaha siniiwa ahu muraadioni wala televisau”. Muhikhumuwe akhala wira mwaha owo woomala, muhiwenrye olaleerya.

• Mweettaneke ifolyeeto ni iliivuru sikina wira mwaavaheke ale anisiveliwa ekeekhai.

Mweererye Ela Mweeri Yoola:

• Khula esumana mmananihe opaceriha mwaha ni mutthu mukina mphavelaka olaleerya mohiilokiherya.