Ti Pani Oniiwa Olompa Wahu?

AKHALA wira ohaavo oniiwa olompa wahu, nto owo tori Mpattuxa a itthu sotheene. Niireke ookhala oniwerya woona sotheene sinuupuwela ahu, voohikhala Ole onipattunxe? Tani-tho oniwerya waakhula mavekelo ni waakhaliherya apinaatamu voohikhala Mpattuxa? Hata vari siiso, nyuwo munnikoha wira: ‘ti vookhalela okupali wira ookhala tthiri Mpattuxa?’

Anamunceene anoona wira omukupali Mpattuxa, mutthu ohaana okhootta myaha sekeekhai sa siensia a vano. Masi wuupuwela wira omwaamini Muluku khonivarihana ni siensia, ethiru. Thokoreryani myaha iya:

◼ Niinanoxa, nuumala okohiwa maprusoore a siensia oowiiraka 1.646 a ixikola soovuwa sa universidade sowiiraka 21 sa Estados Unidos, vahooneya wira: mmosa paahi wa khuta maprusoore araru, taahimya wira “khonikupali wira Muluku ookhala”.

Ela enooniherya wira masientista manci annikupali wira Muluku ookhala.

Itthu sinnikupaliha wira Muluku ookhala

Niireke nihaana okupali paahi wira ookhala Oniiwa mavekelo voohikhala etthu ennikupaliha? Nnaari. Wuupuwela mmoota owo khahiyo wooloka. Maana Biibiliya onihimya wira: “wamini t’inamuna y’okhalana itthu sinlipelela ahu, ni t’osuwelexa itthu sihinònahu”. (aHéberi 11:1) Biibiliya mukina onihimya wira waamini: “onniniiriha okupali wira sookhala itthu sekeekhai sihinooneya”. (The New English Bible) Ntakiheryo: Nyuwo khimunoona epheyo eniteexa masu a raadio wala a selulari, masi okathi oniruma awe munnisuwela wira yookhala tthiri etthu ehinooneya eniteexa masu aniiwa anyu; tivonto khamunivaanya wira yookhala epheyo eniteexa masu awo. Moolikanasa, nnaamwi nihiweryaka onweha mulipa Oniiwa mavekelo ahu, hiyo pooti otokosa itthu sinnikupaliha wira owo ookhala tthiri.

Nto exeeni enrowa onikupaliha wira Muluku ookhala? Nihaana oweha itthu sinirukurenrye. Biibiliya onihimya so: “Vekekhai khul’empa entekiwa ni mutthu: vano Muluku t’upanke itthu sothene”. (aHéberi 3:4) Munnikupali masu ala ekeekhai? Waaniheryasa, okathi oniweha anyu moota erimu etthokihen’ya aya, moota okhumelenle aya okumi, wala mikhalelo sikina sootikiniha sa valaponi ntoko ottoopare wa mutthu, niireke itthu iya sinniwiirihani woona wira ookhala mukhulupale oninvikana pinaatamu?a

Masi itthu sipattuxiwe khisinooniherya makhalelo otheene a Muluku. Oweha itthu Muluku opattunxe awe, onlikana ni wiiwa onyakula wa mutthu oneetta aattamelaka mukhora, vate. Mutthu onnisuwela wira ookhala ori vate, masi khoniwerya onweha! Wira mmusuwele, nyuwo muhaana ohula mukhora. Moolikanasa, nihaana ohula mukhora wa ntakiheryo wira nimusuwele Muluku.

Biibiliya onlikana ni mukhora onnisuweliha Muluku. Okathi onihula anyu mukhora owo ni othokorerya myaha sinci sa iprofesia ni wiiraneya waya, munrowa osuwela wira ookhala tthiri Muluku.b Ohiya vo, myaha siri mBiibiliyani sa moota Muluku onaathokorerya awe atthu, sinooniherya wira owo Onniiwa mavekelo.

Ori Sai Muluku Owo Oniiwa Mavekelo Ahu?

Biibiliya onooniherya wira ole oniiwa mavekelo ookhalana mikhalelo sooreera ntoko mutthu oophenta, tivonto vanniweryaneya omusuwela. Tthiri mutthu oophenta toniwerya wiiwa mooreerela murima. Nto ninnilipa naasomaka masu ala: “Nyuwo munniwìwa ale anovekelani: tivó atthu othene annorwelani”. (Esalimo 65:3) Owo onniwiiwa ale aninvekela yaaminiki. Nave Muluku ohaana nsina. Biibiliya onihimya so: “Yahvéh khanawàttamela atakhali, nto onnìwa mavekelo ànaxariya”.—Miruku 15:29, Biblya Exirima.

Sihaavo itthu sinimusivela ni sinimunanara. Yehova ti ‘Muluku ophenta’ ni “òvuwa” wala oohakalala. (2 aKorinto 13:11; 1 Timótheyo 1:11) Voohimya sa moonelo awe, okathi sootakhala saasaren’ye aya mulaponi, Biibiliya onihimya so: ‘Murima awe waninwereyaxa’. (Maphattuwelo 6:5, 6, Biblya Exirima ) Moolumo oowi Muluku onnikumiherya ohaawa wira oneehererye, wootha wuulupale. Maana Biibiliya onihimya so: “Muluku khivo yotakhala enìrawe”. (Yobi 34:10) Waaniheryasa nyuwo pooti okoha so: ‘Akhala wira Muluku ti Mpattuxa oowerya sotheene, nto xeeni onihiya awe ohaawa ovikanihaka?’

Yehova ohaavaha apinaatamu othanla opaka itthu mootaphuwa, nto eyo enninooniherya makhalelo awe. Niireke mweettelo ahu onooniherya wira ninnivaha efaita otaphuwa orina ahu? Masi voothananiha vo, anamunceene anirumeela moohiloka otaphuwa waya nto khiyaikumiherya maxakha ni waahaaxa akina. Vano nihaavo nikoho nla nuulupale: Muluku onrowa omaliha sai ohaawa masi voohihonona otaphuwa orina ahu? Nikoho nna ninrowa othokoreriwa mmwaha onittharelana.

[Inoota]

[Ekaaxa epaaxina 5]

Niireke Itiini Sinniwiirihani Ohoverya?

Voothananiha, itiini sinniwiiriha atthu anceene ohoverya akhala wira ookhala tthiri Muluku onnoonela othunku ni onaakhula mavekelo ahu. Okhala wira itiini sinniwana ikhotto, owiiva atthu ahirina mulattu, ni waarupiha anamwane; eyo enniwiiriha atthu ooloka ohimya wira “khanikupali wira Muluku ookhala”.

Nto exeeni eniiriha itiini opakaka itthu iya sootakhala? Atthu ootakhala annipaka itthu soohiloka erumeelaka etiini. Biibiliya aahilavula wira muhoolo atthu akina yaarowa orumeelaka eKristau wira epakeke itthu sootakhala. Murummwa Paulo aahaalopola axitokweene maKristau ariki: “mwa nyuwo anokhumelela atthu anrowa olavula sovirikana, yahapuxaka alipa-òwamini wira yatthareke”.​—Miteko 20:29, 30.

Muluku khansiveliwa ni itiini sowootha. Tthiri Nuulumo na Muluku, ninhimya wira itiini sowootha sookhalana mulattu mwaha wa ‘ephome  . . ya atthu othene aiviwe mulaponi’. (Wisupulula 18:24) Itiini iyo sihaana mulattu ohoolo wa Muluku mwaha woohiwiixuttiha atthu wira ophenta tori mukhalelo muulupale wa Muluku.​—1 Yohani 4:8.

Mulipa ‘Owiwa mavekelo’ onnoona othunku mwaha wa atthu anihaaxiwa ni itiini. Moohipisa mwaha wa waaphenta wawe apinaatamu, Muluku onomuruma Yesu wira aphukele itiini sotheene sowootha. Yesu aahilavula wira: ‘Atthu anjene anokìrela: ‘Apwiya, Apwiya, hiyo khinlaleiye nsina nanyu?’ . . . Vano miyo kinowakhula wira: Miyo nkinosuwelani! Mukhumase va, nyuwo munìra sotakhala’.​—Matheyo 7:22, 23.