Mmwaattamele Ole Oniiwa Mavekelo

ATTHU yaale anihimya wira annimwaamini Muluku, kharina mathipelo anilipiha waamini waya. Khaniwerya otthokiherya mwaha aya itiini sinikumiherya aya itthu sootakhala, wala nthowa naya Muluku onihiya awe ohaawa okhumelelaka. Etthu eniwerya aya, omulompa Muluku paahi hata ahisuwelaka ikhalelo sawe.

Masi, vanniweryaneya nyuwo omwaattamela Muluku waavikana akina. Omusuwela saana Muluku onoolipiha waamini wanyu, omphenta, ni onvaha efaita. Osuwelexa etthu, tori mathipelo a waamini wekeekhai. (aHéberi 11:1) Mwaixutta ekeekhai voohimya sa Muluku, munrowa omusuwela saana ni ovaanelaka ni yena ntoko mpatthani anyu. Nkahaya moone sowiiraneya sa atthu akina yanvekela Muluku masi moohisuwela saana akhala wira ookhala.

◼ Patrícia, yoole oromoliwe mmwaha woopacerya, onihimya so: “Nihiku nimosa, kiryeene ni apatthani aka oowiiraka 10, awo yaahipacerya olavula myaha sa etiini. Nto kaahihimya wira kaahitthyawa owaani okathi paapa aka yoowo aari ateu aavanela awe ni Namoona a Yehova aaphiyale vapuwani vahu. ‘Nto mpatthani aka mmosa aahimmye so: ‘kinoona wira Anamoona a Yehova aakhalana etthu yooreera wiiwa’.

“‘Mukina aahimyale so: ‘Xeeni nihirowaka omuthukumanoni waya wira nawehe?’ Nto, ti etthu yaapanke ahu. Nnaamwi nahaacalela, akina a hiyo naahivikaniha orowa omuthukumanoni mwaha wa Anamoona a Yehova okhala oopatthaneya.

“Masi, Ettiminku emosa, kaahiiwa etthu yaarukununxe muupuwelo aka. Mulipa-oolavula mwaha, aahihimya saana etthu eniwiiriha apinaatamu ohaawa. Nkaatonko wiiwa wira pinaatamu aapakiwe oomalela, masi wira ottheka ni okhwa ohuulaana wa atthu otheene mwaha wa mutthu mmosa. Mulipa-oolavula mwaha ole, aahihimya-tho wira okhwa wa Yesu wowiiriha apinaatamu ophwanya okumi yoole Adamu wahacalenle aya.a (aRoma 5:12, 18, 19) Mowaakuveya kaahipacerya wiiwexexa itthu sotheene. Nto khupacerya woona wira ‘tthiri ookhala Muluku onnoonela othunku’. Kaahivikaniha omusoma Biibiliya, nto yahiiraneya etthu yahaatonko aka wuupuwela, moohipisa kahoona wira vanniweryaneya onvekela Muluku, maana owo ookhala tthiri”.

◼ Allan, ohimmwale-tho wanipacerya oni: “Nihiku nimosa yaahirwa Anamoona a Yehova vate vaka, nto amwaaraka yaahaalattula okela mpaani mwaha woosiveliwa etthu yaalavuliwe, okumi woohimala valaponi. Kaahinyema. Nto khwaahiya atthu ale vasaala, kahaakuxa amwaaraka kaaroiha okosinya khwahimeerya so: ‘Muhiwokiwe. Muhikupali itthu sinihimya aya’!

“Mwaaraka aakhunle so: ‘nto muhaana orowa owooniherya etthu ene enoona anyu okhala ethiru’.

“Nto nkoonale etthu yeethiru. Masi anamoona ale yaari ooreera murima, ni yaahikivaha eliivuru enithokorerya mwaha ola: okumi okhumenle sai oroopattuxiwa wala oroothatuwa? Eliivuru ele yaahikikhaliherya wiiwexexa saana itthu, khulakela wiixutta saana voohimya sa Muluku. Nto kahaavekela Anamoona wira akikhaliherye omwiiwexexa saana Biibiliya, moohipisa kaahiixutta itthu sinci sooreera voohimya sa etiini, ovikana khalai. Vaavo kaixutta aka voohimya sa makhalelo a Yehova, kaahipacerya onvekelaka ni murima wotheene. Kaanipaka itthu sikina soohiloka, ti maana aya kaanivekela wira kikhaliheriwe. Nenna va kinnoona wira Yehova ohaakhula tthiri mavekelo aka”.

◼ Andre onikhala wInglaterra onihimya so: “Nnaamwi kaasiveliwa vanci ni siensia, etthu yaakiiriha okupali wira itthu sikumi siroothatuwa, mwaha woowiiwa paahi wira ariwa itthu siroothatuwa. Nto kaanikhootta okupali wira Muluku ookhala, mwaha wa itthu sootakhala siniiraneya.

“Masi, ikwaha sikina kaanuupuwela so: ‘Akhala wira Muluku ookhala, nto xeeni itthu iya siniiraneya aya? Xeeni ikrime ni ikhotto wulaanaka?’ Okathi wooxanka, kaanivekela wira kikhaliheriwe, masi nkaamusuwela ti pani anvekela aka.

“Nuumala vo, mwaaraka aahivahiwa etratato eni: Olumwenku Ola Onoowerya Ovuluwa? epakiwe ni Anamoona a Yehova. Nto nikoho nlo ti etthu yaamakelaka wuupuwela. Etratato eyo yaahikiiriha wuupuwela so: Niireke Biibiliya onnihimya etthu yooloka? Muhoolo mwaya, kiryeene ifeeriya, mutthu mmosa aahikivaha eliivuru eni: A Biibiliya Palavra de Deus ou de Homens?b Nuumala okupali wira Biibiliya onnivarihana ni siensia, kaahipacerya ophavela omwiiwexexa saana Biibiliya. Nto okathi Namoona a Yehova aivaherenrya awe okisomiha Biibiliya, kaaheemya. Okathi kaiwaaka saana soolakela sa Yehova, kaanoona wira nto kinnimusuwela saana Muluku ntoko mpatthani, yoowo oniwerya aka olavulana mootaphuwa”.

◼ Jan, yoowo aari mpurustanti oLondon onihimya so: “Mwaha wa mweettelo woohiloka wa atthu a mukerexa, ni waatta atthu anihaawa valaponi , waahikiiriha ohiphavela-tho myaha sa etiini. Kaahihiya-tho osoma, kinamoopa viola wira kiphwanyeke musurukhu. Nto okathi owo kaahimusuwela Pati, yoowo aari muKatoolika masi aahiiye waamini ntoko miyo.

“Miyo ni Pat naakhala empa yoothamiwa vamosa ni atthu akina yaahiiye waamini nto anaphavela wiixutta itiini sa Ilapo sa onikhuma nsuwa. Naanimaliha iwoora sinceene ohiyu nilavulaka sa yoolakela ya okumi wa apinaatamu. Nnaamwi miyo ni Pati nahaakupali wira Muluku ookhala, hiyo naanisuwela wira yookhala etthu ‘ekumihenrye itthu sikumi’.

“Nuumala othaamela muttetthe mukina wInglaterra niphavelaka muteko wa wiipa, naahimuyara mwanihu. Ohiyu omosa, mwanaka aahiwereiwa, nto miyo khupacerya omulompa Muluku nnaamwi kahaamukupali. Nto, waahikhumelela ohiiwanana miyo ni Pati, miyo kaahimukuxa mwaana khikhuma opuro ole. Kaahitthikela-tho olompa kivekaka okhaliheriwa, kuupuwelaka wira akhala wira ookhala tthiri oniiwa, owo onimwiiwa olompa waka. Nnaamwi kahaasuwela, Pati aanivekela-tho.

“Nuuvira okathi masi nihiku nenle, Anamoona anli a Yehova, yaahiphiya vapuwani wa Pati khumooniherya miruku sooloka sa Biibiliya. Nto, Pat aahikiihana khukikoha akhala wira kaaniphavela omusoma Biibiliya nuuwo, nisomihiwaka ni Anamoona a Yehova. Moohipisa naahiixutta wira naphavela omusiveliha Muluku, nahaana olepiha ekasamento ahu. Nto wuupuwela olepiha ekasamento waakhala wira etthu yootepexa ovila wiiwelela mwaha wa onyakulihana wahu.

Naaphavela osuwela saana moota saarowa aya wiiraneya sooleiherya sa Biibiliya, etthu ene eniwiiriha atthu ohaawa, ni ele Omwene wa Muluku enrowa awe opaka. Vakhaani-vakhani, naahiixutta wira Muluku onninoonela othunku, eyo yaahiniiriha ophavela weettela sooruma sawe. Khuthelana ekasamento. Miruku sa Nuulumo na Muluku, soonikhaliherya waahuwa aniihu araru. Tthiri nookupali wira Yehova ohaakhula mavekelo ahu.

Mutokose Mmansinyu

Atthu imilyau sinceene anlikana ni ale amanle oromoliwa mmyaha iya, ahoona tthiri moota etiini yoowootha enaawoka aya atthu; nave ahiixutta etthu enimwiiriha Muluku waahiya atthu ehaawaka. Sai, mooweha wira osuwela wira Yehova onniwiriyana mavekelo ni omwiiwexexa saana Biibiliya ti etthu yaakhalihenrye atthu aromoliwe mmwaha ola?

Munniphavela otokosa itthu sinooniherya wira Muluku ookhala tthiri? Anamoona a Yehova anoohakalala vanceene wookhaliheryani wira mwiixutte ekeekhai voohimya sa Yehova ni moota womwaattamela ole ‘Oniwa mavekelo’ ahu”.​—Esalimo 65:3.

[Inoota]

[Eponto yuulupale epaaxina 10]

“Nuumala wiiwexexa soolakela sa Yehova, kaahikupali wira Muluku ookhala tthiri ni wira vanniweryaneya wuulumana saana okathi woovekela”.

[Elatarato epaaxina 9]

Waamini wekeekhai ohaana mathipelo animwiiriha mutthu omusuwela Muluku ni makhalelo awe