Mukhale Ephoole Ni Miraakho Sa Satana!

‘Mutaphuwe mmirakhoni sa Satana’.​—2 TIM. 2:26

MUNNIWERYA WAAKHULA?

Ninrowa osuwela sai akhala wira ninnaalavula akina moohiloka?

Ntakiheryo na Pilato ni Pedru, ninniixuttiha exeeni voohimya sa owoova atthu ni sookhanyererya saya?

Munrowa osyaka sai wiixoona ohiloka mwaha wa itampi sa khalai?

1, 2. Mwa yoosoma ela, miraakho xeeni sa Satana ninrowa ahu othokorerya?

DIABO onnaaxaya arumeyi a Yehova. Masi owo khahiyo oniphavela owiiva ntoko mulipa onaaxaya axinama. Owo oniphavela waavara atthu akumi wira awiiriheke ntoko siniphavela awe.​—Mmusome 2 Timótheyo 2:24-26.

² Mulipa onixaya, wira onvare mwaaxinama mukumi, onnireya muraakho onireerela. Owo pooti weererya opaka mphito wala mukweekhwela ophavelaka onwoka mwaamunama wira ahomphwe ni ethulula. Aahiiso, owo pooti omureya latuwera khumuuheela vathi wira mwaaxinama apaniwe mootutuxerya. Satana onirumeela miraakho sinilikana ni seiya wira aavare arumeyi a Muluku. Wira nisyake ovariwa ni miraakho sa Satana, nihaana wiiwelelaka soolopola sa Muluku sinooniherya miraakho iyo. Yoosoma ela, ninrowa othokorerya moota ninrowa ahu osyaka miraakho miraru seiyo Diabo sinrumeela awe vanceene. Miraakho iyo tiiya: (1) olavula ohuupuwenle, (2) woova, ni okhanyereriwa opaka soohiloka, ni (3) wiixoonaka otepa ohiloka mwaha wa ottheka. Yoosoma ya esumana enirwa enrowa othokorerya-tho miraakho miili sa Satana.

MUTTIPIHE MOORO ONIKUMIHERIWA NI OLAVULA OHUUPUWENLE

3, 4. Exeeni enrowa wiiraneya nahikasoope nlumi nahu? Nvahe ntakiheryo.

³ Mulipa onixaya inama siipinthe, onnithanla opuro ene khiyapapaherya malaxi, nto okathi inama siniphavela aya otthyawa owo onnivara. Moolikanasa, Diabo oniphavela opapaherya muloko wa eKristau. Owo awerya opaka eyo, onrowa oweettihaka moota sintthuna awe aakumihaka maKristau mmulokoni wira erowe munikotoni mwawe. Satana onoowerya oniiriha hiyo omukhaliherya hata nihiphavelaka. Moota xeeni?

⁴ Murummwa Yakobo aahilikanyiha nlumi ni mooro. (Mmusome Yakobo 3:6-8.) Nahiikasoope moota onilavula ahu, nlumi nahu pooti okumiherya mooro mmulokoni. Eniweryaneya sai? Nkawehani etthu ntoko ela: Mmulokoni sinnipakiwa soohimmwa wira murokora mmosa oheemereriwa okhala pioneero ookilaatheya. Nuumala mithukumano axirokora anli annimulavula murokora owo. Mukina onihimya wira ootepa ohakalala ni oniphavela wira murokora ole akhumele saana. Mukina onihimya wira murokora owo ori pioneero, oniphavela ovuwa paahi mmulokoni. Munoonela sai, mwa arokora ala anli, tani nyuwo onimphavela anyu okhala mpatthani anyu? Wa axirokora ala anli, khivanivila omusuwela aarowa opapaherya muloko mwaha wa ilavulelo sawe.

5. Wira nittipihe mooro onikumiheriwa ni moolumo oohiloka, etthu xeeni enireerela ahu opaka?

⁵ Nto ninrowa ottipiha sai mooro onikumiheriwa ni olavula wohuupuwela? Yesu aahilavula wira: “Tthiri eyano ennilavula itthu sisanrye mmirimani”. (Math.12:34) Tivonto nivalo noopacerya ori otokosa murima ahu. Niireke ninnisyaka olavula masu ootakhala? Mwa ntakiheryo: naiwa wira munna mmosa oovahiwa eparakha ya miteko sa mmulokoni, niireke ninnimulavula saana, wala ninlavula wira oniphavela wiixooniherya? Akhala wira ninnaalavula akina moohiloka, nihaana wuupuwela wira Diabo-tho aahimya wira murumeyi Yobi khaamurumeela Muluku ni murima wotheene. (Yobi 1:9-11) Nihinatthi omulavula munnihu, nihaana ovarerya toko etthu enniiriha omulavula munna mmoota owo. Niireke aakhala tthiri mathowa anireerela omulavula mmoota owo? Wala niireke murima ahu woonanarihiwa ni mweettelo woohiphenta wa mahiku ala ookiserya ni ootakhala?​—2 Tim. 3:1-4.

6, 7. (a) Mathowa xeeni animwiiriha mutthu waalavula akina moohiloka? (b) Akhala wira nooveehiwa nipakeke exeeni?

⁶ Nkahaya moone-tho itthu sikina sinimwiiriha mutthu waalavula akina moohiloka. Okathi mukina eniiriha ori ophavela wooniwa ni atthu akina. Eyo ennimwiiriha mutthu ophavela ovuwa ni waayeviha akina. Okathi mukina pooti mutthu ohicalela soovonya sawe wira miteko sawe sooniweke oreera. Nto, wiixinnuuha, nrima, wala ohisuwela etthu enrowa owiiraneela, onnihonona mukhalelo ahu.

⁷ Ewoora ekina pooti wuupuwelaka wira ahaavo mathowa oophwanelela anniiriha waalavula akina moohiloka. Waaniheryasa nootoko olavuliwa moohiloka ni munna wala murokora. Nto wunla ikuhu, khahiyo etthu yooloka. Opaka eyo onlikana ni omuhela kasolina vaikho, ohiya-vo, iyo miteko sa Diabo, khahiyo miteko sa Muluku. (2 Tim. 2:26) Omutakiha Yesu ti etthu yooloka. Okathi aaruwaniwa awe, “khupuwela wunla ikuhu”. Masi, “ahìvelela mmatatani mwawe ole onlamula n’ixariya”. (1 Ped. 2:21-23) Yesu aaniroromela wira Yehova aarowa okhapelela myaha iye moovarihana ni otthuna Wawe ni okathi awe. Nave hiyo nihaana omuroromelaka Muluku. Naarumeelaka moolumo ahu wira naalipihe akina, nnookhalana ‘murettele onnithukumanya’ mmulokoni.​—Mmusome aÉfeso 4:1-3.

MUSYAKE WOOVA NI OKHANYERERIWA OPAKA SOOHILOKA

8, 9. Xeeni Pilato aamulamunle awe Yesu wira aiviwe?

⁸ Mwaamunama ohomphwe vamuraakhoni, khaniwerya wiikhapelela. Moolikanasa, mutthu onikhanyereriwa otthara mweettelo woohiloka, khoniwerya okhapelela saana okumi awe. (Musome Miruku 29:25.) Nkahaya nithokorerye matakiheryo manli aatthu oovirikana, yeemerenrye otthara mweettelo wa akina mwaha wa woova, nto niwehe ele eniixutta ahu.

⁹ Kuvernatoro muRoma Ponsio Pilato, aahisuwela wira Yesu khaarina mulattu, waaniheryasa Pilato aaniphavela omutaphula Yesu. Tthiri, Pilato aahilavula wira Yesu: “khatthenke etthu yophwanela wiviwa”. Nnaamwi vari siiso, Pilato aahiruma wiiviwa Yesu. Mwaha wa xeeni? Mwaha wookhanyereriwa ni muttitthi wa atthu. (Luka 23:15, 21-25) Atakhali ale ephavelaka opaka ele yaasivela, yaahikhuwela wira: ‘mwamutaphula vale, khamuhiyó mpatthani a mwené òRoma [Césari]’. (Yoh. 19:12) Waaniheryasa, Pilato oova oyeleela okhulupale awe wala wiiviwa aakhanle wira oomukhaliherya Kristu. Nto woova waahimwiiriha weemererya opaka yootthuna ya Diabo.

10. Exeeni yaamwiirinhe Pedru omukhootta Kristu?

¹⁰ Murummwa Pedru ari mpatthani muulupale a Yesu. Owo aahilaleya wira Yesu ari Mesiya. (Math. 16:16) Pedru aahivikaniha ororomeleya okathi arumeyi akina yaahiiya aya omutthara Yesu mwaha woohiiwa saana moolumo a Yesu. (Yoh. 6:66-69) Okathi waarun’ye aya anyokhani wira envare Yesu, Pedru aahikumiha ekatana wira amwaakihe Pwiya awe. (Yoh. 18:10, 11) Masi muhoolo mwaya, Pedru aahivonya mwaha wa woova, khohimya wira khaamusuwela Yesu Kristu. Okathi vakhaani paahi murummwa ola aahihomphwa ni muraakho wa omoova pinaatamu, khumooceeliha olipa murima.​—Math. 26:74, 75.

11. Soohapuxa xeeni nintthuneya ahu osyaka?

¹¹ Hiyo maKristau, nihaana osyaka okhanyereriwa opaka itthu sinimunanara Muluku. Mapatarau omutekoni, pooti onitumererya wootha wira awiiyerye atthu wala onikhanyererya wira niraruwe. Ale anisoma oxikola, ahaana okhootta okhanyereriwa wiiyerya iporova wala isaame, oweha epornografia, omulya soona wala sikaro, orumeela mirette soohapala, ohapaliwa, wala orupihana. Nto ninrowa osyaka sai okhanyereriwa opaka itthu iyo sinimunanara Yehova?

12. Sowiiraneya sa Pilato ni Pedru sinniixuttiha exeeni?

¹² Nkahaya noone etthu enniixuttiha aya yowiiraneya ya Pilato ni Pedru. Pilato khaamusuwela saana Kristu. Masi, owo aanisuwela wira khaarina mulattu, ni wira khahiyo aari mutthu pure. Masi Pilato khaiyeviha ni khamphenta Muluku ekeekhai. Nto mowaakuveya, Diabo aahinvara Pilato sisaale muraakho oninvara aya mwaamunama mukumi. Pedru aanimusuwela saana Yesu ni aanimphenta Muluku. Masi, Pedru aahihiya wiikhapelela mwaha wa woova nto khittharaka sookhanyererya sa akina. Ahinatthi Yesu ovariwa, Pedru aahilapha wira: ‘Othene yohiyani, miyo nkinohiyani’. (Mar. 14: 29, Biblia Solempwa sa Muluku) Murummwa Pedru anwerya wiilokiherya saana wira axintte soweeha sa muhoolo saalikana ni mixankiho sa nasalimo yoowo aamuroromela Muluku, iimpale so: “Apwiya ankhala ni miyo: tivó vahinòvaka etthu. Atthu anwerya okìriha exeni?” (Esal. 118:6) Ohiyu ole wookiserya wa okumi wa Yesu valaponi, owo aahimukuxa Pedru ni awiixutti akina anli arowaka oxardim ya oJesémani. Nto Pedru ni akhwaawe, yaahirupa khuhiwerya ovikaniha owehaweha. Yesu aahaavenxa khuhimya wira: “Nwehereryeke, mulompeke, wira muhimoré mwehereriwaka”. (Mar. 14:38) Masi Pedru aahitthikela orupa, nto muhoolo mwaya aahoova mwaha wa okhanyereriwa ni atthu.

13. Ninrowa osyaka sai okhanyereriwa opaka itthu soohiloka?

¹³ Matakiheryo a Pilato ni Pedru pooti oniixuttiha-tho etthu ekina yootthuneya: Wira niwerye oxintta okhanyereriwa opaka soohiloka, nihaana okhalana osuwela wekeekhai, wiiyeviha, osuwela mukano ahu, omoova ni omphenta Yehova Muluku ohiya apinaatamu. Akhala wira osuwela wekeekhai tori mathipelo a waamini wahu, khinnirowa woovaka olavula itthu sinikupali ahu. Eyo tenrowa onilipiha ni oxintta omoova mutthu. Nto nihiroromeleke ikuru sahu paahi. Nihaana wiiyeviha nisuwelaka wira ikuru sa Muluku ti sinnikhaliherya ovilela mixankiho. Oveka munepa wa Yehova, ni omphenta onrowa oniiriha ovuwiha nsina nawe ni sooruma sawe. Masi, nihaana wiitthokiha ohinatthi oniphwanya muxankiho onneehererya. Mwa ntakiheryo, waatthokiha aniihu ni ovekela naawo, onimwaakhaliherya oxintta sookhanyererya soohiloka sa oxikola.​—2 aKor. 13:7.a

MUSYAKE MURAAKHO ONINYAKATTA, WIXOONAKA OTEPEXA OKHALA NATAMPI

14. Mwaha wa soottheka sahu, Satana oniphavela wira nuupuweleke sai?

¹⁴ Ikwaha sikina muraakho, onikhala nikhowa, mwiri wala nluku noolemela ninreiwa osulu wa mphito munivira inama. Nto mwaamunama ohiniisuwela onnivira mumphitoni mmo khiyakwannya mikhoyi sitthukweleliwe mwiri woorakama wala nluku, nto okathi onimora aya khiyamphita. Nto miyuupuwelelo sowiivaha nthowa nuulupale, pooti olikanyihiwa ni mwiri woolemela oninyakatta. Wuupuwelela soottheka sa khalai pooti omwiiriha mutthu woonaka okhala ‘ònyatteya’ mmakhuvani mwawe. (Musome Esalimo 38:3-5, 8.) Satana oniphavela nuupuweleke wira Yehova khannimorela ikharari, wala hiyo khanniwerya wiiwelela sooruma sa Muluku.

15, 16. Munrowa osyaka sai muraakho wa wiixoona otepa ohiloka mwaha wa soottheka sa khalai?

¹⁵ Nto nisyake sai muraakho ola oninyakatta? Akhala wira moottheka, murukunuxe murima wira mutthikele wataana ni Yehova. Nwaavye axitokweene a mmulokoni wira yookhaliheryeni. (Yak. 5:14-16) Mpakeke itthu siri sooloka ohiya soohiloka. (2 aKor. 7:11) Akhala wira moopwapweliwa, muhiriipiwe murima. Opwapweliwa ethoonyeryo yoowi Yehova onnoophentani. (aHéb. 12:6) Mwiikasoope ni itthu saawiirinheni ottheka, nto muturuke mweettelo anyu. Mwattharuwa vale, muroromeleke mukuttho onoopola wa Kristu wira onoorapiha soottheka sanyu.​—1 Yohani 4:9, 14.

¹⁶ Akina anniixoona okhala ootepa ohiloka mwaha wa itampi saya sa khalai nnaamwi awo eleveleliwe ene. Akhala wira enniiraneya ni nyuwo, muupuweleke wira Yehova aahimulevelela Pedru ni arummwa akina yaale yaamuhin’ye Yesu Mwaana oophentiwa a Muluku, okathi yoole aareerela awe okhaliheriwa. Nave Yehova aahimulevelela mulopwana oomoliwe mmulokoni wa oKorinto yoowo aari namararuwa, nto okathi aya khittharuwa. (1 aKor. 5:1-5; 2 aKor. 2:6-8) Biibiliya onnaaromola atthu yaapaka soottheka suulupale masi yiittarunxe khuleveleliwa ni Muluku.​—2 Wah. 33:2, 10-13; 1 aKor. 6:9-11.

17. Etthu xeeni ennivaha aya mukuttho onoopola wa Yesu?

¹⁷ Yehova onrowa woolevelelani ni oliyala soottheka sanyu mwattharuwa vale ni weemererya omoriwa wawe ikharari. Muhuupuweleke wira mukuttho onoopola wa Yesu khoniwerya orapiha soottheka sanyu. Wuupuwela siiso, ori omorela mmuraakhoni wala munikhowani mwa Satana. Moovirikana ni ele onihimya awe Diabo, nto musuwele wira mukuttho wowoopola onoowerya orapiha itampi sa ale anittharuwa soottheka saya. (Mir. 24:16) Ororomela eyoopoli ya Yesu onnimaliha muupuwelo wa wiixoona otepa ohiloka mwaha wa etampi. Nave mukuttho owo ononlipiha wira nimurumeeleke Muluku ni murima, okumi, ni muupuwelo ahu wotheene.​—Math. 22:37.

HIYO KHINNITIKHINA MIRAAKHO SA SATANA

18. Ninrowa owerya sai osyaka miraakho sa Diabo?

¹⁸ Satana oniphavela orumeela khuta muthinto wa muraakho wira oniphite. Okhala wira khinnitikhina miraakho sa Satana, hiyo nnoowerya osyaka ovariwa ni Diabo. (2 aKor. 2:10, 11) Owo khoniwerya onivara akhala wira ninniveka miruku wira nixintte soweeha. ’ ‘Masi akhalá mwa nyuwo ohirina ankhili, anvekele Muluku: onovahiwa, okhala wira Muluku onnavaha atthu ni murima wothene ahùlumelaka’. (Yak. 1:5) Nto nihaana okhalaka moovarihana ni ele eniveka ahu nisomaka Nuulumo nawe ni weettela. Iliivuru sinimutthokiherya Biibiliya seiyo sinikumiheriwa ni murumeyi oororomeleya, sinoowerya onooniherya miraakho sa Diabo wira nisyakeke.

19, 20. Nthowa xeeni vanitthuneya ahu onyokha itthu soohiloka?

¹⁹ Ovekela ni omusoma Biibiliya onniniiriha ophenta itthu sooloka. Nave-tho nihaana onyokhaka itthu soohiloka. (Esal. 97:10) Osuwela maxakha anikhumelela mwaha woophavela wiihakalaliha paahi, onooniiriha osyaka itthu soohiloka. (Yak. 1:14, 15) Naixutta onyokha itthu soohiloka, khiyaphenta saana itthu sooloka, miraakho Satana onnireya awe khasinrowa onivara.

²⁰ Tthiri, ninnimuxukhuru vanceene Muluku mwaha wa onikhaliherya wira nihihomphwe ni Satana! Arumeelaka munepa awe ni Nuulumo nawe, ni mulokiheryo awe, Yehova ‘onninakiherya mutakhali’. (Math. 6:13) Yoosoma enittharelana, ninrowa wiixutta moota woosyaka miraakho seiyo Diabo onoona awe oreerela wira aavareke enari akumi arumeyi a Muluku.

[Enoota]

[Elatarato epaaxina 24]

Olavula mutthu ohuupuwenle pooti okumiherya mixankiho sinihonona muloko

[Elatarato epaaxina 27]

Nyuwo pooti oxintta wiixoona ohiloka mwaha wa soottheka sa khalai