Mmwaattamele Muluku
‘Nyuwo Munrowa . . . Wuurama Ohoolo Waka’
WIIYEVIHA onnivara murima. Ikwaha sinceene vanninikhweela owaattamela atthu oowiiyeviha. Mooriipiha murima, olelo va, wiiyeviha khoreere othowa, vanceenexa atthu arina owerya wala anaalamulela akina. Ankhi Yehova, ori Mukhulupale ootepexa owerya molumwenkuni? Niireke toowiiyeviha? Nivarerye masu a profeta Yeremiya a Wikhupanyera 3:20, 21: ‘Tthiri nyuwo munrowa okuupuwela ni wuurama ohoolo waka wira mukikhaliherye. Kinimuupuwela itthu iya mmurimani mwaka. Tivonto kinookhalana murima woowehererya’. Tradução do Novo Mundo.
Yeremiya aalempe eliivuru ela okathi wa mixankiho sa Isarayeli. Owo aahiweha etthu yaamuripinhe murima yaakumiheriwe ni anakhotto oBabilonia: ohononiwa wa Yerusalemu, esidade yaamusivela. Yeremiya aahisuwela wira Muluku aahikumiherya ehukhumu ele mwaha wa itampi saya. Nto niireke Yeremiya khaarina nlipelelo? Niireke uupuwela wira Yehova aari ottaiwene ni aahaahiya aIsarayeli yaattharunwe? Nkahaya munwiriyane Yeremiya vaavo onilompa awe mmureerelo wa nloko nawe.
Hata oxankale ene, owo onnilipelela woopoliwa. Nto onnikhuwela wa Yehova: ‘Tthiri nyuwoa [Yehova] munrowa okuupuwela ni wuurama ohoolo waka wira mukikhaliherye’. (Eveersu 20) Yeremiya khaahoverya. Aanikupali wira Yehova khaarowa omuliyala owo ni aIsarayeli akina oottharuwa. Nto Muluku oowerya sotheene aarowa opaka exeeni?—Wisupulula 15:3.
Yeremiya aanisuwela wira Yehova aarowa wuurama wa ale yiittarunxe mwekeekhai. ABiibiliya akina anihimya so: “Khoo, mukuupuwele, nto muurame wa miyo”. Masu ala annooniherya wira Yehova tooreera murima. Hata Yehova aryeene “Muulupalexa àtthu otheene”, owo onnuurama mwa nthoonyeryo ohoolo wa anamakokhorela awe, hata aryeene anamattheka onnaalevelela. (Esalimo 83: 19) Nnaamwi Yeremiya aariipiwe murima vanceene, mwaha wa nlipelelo owo aahiphwanya yoolipiha yekeekhai. Nto profeta ole oororomeleya, aahilipa owehereryaka okathi Yehova aarowa awe owoopola atthu awe yaattharunwe.—Eveersu 21.
Tthiri masu alempwe ni Yeremiya, anniniixuttiha etthu voohimya sa Yehova. Etthu yoopacerya: Yehova toowiiyeviha. (Esalimo 18:36) Nnaamwi Yehova aryeene ‘oweryexa’, onnoorwa ohoolo wahu wira anikhaliherye okathi wa oxanka. (Yobi 37:23; Esalimo 113:5-7) Tthiri masu awo toolipiha! Ya nenli: Yehova toomoriwa ikharari; owo ‘tolevelela’ ni onniwaakhela anatampi oottharuwa. (Esalimo 86:5) Inamuna iya piili: wiiyeviha ni omoriwa ikharari, khasinlevana.
Ti voohakalaliha osuwela wira Yehova khanlikana ni apinaatamu anilamulela, oowisinnuwiha ni ahimmoriwa ikharari! Nto munniphavela wiixutta myaha sikina sa wiiyeviha wa Muluku, yoowo ‘onuurama’ wira aakhaliherye arumeyi awe okathi wa mixankiho?
[Enoota]
a Alipa oolepa a khalai, yaahirukunuxa eveersu ela khulepa so: “eroho aka”, okhalaka wira onihimmwa ti Yeremiya. Awosa arukunuxa mwaha wa muupuwelo aya woowi khivanloka Muluku ohimmwaka okhala “eroho” wala etthu ekumi, nuulumo nenlo Biibiliya oniihanela awe soopattuxiwa sa valaponi. Masi ikwaha sinceene Biibiliya onnirumeela moolumo oopinaatamu aphavelaka onsuweliha saana mikhalelo sa Muluku. Okhala wira nuulumo noowi: “eroho” wala ekumi, pooti otaphulela-tho “okumi orina ahu”. Nto masu ale oowi: “eroho anyu” anitaphulela nuulumo noowi: “nyuwo”.
[Eponto yuulupale epaaxina 32]
Yehova onnoorwa ohoolo wahu wira anikhaliherye okathi wa oxanka